കൊല്ലം: കടയ്ക്കലില്‍ ഭാര്യയെ ഭര്‍ത്താവ് കുത്തി പരിക്കേല്‍പ്പിച്ചു. കുന്നുംപുറം സ്വദേശി തസ്‌നിയെയാണ് ഭര്‍ത്താവ് റിയാസ് ആക്രമിച്ചത്. വര്‍ഷങ്ങളായി തസ്‌നി ഭര്‍ത്താവ് റിയാസുമായി പിണങ്ങി കഴിയുകയാണ്. കുടുംബ പ്രശ്‌നങ്ങളുടെ പേരില്‍ ഇരുവരും തമ്മില്‍ വഴക്ക് പതിവായിരുന്നു. ഇന്നലെ രാത്രി തസ്‌നിയുടെ വീട്ടില്‍ റിയാസ് എത്തി. പല കാര്യങ്ങള്‍ പറഞ്ഞ് ഇരുവരും തമ്മില്‍ തര്‍ക്കമുണ്ടായി. ഇതിനിടെ റിയാസ് ഭാര്യയെ കത്തി കൊണ്ട് ആക്രമിക്കുകയായിരുന്നു. തസ്‌നിയുടെ കൈക്കും വയറിനുമാണ് കുത്തേറ്റത്.
Also Read: മുംബൈയിൽ നിന്ന് പിടികൂടിയത് 200 കോടിയുടെ മയക്കുമരുന്ന്
അക്രമണം തടയാനുള്ള ശ്രമത്തിനിടെ സമീപത്തുണ്ടായിരുന്ന തടി കഷ്ണം കൊണ്ട് തസ്‌നി റിയാസിനെ അടിച്ചു. സംഭവം അറിഞ്ഞെത്തിയ കടയ്ക്കല്‍ പൊലീസ് പരിക്കേറ്റ ഇരുവരെയും ആശുപത്രിയില്‍ പ്രവേശിപ്പിച്ചു. തസ്‌നി ഗുരുതര പരിക്കുകളോടെ ചികിത്സയില്‍ തുടരുകയാണ്. പ്രതിയായ റിയാസിനെ പ്രാഥമിക ചിത്സയ്ക്ക് ശേഷം പൊലീസ് കസ്റ്റഡില്‍ എടുത്തു. വധശ്രമം ഉള്‍പ്പടെയുള്ള വകുപ്പുകള്‍ ചുമത്തിയാണ് അറസ്റ്റ് രേഖപ്പെടുത്തിയത്. ഇയാള്‍ നിരവധി ക്രിമിനല്‍ കേസുകളില്‍ പ്രതിയാണെന്നും കടയ്ക്കല്‍ പൊലീസ് അറിയിച്ചു.
