പാകിസ്ഥാനിലെ കറാച്ചിയിൽ റാഷിദ് മിൻഹാസ് റോഡിൽ ലക്കി വൺ മാളിന് സമീപം ഞായറാഴ്ച പുലർച്ചെയുണ്ടായ ദാരുണമായ ഡമ്പർ ട്രക്ക് അപകടം വൻ ജനരോഷത്തിന് കാരണമായി. അപകടത്തിൽ രണ്ട് സഹോദരങ്ങൾ കൊല്ലപ്പെടുകയും പിതാവിന് പരിക്കേൽക്കുകയും ചെയ്തതോടെ, പ്രകോപിതരായ ജനക്കൂട്ടം ഏഴ് ഡമ്പർ ട്രക്കുകൾക്ക് തീയിടുകയും പ്രധാന നഗര പാതകളിലെ ഗതാഗതം തടസ്സപ്പെടുത്തുകയും ചെയ്തു. സംഘർഷഭരിതമായ അന്തരീക്ഷം ഒരുപക്ഷെ രാജ്യത്തെ ഒരു ആഭ്യന്തര യുദ്ധത്തിലേക്ക് വരെ നയിച്ചേക്കാനും സാധ്യതയുണ്ട്.
പുലർച്ചെ 3:15 ഓടെ ഒരു കുടുംബം സഞ്ചരിച്ചിരുന്ന മോട്ടോർ സൈക്കിളിലേക്ക് ഒരു ഡമ്പർ ട്രക്ക് ഇടിച്ചുകയറുകയായിരുന്നുവെന്ന് സെൻട്രൽ സീനിയർ പോലീസ് സൂപ്രണ്ട് (എസ്എസ്പി) സീഷാൻ ഷഫീഖ് സിദ്ദിഖി അറിയിച്ചു. ഈ അപകടത്തിൽ 22 വയസ്സുള്ള മഹ്നൂർ, അവരുടെ 14 വയസ്സുള്ള സഹോദരൻ അഹമ്മദ് റാസ എന്നിവർക്ക് ജീവൻ നഷ്ടപ്പെട്ടു. ഇവരുടെ 48 വയസ്സുള്ള പിതാവ് ഷാക്കിറിന് ഗുരുതരമായി പരിക്കേറ്റു. മഹ്നൂർ അടുത്തിടെ വിവാഹിതയാകാനിരിക്കുകയാണെന്ന് ബന്ധുക്കളെ ഉദ്ധരിച്ച് ഡോൺ റിപ്പോർട്ട് ചെയ്തു.
സംഭവത്തെത്തുടർന്ന്, സൊഹ്റാബ് ഗോത്തിന് സമീപമുള്ള റാഷിദ് മിൻഹാസ് റോഡും സൂപ്പർഹൈവേയും ഉപരോധിച്ച് ജനക്കൂട്ടം പ്രതിഷേധ പ്രകടനം നടത്തി. ഇത് കനത്ത ഗതാഗതക്കുരുക്കിന് കാരണമായി. “യൂസഫ് പ്ലാസ, ഫെഡറൽ ബി ഏരിയ പോലീസ് സ്റ്റേഷൻ പരിധികളിൽ റോഡിന്റെ ഇരുവശത്തുമുള്ള ആകെ ഏഴ് ഡമ്പറുകൾ ഒരു ജനക്കൂട്ടം ഒത്തുകൂടി കത്തിച്ചു,” എസ്എസ്പി സിദ്ദിഖി ഡോണിനോട് പറഞ്ഞു.
അപകടത്തിന് കാരണക്കാരനായ ഡ്രൈവറെ പോലീസ് സ്ഥലത്തുനിന്ന് കസ്റ്റഡിയിലെടുക്കുകയും ഡമ്പർ പിടിച്ചെടുക്കുകയും ചെയ്തു. പോലീസ് ഉടൻ തന്നെ പ്രദേശം വളയുകയും ഗതാഗത ക്രമീകരണങ്ങൾ ഏർപ്പെടുത്തുകയും ചെയ്തു. തീ അണയ്ക്കാൻ ഫയർ ടെൻഡറുകൾ വിളിച്ചുവരുത്തി.
