യെസ്ഡി മോട്ടോർസൈക്കിളുകളുടെ പ്രതാപകാലത്തെ ഓർമ്മിപ്പിച്ചുകൊണ്ട് ക്ലാസിക് ലെജൻഡ്സ് റോഡ്സ്റ്ററിന്റെ പുതിയ പ്രത്യേക പതിപ്പായ ‘റെഡ് വുൾഫ്’ ഇന്ത്യൻ വിപണിയിൽ അവതരിപ്പിച്ചു. 2.10 ലക്ഷം രൂപ വിലയിട്ടിരിക്കുന്ന ഈ പതിപ്പ് 1970-കളിലെ ക്ലാസിക് യെസ്ഡി മോഡലുകളിൽ നിന്ന് പ്രചോദനം ഉൾക്കൊണ്ടാണ് രൂപകൽപ്പന ചെയ്തിരിക്കുന്നത്. കടും ചുവപ്പ് നിറത്തിനൊപ്പം എഞ്ചിൻ, എക്സ്ഹോസ്റ്റ്, ഹാൻഡിൽബാർ എന്നിവയിൽ നൽകിയിരിക്കുന്ന ക്രോം ഫിനിഷ് മോട്ടോർസൈക്കിളിന് ആകർഷകമായ ലുക്ക് നൽകുന്നു. ശില്പരൂപത്തിലുള്ള ഇന്ധന ടാങ്കും ബോബർ സ്റ്റൈൽ ടെയിൽ സെക്ഷനും ബ്രൗൺ സീറ്റും ഈ മോഡലിന്റെ പ്രത്യേകതയാണ്.
മെക്കാനിക്കൽ ഫീച്ചറുകളിൽ വലിയ മാറ്റങ്ങളില്ലാതെ എത്തുന്ന റെഡ് വുൾഫ് പതിപ്പിന് കരുത്തേകുന്നത് അതേ 334 സിസി ആൽഫ2 ലിക്വിഡ്-കൂൾഡ് എഞ്ചിനാണ്. ഇത് 29 bhp പവറും 29.8 Nm ടോർക്കും ഉത്പാദിപ്പിക്കുന്നു. ആറ് സ്പീഡ് ഗിയർബോക്സിനൊപ്പം സുഗമമായ യാത്രയ്ക്കായി അസിസ്റ്റ് ആൻഡ് സ്ലിപ്പർ ക്ലച്ചും ഉൾപ്പെടുത്തിയിട്ടുണ്ട്. സുരക്ഷയ്ക്കായി ഡ്യുവൽ ചാനൽ എബിഎസോട് കൂടിയ 320 mm ഫ്രണ്ട് ഡിസ്ക് ബ്രേക്കുകളും 240 mm റിയർ ഡിസ്കും ഈ മോട്ടോർസൈക്കിളിനുണ്ട്.
Also Read: തുടർച്ചയായ അപകടങ്ങൾ; സുരക്ഷാ വിവാദത്തിൽ ഷവോമി ഇലക്ട്രിക് കാറുകൾ
ദൂരയാത്രകൾക്ക് അനുയോജ്യമായ വിധത്തിലാണ് ഇതിന്റെ രൂപകൽപ്പന. 12.5 ലിറ്റർ ഇന്ധന ടാങ്ക് ശേഷിയുള്ള ബൈക്കിന് 350 കിലോമീറ്ററിലധികം റൈഡിംഗ് റേഞ്ച് കമ്പനി അവകാശപ്പെടുന്നു. റൈഡർക്ക് മികച്ച യാത്രാസുഖം നൽകുന്ന ടെലിസ്കോപ്പിക് ഫ്രണ്ട് ഫോർക്കുകളും ഡ്യുവൽ റിയർ ഷോക്ക് അബ്സോർബറുകളുമാണ് ഇതിലുള്ളത്. 795 mm സീറ്റ് ഉയരവും 171 mm ഗ്രൗണ്ട് ക്ലിയറൻസും സെന്റർ-ഫോർവേഡ് ഫുട്പെഗുകളും കൂടുതൽ വിശ്രമകരമായ റൈഡിംഗ് പൊസിഷൻ ഉറപ്പാക്കുന്നു.
