ഇറാനും സ്വീഡനും തമ്മിലുള്ള നയതന്ത്ര ബന്ധത്തിൽ പുതിയ പ്രതിസന്ധി. ഇറാൻ എംബസിയിലെ ഒരു ഉദ്യോഗസ്ഥനെ സ്വീഡൻ പുറത്താക്കുകയും ഇറാൻ അംബാസഡറെ വിളിച്ചുവരുത്തുകയും ചെയ്തു. വിയന്ന കൺവെൻഷൻ ഓൺ ഡിപ്ലോമാറ്റിക് റിലേഷൻസിന് വിരുദ്ധമായ പ്രവർത്തനങ്ങളാണ് ഉദ്യോഗസ്ഥൻ നടത്തിയതെന്നാണ് സ്വീഡന്റെ വിശദീകരണം. രാജ്യത്തെ പൗരന്മാരെയും മറ്റ് സ്വീഡിഷ് താൽപര്യങ്ങളെയും സംരക്ഷിക്കുന്നതിന്റെ ഭാഗമായാണ് നടപടിയെന്ന് വിദേശകാര്യ മന്ത്രി മരിയ മാൽമർ സ്റ്റെനർഗാർഡ് അറിയിച്ചു.
സ്വീഡിഷ് അധികൃതരുടെ ആരോപണം ഇറാന്റെ പ്രവർത്തനങ്ങൾ രാജ്യത്തെ സുരക്ഷയ്ക്ക് ഭീഷണിയാകുന്നുവെന്നാണ്. ഇറാൻ ദീർഘകാലമായി സ്വീഡനിലെ ഇറാൻ ഭരണകൂടത്തിന്റെ എതിരാളികളെയും ജൂത, ഇസ്രയേൽ താൽപര്യങ്ങളെയും ലക്ഷ്യമിട്ട് പ്രവർത്തനങ്ങൾ നടത്തിയതായി നീതിന്യായ മന്ത്രി ഗുന്നർ സ്ട്രോമർ ആരോപിച്ചു. ഇത്തരം പ്രവർത്തനങ്ങൾക്ക് ക്രിമിനൽ നെറ്റ്‌വർക്കുകളെ ഉപയോഗിച്ചതായും അദ്ദേഹം പറഞ്ഞു. അതേസമയം, സ്വീഡിഷ് സുരക്ഷാ ഏജൻസിയായ സാപോ മുമ്പ് ഇറാൻ ക്രിമിനൽ സംഘാംഗങ്ങളെ റിക്രൂട്ട് ചെയ്ത് ഇസ്രയേൽ താൽപര്യങ്ങൾക്കും മറ്റുള്ളവർക്കുമെതിരെ ആക്രമണങ്ങളും അക്രമപ്രവർത്തനങ്ങളും നടത്താൻ ശ്രമിച്ചതായി ആരോപിച്ചിരുന്നു. ഈ ആരോപണങ്ങൾ ഇറാൻ നിഷേധിച്ചിട്ടുണ്ട്.
ALSO READ: 2000 കടന്നാൽ ഇനി ചാർജ്, 75,000 രൂപയ്ക്ക് മുകളിൽ പരമാവധി 300 രൂപ..! പുതിയ യുപിഐ നിയമം ഒക്ടോബർ 15 മുതൽ
സ്വീഡനിൽ ഇസ്രയേൽ താൽപര്യങ്ങൾ ലക്ഷ്യമിട്ടുള്ള നിരവധി സംഭവങ്ങൾ ഉണ്ടായിട്ടുണ്ടെന്നും റിപ്പോർട്ടുകൾ പറയുന്നു. 2024 ജൂണിൽ ഗോത്തൻബർഗിലെ ഇസ്രയേൽ സൈനിക സാങ്കേതികവിദ്യാ കമ്പനിയായ എൽബിറ്റ് സിസ്റ്റംസിന്റെ ഓഫീസിന് പുറത്ത് പ്ലാസ്റ്റിക് സ്‌ഫോടക വസ്തുക്കൾ നിറച്ച രണ്ട് ഇൻസുലേറ്റഡ് ഫ്ലാസ്കുകൾ കണ്ടെത്തിയിരുന്നു. തുടർന്ന് അതേ സ്ഥാപനത്തിന്റെ ഓഫീസിന്റെ പ്രവേശന കവാടത്തിൽ 13 വയസ്സുകാരൻ വെടിയുതിർക്കുകയും ചെയ്തു. ആക്രമണത്തിനായി കുട്ടിയെ റിക്രൂട്ട് ചെയ്ത നാല് കൗമാരക്കാർക്ക് 2025 ഏപ്രിലിൽ തടവുശിക്ഷ ലഭിച്ചു. 2025 മേയിൽ സ്വീഡനിലെ ഇസ്രയേൽ എംബസിക്ക് പുറത്തും വെടിയൊച്ചകൾ ഉണ്ടായതിനെ തുടർന്ന് ഇസ്രയേൽ താൽപര്യങ്ങൾക്കും ജൂത സമൂഹ സ്ഥാപനങ്ങൾക്കും ചുറ്റുമുള്ള സുരക്ഷ ശക്തമാക്കിയിരുന്നു.
ഇതോടെയാണ് പുതിയ നയതന്ത്ര നടപടി സ്വീഡൻ-ഇറാൻ ബന്ധത്തിൽ കൂടുതൽ ശ്രദ്ധ നേടുന്നത്. എന്നാൽ ഉദ്യോഗസ്ഥനെ പുറത്താക്കാൻ കാരണമായ പ്രത്യേക പ്രവർത്തനങ്ങളുടെ വിശദാംശങ്ങൾ സ്വീഡൻ പുറത്തുവിട്ടിട്ടില്ല. സ്വീഡിഷ് സുരക്ഷാ ഏജൻസിയും നിലവിലെ നടപടിക്ക് പിന്നിലെ രഹസ്യാന്വേഷണ വിവരങ്ങൾ വിശദീകരിക്കാൻ കഴിയില്ലെന്ന് വ്യക്തമാക്കിയിട്ടുണ്ട്. ഇറാന്റെ സ്വീഡനിലെ പ്രവർത്തനങ്ങളെക്കുറിച്ചുള്ള സുരക്ഷാ ആശങ്കകൾക്കിടെയാണ് സ്റ്റോക്ക്ഹോം ഇപ്പോൾ കടുത്ത നയതന്ത്ര നടപടി സ്വീകരിച്ചിരിക്കുന്നത്.
