കൊച്ചി: എറണാകുളം കോലഞ്ചേരിയിൽ കാറുകൾ തമ്മിൽ കൂട്ടയിടിച്ച അപകടത്തിൽ 8 പേർക്ക് പരിക്കേറ്റു. കാറിലുണ്ടായിരുന്ന ആറ് മാസം പ്രായമായ കുട്ടിയ്ക്കും അപകടത്തിൽ പരിക്കേറ്റു. ഇന്ന് പുലര്ച്ചെയാണ് ദാരുണമായ അപകടമുണ്ടായത്. മൂവാറ്റുപുഴ ഭാഗത്ത് നിന്നും വരികയായിരുന്ന ടോയോട്ട ഇറ്റിയോസ് കാർ വലതുവശത്തേയ്ക്ക് തിരിയുകയും ഇതിനിടയിൽ എതിര് ദിശയിൽ നിന്ന് വന്ന ഫോര്ച്യൂണര് കാര് ഇതിൽ തട്ടി മറിയുകയുമായിരുന്നു.
ഇതിന് പിന്നാലെ നിയന്ത്രണം വിട്ട് മറിഞ്ഞ ഫോര്ച്യൂണര് കാര് എതിര്ദിശയിൽ വന്ന ബൈക്ക് യാത്രക്കാരനെ ഇടിച്ച് തെറിപ്പിക്കുകയും ചെയ്തു. അപകടത്തിന്റെ സിസിടിവി ദൃശ്യങ്ങൾ പുറത്തു വന്നു. കാറുകള് വേഗതയിലായിരുന്നുവെന്ന് ദൃശ്യങ്ങളിൽ വ്യക്തമാണ്. ഇടിയുടെ ആഘാതത്തിൽ യുവാവ് ബൈക്കിൽ നിന്ന് റോഡരികിലുള്ള കടയ്ക്ക് മുന്നിലേക്ക് തെറിച്ചുവീണു.