ഷാര്‍ജ: ബഹുനില കെട്ടിടത്തിന്‍റെ മുകളില്‍ നിന്ന് വീണ് പ്രവാസിക്ക് ദാരുണാന്ത്യം. ഷാര്‍ജയിലെ അല്‍ താവുന്‍ പ്രദേശത്താണ് സംഭവം. 44 വയസ്സുള്ള സിറിയക്കാരനാണ് മരിച്ചത്. അതുവഴി കടന്നുപോയ വഴിയാത്രികരാണ് രക്തത്തില്‍ കുളിച്ച നിലയില്‍ മൃതദേഹം കണ്ടെത്തിയത്. ഇവര്‍ എമര്‍ജന്‍സി സര്‍വീസുകളെ വിവരം അറിയിച്ചു. തുടര്‍ന്ന് പൊലീസും സിഐഡി വിഭാഗവും നാഷണല്‍ ആംബുലന്‍സ് സംഘവും സ്ഥലത്തെത്തി. അധികൃതര്‍ മരണം സ്ഥിരീകരിച്ചു.
തുടര്‍ന്ന് പ്രവാസിയുടെ മൃതദേഹം 11.30ഓടെ ആശുപത്രിയിലേക്കും പിന്നീട് പോസ്റ്റ്മോര്‍ട്ടം ചെയ്യുന്നതിനായി ഫോറന്‍സിക് ലാബിലേക്കും മാറ്റി. പ്രവാസി താഴേക്ക് വീണതെങ്ങനെയാണെന്ന കാര്യത്തില്‍ വ്യക്തതയില്ല. കാരണം കണ്ടെത്താൻ അധികൃതര്‍ അന്വേഷണം ആരംഭിച്ചു. ആത്മഹത്യ ആണോയെന്നും അന്വേഷിക്കുമെന്നും അധികൃതര്‍ പറഞ്ഞു.
