ചെന്നൈ: ഐപിഎല്ലിൽ ചെന്നൈ സൂപ്പർ കിങ്സിനായി മിന്നും പ്രകടനം തുടരുന്ന മലയാളി താരം സഞ്ജു സാംസണ് ഫിറ്റ്നസ് കാര്യത്തിൽ നിർണ്ണായക ഉപദേശവുമായി മുൻ ഇന്ത്യൻ താരം സഞ്ജയ് മഞ്ജരേക്കർ രംഗത്ത്. ക്രിക്കറ്റിൽ ദീർഘകാലം നിലനിൽക്കണമെന്നും കരിയറിൽ കൂടുതൽ നേട്ടങ്ങൾ സ്വന്തമാക്കണമെന്നും ആഗ്രഹമുണ്ടെങ്കിൽ സഞ്ജു തന്റെ ഫിറ്റ്നസിൽ വിട്ടുവീഴ്ചയില്ലാത്ത മാറ്റങ്ങൾ വരുത്തണമെന്ന് മഞ്ജരേക്കർ പറഞ്ഞു. ഇതിനായി വിരാട് കോഹ്ലിയുടെ സഹായം തേടാനോ അദ്ദേഹത്തിന്റെ ശൈലി പിന്തുടരാനോ ആണ് മഞ്ജരേക്കർ നിർദ്ദേശിക്കുന്നത്.
ഈ സീസണിൽ പത്ത് മത്സരങ്ങളിൽ നിന്ന് രണ്ട് സെഞ്ച്വറികളടക്കം 402 റൺസ് നേടി മികച്ച ഫോമിലാണ് സഞ്ജു. എന്നാൽ പ്രായം കൂടുന്തോറും ഈ മികവ് നിലനിർത്താൻ ശാരീരികക്ഷമത അനിവാര്യമാണെന്ന് മഞ്ജരേക്കർ ഓർമ്മിപ്പിച്ചു. വിരാട് കോഹ്ലി തന്റെ കരിയറിൽ ഇത്രയും കാലം ഒരേ മികവ് തുടരുന്നത് ഫിറ്റ്നസിന് നൽകുന്ന അമിത പ്രാധാന്യം കൊണ്ടാണെന്നും, സ്വന്തം ശരീരം കാരണം പ്രകടനം മോശമാകാതിരിക്കാൻ അദ്ദേഹം ശ്രദ്ധിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
Also Read:ഓറഞ്ച് ആർമിയുടെ തേരോട്ടം; ഇത്തവണ ലക്ഷ്യം കിരീടം മാത്രം!
ചെന്നൈ ടീമിന്റെ ഓപ്പണർ എന്നതിനൊപ്പം വിക്കറ്റ് കീപ്പർ കൂടിയായ സഞ്ജുവിന് ഫിറ്റ്നസ് നിലനിർത്തേണ്ടത് ഇരട്ടി ഉത്തരവാദിത്തമാണെന്നും മഞ്ജരേക്കർ കൂട്ടിിച്ചേർത്തു. മുംബൈയ്ക്കും ഡൽഹിക്കുമെതിരെ സെഞ്ച്വറികൾ നേടി ടീമിനെ വിജയത്തിലേക്ക് നയിക്കുന്ന സഞ്ജുവിന്റെ ബാറ്റിംഗ് മികവിനെ പുകഴ്ത്തുമ്പോഴും കരിയറിന്റെ ഭാവി സുരക്ഷിതമാക്കാൻ ഫിറ്റ്നസ് മാത്രമാണ് വഴിയെന്നാണ് മുൻ താരത്തിന്റെ പക്ഷം.
