ഹൈദരാബാദ്: ഐപിഎല്ലിൽ സൺറൈസേഴ്സ് ഹൈദരാബാദിന്റെ തട്ടകത്തിൽ കൊൽക്കത്ത നൈറ്റ് റൈഡേഴ്സിന് ആധിപത്യം. രാജീവ് ഗാന്ധി അന്താരാഷ്ട്ര സ്റ്റേഡിയത്തിൽ നടന്ന മത്സരത്തിൽ ടോസ് നേടി ബാറ്റിംഗ് തിരഞ്ഞെടുത്ത ഹൈദരാബാദിനെ 19 ഓവറിൽ 165 റൺസിന് കൊൽക്കത്ത ചുരുട്ടിക്കെട്ടി. പവർപ്ലേ ഓവറുകളിൽ തകർപ്പൻ തുടക്കം ലഭിച്ചിട്ടും മധ്യനിരയിലെ തകർച്ചയാണ് ആതിഥേയർക്ക് തിരിച്ചടിയായത്. വരുൺ ചക്രവർത്തിയുടെ നേതൃത്വത്തിലുള്ള കൊൽക്കത്തയുടെ ബൗളിംഗ് നിര കൃത്യമായ ഇടവേളകളിൽ വിക്കറ്റുകൾ വീഴ്ത്തി മത്സരം തങ്ങളുടെ വരുതിയിലാക്കി.
Also Read: ഹാർദിക് വെറുമൊരു പ്ലാസ്റ്റിക് ക്യാപ്റ്റൻ; മുംബൈ നായകനെതിരെ ആഞ്ഞടിച്ച് കൃഷ്ണമാചാരി ശ്രീകാന്ത്
ഹൈദരാബാദിനായി ഓപ്പണർമാരായ ട്രാവിസ് ഹെഡും അഭിഷേക് ശർമ്മയും ചേർന്ന് വെടിക്കെട്ട് തുടക്കമാണ് നൽകിയത്. ഹെഡ് വെറും 28 പന്തിൽ നിന്ന് 61 റൺസ് അടിച്ചുകൂട്ടി ടീമിന്റെ ടോപ് സ്കോററായി. മധ്യനിരയിൽ ഇഷാൻ കിഷൻ 42 റൺസെടുത്ത് പൊരുതി നോക്കിയെങ്കിലും ഹെൻറിച്ച് ക്ലാസൻ ഉൾപ്പെടെയുള്ള വമ്പൻ താരങ്ങൾ നിരാശപ്പെടുത്തിയത് സ്കോറിംഗിന്റെ വേഗത കുറച്ചു. ഒരു ഘട്ടത്തിൽ കൂറ്റൻ സ്കോറിലേക്ക് നീങ്ങുമെന്ന് കരുതിയ ഹൈദരാബാദ് ഇതോടെ 165 റൺസിൽ അവസാനിക്കുകയായിരുന്നു.
കൊൽക്കത്തയ്ക്ക് വേണ്ടി വരുൺ ചക്രവർത്തി മൂന്ന് വിക്കറ്റുകൾ വീഴ്ത്തി മികച്ച പ്രകടനം പുറത്തെടുത്തു. സുനിൽ നരെയ്ൻ, കാർത്തിക് ത്യാഗി എന്നിവർ രണ്ട് വിക്കറ്റുകൾ വീതം വീഴ്ത്തി മികച്ച പിന്തുണ നൽകി. കൃത്യമായ പ്ലാനിംഗോടെ പന്തെറിഞ്ഞ കെകെആർ ബൗളർമാർ ഹൈദരാബാദിനെ വലിയ സ്കോർ നേടുന്നതിൽ നിന്നും വിജയകരമായി തടഞ്ഞു.
