സഹാറയിലെ ഉരുക്കുപാത: ലോകത്തിലെ ഏറ്റവും ഭാരമേറിയതും അപകടം നിറഞ്ഞതുമായ ട്രെയിൻ യാത്ര!

നമ്മളിൽ പലർക്കും ട്രെയിൻ യാത്രയെന്നാൽ ശാന്തമായ കാഴ്ചകളും, ഇളം കാറ്റും, ഒരിടവേളയിൽ ചൂടുള്ള ചായയുമൊക്കെയാണ് ഓർമ്മയിൽ വരുന്നത്. എന്നാൽ ഇതിൽ നിന്നെല്ലാം ഏറെ വ്യത്യസ്തവും സാഹസികവുമാണ് മൗറിറ്റാനിയയിലെ ഇരുമ്പയിര് ട്രെയിൻ യാത്ര. മൂന്ന് കിലോമീറ്റർ വരെ നീളുന്ന ഈ ട്രെയിൻ ലോകത്തിലെ ഏറ്റവും ദൈർഘ്യമേറിയതും ഭാരമേറിയതും അപകടം നിറഞ്ഞതുമായ ഒന്നാണ്. ടൺ കണക്കിന് ഇരുമ്പയിരുമായി സഹാറ മരുഭൂമിയിലൂടെ ഈ ഉരുക്കുസഞ്ചാരി ദിനരാത്രി സഞ്ചരിക്കുന്നു.

സഹാറയുടെ ഹൃദയത്തിലൂടെ ഒരു യാത്ര

പശ്ചിമാഫ്രിക്കയിലെ വിശാലമായ മൗറിറ്റാനിയ ഇരുമ്പയിരിന്റെ വലിയ ശേഖരത്തിന് പേരുകേട്ട രാജ്യമാണ്. നാഗരികതയിൽ നിന്നകലെ സഹാറ മരുഭൂമിയിലാണ് ഈ ഖനികൾ സ്ഥിതി ചെയ്യുന്നത്. ധാതു ഖനനം ചെയ്യുന്ന സൂറാത്ത് പട്ടണത്തിൽ നിന്ന് അറ്റ്ലാന്റിക് തീരത്തിലെ നൗദിബൗ തുറമുഖത്തേക്ക് ഇരുമ്പയിര് എത്തിക്കാൻ നിർമ്മിച്ച ഈ ട്രെയിൻ പിന്നീട് ഒരു ഇതിഹാസമായി മാറുകയായിരുന്നു. ഏകദേശം 704 കിലോമീറ്റർ മരുഭൂമിയിലൂടെ 14 മണിക്കൂറാണ് ഈ യാത്രയുടെ ദൈർഘ്യം. അനന്തമായ മണൽക്കൂനകളും, ചുട്ടുപൊള്ളുന്ന സമതലങ്ങളും, കാറ്റുവീശുന്ന മരുഭൂമിയും ഈ യാത്രയിൽ കാണാം.

Also Read: യുക്രെയ്ന്‍ സമാധാന ചര്‍ച്ചകളില്‍ നിന്ന് മാര്‍ക്കോ റൂബിയോ പിന്‍മാറിയത് എന്തുകൊണ്ട്?

