ഡി.ആർ.കോംഗോയിൽ ഔദ്യോഗിക പ്രഖ്യാപനത്തിന് മാസങ്ങൾക്ക് മുൻപ് തന്നെ എബോള പടർന്നുതുടങ്ങിയിരുന്നുവെന്ന് ലോകാരോഗ്യ സംഘടന വ്യക്തമാക്കി. മെയ് പകുതിയോടെ രോഗവ്യാപനം ഔദ്യോഗികമായി പ്രഖ്യാപിച്ചെങ്കിലും, ഫെബ്രുവരിയോടെ തന്നെ രോഗം പടർന്നിരുന്നു എന്നാണ് പിന്നീട് കണ്ടെത്തിയത്. ആദ്യകാല കേസുകൾ മലേറിയയും ടൈഫോയ്ഡും ആണെന്ന് തെറ്റിദ്ധരിച്ചതാണ് വൈറസ് വ്യാപനം വേഗത്തിലാകാൻ കാരണമായതെന്ന് ആഫ്രിക്കയിലെ ലോകാരോഗ്യ സംഘടനയുടെ റീജിയണൽ ഡയറക്ടർ ഡോ. മൊഹമ്മദ് യാക്കൂബ് ജനാബി പറഞ്ഞു.
ഏറ്റവും പുതിയ കണക്കുകൾ പ്രകാരം എബോള കേസുകളുടെ എണ്ണം 4,200 കവിഞ്ഞിട്ടുണ്ട്. ഇതിൽ 1,900-ലധികം മരണങ്ങളും ഉൾപ്പെടുന്നു. എബോള വായുവിലൂടെ പകരുന്നതല്ല എന്നതിനാൽ ഇത് ആഗോളതലത്തിൽ വ്യാപിക്കാനുള്ള സാധ്യത കുറവാണെന്നാണ് ലോകാരോഗ്യ സംഘടന വിലയിരുത്തുന്നത്. രോഗബാധിത പ്രദേശത്തിന് പുറത്ത് കണ്ടെത്തിയ കേസുകൾ വേഗത്തിൽ തിരിച്ചറിയാനും തുടർവ്യാപനത്തിന് ഇടയാക്കാതെ നിയന്ത്രിക്കാനും കഴിഞ്ഞിട്ടുണ്ടെന്നും അധികൃതർ അറിയിച്ചു.
ചരിത്രത്തിലെ രണ്ടാമത്തെ വലിയ എബോള വ്യാപനമാണ് നിലവിലുളളത്. മുൻകാല വ്യാപനങ്ങളിൽ നിന്ന് വ്യത്യസ്തമായി വേഗത്തിൽ പടരുന്ന ബൂൻഡിബുഗ്യോ വകഭേദത്തിന് അംഗീകൃത വാക്സിനുകളോ ചികിത്സകളോ നിലവിലില്ല. കിഴക്കൻ പ്രവിശ്യയായ ഇത്തൂരിയിലാണ് രോഗവ്യാപനം കൂടുതലുള്ളത്. റിപ്പോർട്ട് ചെയ്ത കേസുകളിൽ ഏകദേശം 90 ശതമാനവും ഇവിടെ നിന്നാണ്. നിരീക്ഷണത്തിലുള്ളവരുമായുള്ള സമ്പർക്കത്തിന് പുറത്താണ് പുതിയ കേസുകളിൽ 60% മുതൽ 70% വരെ റിപ്പോർട്ട് ചെയ്യപ്പെടുന്നതെന്നും അധികൃതർ ചൂണ്ടിക്കാട്ടുന്നു.
വൈറസ് ബാധയായ എബോള, രോഗബാധിതരുടെയോ രോഗംമൂലം മരിച്ചവരുടെയോ രക്തം, വിസർജ്യം, മറ്റ് സ്രവങ്ങൾ എന്നിവയിലൂടെയാണ് പകരുന്നത്. കുരങ്ങുകൾ, മാനുകൾ, പന്നികൾ തുടങ്ങിയ മൃഗങ്ങളിലും രോഗം കാണപ്പെടുന്നുണ്ട്. രോഗം ബാധിച്ച മൃഗങ്ങളുടെ വിസർജ്യങ്ങളിലൂടെയോ അവയുടെ മാംസം ഭക്ഷിക്കുന്നതിലൂടെയോ രോഗം മനുഷ്യരിലേയ്ക്ക് വ്യാപിക്കാം. ശരിയായി പാകപ്പെടുത്തിയ മാംസം മാത്രം കഴിക്കുന്നത് വഴി ജന്തുജന്യമായ ഈ രോഗസാധ്യത ഒഴിവാക്കാൻ സാധിക്കും.
ശരീരത്തിൽ വൈറസ് പ്രവേശിച്ച് രണ്ട് മുതൽ 21 ദിവസത്തിനുള്ളിൽ രോഗലക്ഷണങ്ങൾ പ്രകടമാകും. പനി, തലവേദന, പേശിവേദന, തൊണ്ടവേദന, ഛർദ്ദി, തൊലിയിലെ തിണർപ്പ് എന്നിവയാണ് പ്രധാന ലക്ഷണങ്ങൾ. ചിലരിൽ രോഗം വന്ന് അഞ്ച് മുതൽ ഏഴ് ദിവസങ്ങൾക്കുള്ളിൽ ഗുരുതരമായ രക്തസ്രാവം ഉണ്ടാകാം. ഇത് കരൾ, വൃക്ക തുടങ്ങിയ അവയവങ്ങളുടെ തകരാറിനും മരണത്തിനും കാരണമാകാറുണ്ട്. 2014-2016 കാലഘട്ടത്തിലെ വ്യാപനത്തെ അപേക്ഷിച്ച് വളരെ വേഗത്തിലാണ് നിലവിലെ രോഗവ്യാപനം മുന്നേറുന്നത്.
രോഗത്തെ പ്രതിരോധിക്കുക എന്നതാണ് ഏറ്റവും ഫലപ്രദമായ മാർഗം. വായു, വെള്ളം, മറ്റ് ഭക്ഷ്യവസ്തുക്കൾ എന്നിവവഴി രോഗം പകരാത്തതിനാൽ കൃത്യമായ മുൻകരുതലുകളിലൂടെ രോഗവ്യാപനം തടയാൻ കഴിയും. രോഗബാധിതരുമായോ അവരുടെ സ്രവങ്ങളുമായോ ഉള്ള സമ്പർക്കം ഒഴിവാക്കുക, രോഗബാധ കണ്ടെത്തിയവരെ ഉടൻ തന്നെ ഐസോലേഷൻ വിഭാഗത്തിലേക്ക് മാറ്റുക, എത്രയും പെട്ടെന്ന് സപ്പോർട്ടീവ് ചികിത്സ ലഭ്യമാക്കുക എന്നിവയാണ് പ്രധാന പ്രതിരോധ നടപടികൾ.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (AI SOURCES)
