മീററ്റ്: തന്റെ വിവാഹ ഘോഷയാത്രയ്ക്കിടെ ലഭിച്ച നോട്ടുമാല മോഷ്ടിച്ച കള്ളനെ സിനിമാ സ്റ്റൈലിൽ പിന്തുടർന്ന് പിടികൂടി വരൻ. നാട്ടിലെ ആചാര പ്രകാരം വരൻ കുതിരപ്പുറത്ത് കയറി വരുമ്പോഴായിരുന്നു മോഷണം നടന്നത്. ദേശീയപാതയിൽ വെച്ചാണ് സംഭവം. തുടർന്ന് വിവാഹ ചടങ്ങ് മാറ്റിവെച്ച് കള്ളന് പിന്നാലെ ഒരു നായകനെ പോലെ പോവുകയായിരുന്നു വരൻ. ഉത്തർപ്രദേശിലെ മീററ്റിലാണ് സംഭവം.
മിനി ട്രക്ക് ഡ്രൈവറാണ് വരന്റെ കഴുത്തിലുണ്ടായിരുന്ന നോട്ട് മാല തട്ടിപ്പറിച്ചെടുത്തത്. ദൃശ്യത്തിൽ ചാരനിറത്തിലുള്ള സ്യൂട്ടും ചുവന്ന തലപ്പാവും ധരിച്ച വരനെ കാണാം. മാല തട്ടിപ്പറിച്ചതോടെ വരൻ പിന്നെ ഒന്നും നോക്കിയില്ല. വിവാഹ വേഷത്തിൽത്തന്നെ അതുവഴി വന്ന ബൈക്കിൽ ചാടിക്കയറി ട്രക്ക് ഡ്രൈവറെ പിന്തുടർന്നു. തൊട്ടടുത്ത് എത്തിയതോടെ ബൈക്കിൽ നിന്ന് ചാടി, വരൻ മിനി ട്രക്കിലേക്ക് കയറാൻ ശ്രമിക്കുന്നത് വീഡിയോയിൽ കാണാം. വൈകാതെ ട്രക്കിലേക്ക് ചാടിക്കറി വാഹനം നിർത്തുകയും ചെയ്തു.
Also Read :ബംഗാൾ ഉൾക്കടലിൽ ചുഴലിക്കാറ്റിന് സാധ്യത?
ആളെ കിട്ടിയതോടെ വരൻ ഡ്രൈവറെ വാഹനത്തിൽ നിന്ന് ബലമായി പിടിച്ചിറക്കി മർദിച്ചു. ബൈക്ക് ഓടിച്ചയാളും മറ്റ് രണ്ട് പേരും മർദിക്കാൻ ഒപ്പം ചേർന്നു. ട്രക്ക് ഓടിക്കവേ അബദ്ധവശാൽ നോട്ട് മാല തന്റെ കയ്യിൽപ്പെടുകയായിരുന്നുവെന്നും മോഷ്ടിച്ചതല്ലെന്നും ഡ്രൈവർ പറഞ്ഞു. ഒപ്പം തന്നെ വെറുതെ വിടണമെന്നും അപേക്ഷിച്ചു. വീഡിയോ സോഷ്യൽ മീഡിയയിൽ വൈറലായെങ്കിലും സംഭവത്തിൽ ആരും ഇതുവരെ പൊലീസിൽ പരാതി പെട്ടിട്ടില്ല.