14 പേർ അറസ്റ്റിൽ; ഡ്രൈവർമാർക്കും പരിക്ക്
“കൂടാതെ, ഡമ്പറുകൾ കത്തിച്ചതിന് 14 പ്രതികളെ പോലീസ് അറസ്റ്റ് ചെയ്തിട്ടുണ്ട്. വീഡിയോകളുടെയും സാങ്കേതിക തെളിവുകളുടെയും സഹായത്തോടെ കൂടുതൽ അറസ്റ്റുകൾ നടക്കുന്നുണ്ട്,” സിദ്ദിഖി കൂട്ടിച്ചേർത്തു.
മരിച്ച സഹോദരങ്ങളെ അബ്ബാസി ഷഹീദ് ആശുപത്രിയിൽ എത്തിച്ചതായും അവരുടെ പിതാവിന് പരിക്കേറ്റതായും പോലീസ് സർജൻ സമ്മയ്യ സയ്യിദ് ഡോണിനോട് പറഞ്ഞു. ജനക്കൂട്ടം മർദിച്ചതിനെ തുടർന്ന് ഗുരുതരമായി പരിക്കേറ്റ രണ്ട് ഡ്രൈവർമാരെയും പോലീസ് ആശുപത്രിയിൽ എത്തിച്ചു. അപകടത്തിൽപ്പെട്ടതായി ആരോപിക്കപ്പെടുന്ന ഡ്രൈവർക്ക് പരിക്കേറ്റിട്ടുണ്ടെങ്കിലും അത്ര ഗുരുതരമല്ലെന്ന് സയ്യിദ് പറഞ്ഞു. അതേസമയം, പൊള്ളലേറ്റ മറ്റൊരു ഡമ്പറിന്റെ ഡ്രൈവറുടെ തലയ്ക്ക് ഗുരുതരമായ പരിക്കുണ്ടെന്നും നില ഗുരുതരമാണെന്നും ഡോൺ റിപ്പോർട്ട് ചെയ്തു.
കറാച്ചിയിൽ വർദ്ധിക്കുന്ന റോഡപകടങ്ങൾ
കറാച്ചിയിൽ സമീപ മാസങ്ങളിൽ ഗതാഗത അപകടങ്ങൾ വർദ്ധിച്ചുവരുന്നതായി കണക്കുകൾ സൂചിപ്പിക്കുന്നു. പ്രത്യേകിച്ച് ഡമ്പറുകളും വാട്ടർ ടാങ്കറുകളും ഉൾപ്പെടെയുള്ള വലിയ വാഹനങ്ങൾ ഉൾപ്പെടുന്ന അപകടങ്ങൾ വലിയ തോതിൽ കൂടുന്നതായാണ് റിപ്പോർട്ടുകൾ. 2024-ൽ മാത്രം ഏകദേശം 500 പേർ കൊല്ലപ്പെടുകയും 4,879 പേർക്ക് പരിക്കേൽക്കുകയും ചെയ്തതായി ആശുപത്രി ഡാറ്റ പ്രകാരം ഡോൺ റിപ്പോർട്ട് ചെയ്യുന്നു. ഈ മാസം ആദ്യം, കറാച്ചിയിലെ ഡിഫൻസ് ഹൗസിംഗ് അതോറിറ്റിയിൽ (ഡിഎച്ച്എ) ഒരു അതിവേഗ ട്രെയിലർ ട്രക്ക് ഇടിച്ചുകയറി രണ്ട് പേർക്ക് പരിക്കേറ്റിരുന്നു. ജൂലൈയിൽ, കറാച്ചിയിലെ സൗദാബാദിൽ ഒരു ഡമ്പർ മോട്ടോർ സൈക്കിളിന് മുകളിലൂടെ ഇടിച്ചുകയറി 59 വയസ്സുള്ള ഒരു പാൽ വിതരണക്കാരൻ മരിച്ചിരുന്നു.
