സുസുക്കി ജിംനിയുടെ ചരിത്രത്തിലെ തന്നെ ഏറ്റവും വിലയേറിയ പതിപ്പായ ‘റൈനോ സ്പെഷ്യൽ എഡിഷൻ’ ഓസ്ട്രേലിയൻ വിപണിയിൽ അവതരിപ്പിച്ചു. അഞ്ച് ഡോറുകളുള്ള ജിംനി എക്സ്എൽ അടിസ്ഥാനമാക്കി പുറത്തിറക്കിയ ഈ ലിമിറ്റഡ് എഡിഷൻ മോഡലിന് തനതായ ഡിസൈൻ ശൈലിയും പ്രത്യേക ആക്സസറികളും ഒരുക്കിയിട്ടുണ്ട്. മനോഹരമായ ‘കൈനറ്റിക് യെല്ലോ’ ബോഡി കളറിലും ‘പേൾ ബ്ലാക്ക്’ റൂഫിലുമാണ് ഈ വാഹനം എത്തുന്നത്.
പുതിയ 15-ഇഞ്ച് ഡയമണ്ട് കട്ട് അലോയ് വീലുകൾ, റൈനോ ഗ്രാഫിക്സ്, ബ്ലാക്ക് ഹെക്സ് ഗ്രിൽ, അലുമിനിയം സ്കിഡ് പ്ലേറ്റുകൾ എന്നിവ വാഹനത്തിന് കൂടുതൽ ആകർഷണീയമായ രൂപം നൽകുന്നു. ഉൾവശത്ത് റൈനോ ബേഡ്ജുകളും പ്രത്യേക തയ്യലുകളോട് കൂടിയ ലെതർ ഇൻസേർട്ടുകളും നൽകിയിട്ടുണ്ട്. പയനിയർ സ്പീക്കറുകൾ, എട്ട് നിറങ്ങളിൽ ലഭ്യമായ ഫൂട്ട്വെൽ ലൈറ്റിംഗ്, റഗഡ് ലഗേജ് മാറ്റ് എന്നിവയാണ് ഇന്റീരിയറിലെ മറ്റ് പ്രത്യേകതകൾ.
Also Read: കോഴിക്കോട് ലൈറ്റ് മെട്രോയ്ക്ക് പുതുജീവൻ; നിർമ്മാണത്തിലേക്ക് വഴിതുറന്ന് സർക്കാരിന്റെ പുതിയ നീക്കം
ഈ വാഹനത്തിന്റെ പ്രധാന ആകർഷണം അതിനോടൊപ്പം ലഭിക്കുന്ന ‘റൈനോ ഗോ പാക്ക്’ ആണ്. ഇതിൽ ബ്രാൻഡഡ് കീചെയിൻ, ബക്കറ്റ് ഹാറ്റ്, പോർട്ടബിൾ ലാൻ്റൺ, ബ്ലൂടൂത്ത് സ്പീക്കർ, കൂളർ ബോക്സ്, തെർമോസ് ടംബ്ലർ തുടങ്ങിയ നിരവധി യാത്രാ സൗകര്യങ്ങൾ ഉൾപ്പെടുന്നു. ഇതിനെല്ലാം പുറമേ, കൊക്കോ ബ്ലാക്കിന്റെ ഒമ്പത് പീസുകളുള്ള ഡാർക്ക് ചോക്ലേറ്റ് പിസ്ത പ്രാളിനുകളും ഇതിനൊപ്പം ലഭിക്കും.
സാങ്കേതികമായി സാധാരണ ജിംനി എക്സ്എല്ലിൽ നിന്ന് മാറ്റങ്ങളൊന്നുമില്ല. 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എൻജിൻ തന്നെയാണ് ഇതിലും ഉപയോഗിച്ചിരിക്കുന്നത്. മാനുവൽ ഗിയർബോക്സ് പതിപ്പിന് 44,990 ഓസ്ട്രേലിയൻ ഡോളറും, ഓട്ടോമാറ്റിക് പതിപ്പിന് 47,990 ഓസ്ട്രേലിയൻ ഡോളറുമാണ് വില. സാധാരണ ജിംനിയെ അപേക്ഷിച്ച് 10,000 ഓസ്ട്രേലിയൻ ഡോളർ അധികമാണിത്.