200 വാഗണുകൾ, വിശ്രമമില്ല, സൗകര്യങ്ങളില്ല

സാധാരണ ട്രെയിനുകളിൽ നിന്ന് ഏറെ വ്യത്യസ്തമാണിത്. ഇവിടെ കമ്പാർട്ടുമെന്റുകളോ, സീറ്റുകളോ, മേൽക്കൂരയോ ഇല്ല. 84 ടൺ ഇരുമ്പയിര് വീതം നിറച്ച 200-ൽ അധികം തുറന്ന വാഗണുകളാണ് ഈ ട്രെയിനിനുള്ളത്. നാട്ടുകാർ ഇതിനെ മരുഭൂമിയുടെ ട്രെയിൻ എന്ന് വിളിക്കുന്നു. കഠിനമായ സാഹചര്യങ്ങളിലും ചില മൗറിറ്റാനിയക്കാർ സൗജന്യമായി യാത്ര ചെയ്യാൻ ഈ ട്രെയിനിനെ ആശ്രയിക്കുന്നു. ടിക്കറ്റില്ല, ഇരിക്കാൻ പ്രത്യേക സ്ഥലമില്ല. ചുട്ടുപൊള്ളുന്ന വെയിലിൽ നിന്നും, മണൽക്കാറ്റിൽ നിന്നും രക്ഷനേടാൻ സ്കാർഫുകൾ ധരിച്ച് അവർ ഇരുമ്പയിരിന് മുകളിൽ ഇരിക്കുന്നു. യാത്രാമധ്യേ സ്റ്റേഷനുകളോ, ഭക്ഷണമോ, വെള്ളമോ ലഭ്യമല്ല. എന്തെങ്കിലും അപകടം സംഭവിച്ചാൽ സഹായം ലഭിക്കാനും സാധ്യത കുറവാണ്. എന്നിരുന്നാലും, മൗറിറ്റാനിയയുടെ ചില ഭാഗങ്ങളിലെ ദീർഘദൂര യാത്രയ്ക്ക് താങ്ങാനാവുന്ന ഏക മാർഗ്ഗമാണിത്.

അപകടം നിറഞ്ഞ യാത്ര

പടിഞ്ഞാറൻ സഹാറയുടെ അതിർത്തിയിലുള്ള സൂറാത്ത് പട്ടണത്തിൽ നിന്നാണ് ഈ യാത്ര ആരംഭിക്കുന്നത്. അൽ-ഖ്വയ്ദ പോലുള്ള തീവ്രവാദ ഗ്രൂപ്പുകളുടെ സാന്നിധ്യമുള്ള അപകടകരമായ ഒരു പ്രദേശം കൂടിയാണിത്. താരതമ്യേന സുരക്ഷിതമായ സ്ഥലം ചൗം പട്ടണമാണെങ്കിലും അവിടെയെത്തിയാലും അതിൽ യാത്ര ചെയ്യുന്നവർ സുരക്ഷിതമല്ല. എന്തെങ്കിലും സംഭവിച്ചാൽ രക്ഷാപ്രവർത്തനത്തിനുള്ള സാധ്യത വളരെ കുറവാണ്. വേനൽക്കാലത്ത് താപനില 50°C-ൽ അധികം ഉയരും, എപ്പോൾ വേണമെങ്കിലും മണൽക്കാറ്റുകൾ വീശിയടിക്കാം. എന്നിരുന്നാലും, മറ്റൊരു ഗ്രഹം പോലെ തോന്നിക്കുന്ന മനോഹരമായ ഭൂപ്രകൃതിയിലൂടെ ഈ ട്രെയിൻ ദിവസവും മുന്നോട്ട് പോകുന്നു.

ഒരു ചരിത്ര യാത്ര

മൗറിറ്റാനിയയിലെ ഈ ഇരുമ്പയിര് ട്രെയിൻ 1963 മുതൽ സർവീസ് നടത്തുന്നു. മനുഷ്യ യാത്രക്കാർക്ക് വേണ്ടിയല്ല ഇത് നിർമ്മിച്ചതെങ്കിലും, ഭൂമിയിലെ ഏറ്റവും ദുഷ്കരമായ ഭൂപ്രദേശങ്ങളിലൊന്നിലൂടെ ഇരുമ്പയിര് കൊണ്ടുപോകുന്നതിൽ ഈ ട്രെയിൻ ഒരു പ്രധാന പങ്ക് വഹിക്കുന്നു. ഇന്ന്, ആയിരക്കണക്കിന് ടൺ ലോഹത്തിന്റെ ഭാരവുമായി രണ്ടോ അതിലധികമോ ശക്തമായ എഞ്ചിനുകളാണ് ഈ ട്രെയിനിനെ വലിക്കുന്നത്. ഓരോ ദിവസവും ഈ ഉരുക്കുസഞ്ചാരി സഹാറ മരുഭൂമിയിലൂടെ തൻ്റെ ഇതിഹാസ യാത്ര തുടരുന്നു.