ഞെട്ടിക്കുന്ന സത്യം! മൊബൈൽ റേഡിയേഷനും പെർഫ്യൂമും ക്യാൻസർ ഉണ്ടാക്കുമോ?

ക്യാൻസർ രോഗത്തെക്കുറിച്ചും അത് മനുഷ്യനെ എങ്ങനെ ബാധിക്കുന്നു എന്നതിനെക്കുറിച്ചും ധാരാളം തെറ്റിദ്ധാരണകൾ ആളുകൾക്കിടയിലുണ്ട്. നല്ല ഭക്ഷണം കഴിച്ചിട്ടും ചിട്ടയായ ആരോഗ്യശീലങ്ങൾ പിന്തുടർന്നിട്ടും എന്തുകൊണ്ടാണ് ക്യാൻസർ വരുന്നത് എന്നത് പലരെയും ആശങ്കപ്പെടുത്തുന്നു. മൊബൈൽ ഫോണിന്റെ ഉപയോഗം, പെർഫ്യൂമുകളുടെ ഉപയോഗം, ജീവിതശൈലി ഇവയൊക്കെ ക്യാൻസറിന് കാരണമാകുമോ എന്ന വാദങ്ങളെക്കുറിച്ച് ഇൻഡോറിലെ എസ്എച്ച്ജി കാൻസർ സെന്ററിലെ കൺസൾട്ടന്റ് – സർജിക്കൽ ഓങ്കോളജിസ്റ്റ് ഡോ. നയൻ ഗുപ്ത ശാസ്ത്രീയമായി വിശദീകരിക്കുന്നു.

പെർഫ്യൂമുകളും ഡിയോഡറന്റുകളും, ക്യാൻസർ സാധ്യതയുണ്ടോ?

പാരബെൻസ് അല്ലെങ്കിൽ അലുമിനിയം സംയുക്തങ്ങൾ പോലെയുള്ള ചില രാസവസ്തുക്കൾ അടങ്ങിയ പെർഫ്യൂമുകളും ഡിയോഡറന്റുകളും ഉപയോഗിക്കുന്നത് സ്തനാർബുദത്തിന് കാരണമാകുമെന്നാണ് ചിലരുടെ ധാരണ. ഇത്തരം സംയുക്തങ്ങൾ ഹോർമോൺ സംവിധാനങ്ങളെ തടസ്സപ്പെടുത്തുകയോ വിയർപ്പിലൂടെ വിഷവസ്തുക്കൾ പുറത്തേക്ക് പോകുന്നത് തടയുകയോ ചെയ്യുമെന്നും കരുതപ്പെടുന്നു.

എന്നാൽ, പെർഫ്യൂമുകളും ഡിയോഡറന്റുകളും ക്യാൻസർ ഉണ്ടാക്കുന്നു എന്നതിന് നേരിട്ടുള്ള ബന്ധം തെളിയിക്കാൻ ഒരു പഠനത്തിനും കഴിഞ്ഞിട്ടില്ല എന്ന് ഡോക്ടർ ഗുപ്ത പറയുന്നു. അതേസമയം, പുകയില, മദ്യം, പരിസ്ഥിതി മലിനീകരണം തുടങ്ങിയ ദോഷകരമായ കാര്യങ്ങൾ കാൻസർ സാധ്യത വർധിപ്പിക്കുന്നു എന്നത് വാസ്തവമാണ്.

Also Read: റെഡ് വൈൻ ‘ഹീറോ’ അല്ല! ഹൃദയത്തിനല്ല, കരളിനാണ് ഭീഷണി; ഞെട്ടിക്കുന്ന റിപ്പോർട്ട്

മൊബൈൽ ഫോണുകളും റേഡിയേഷനും: ആശങ്ക വേണ്ട

മൊബൈൽ ഫോണുകൾ റേഡിയോ ഫ്രീക്വൻസി വികിരണം പുറപ്പെടുവിക്കുന്നവയാണ്. ഈ വികിരണങ്ങൾ അർബുദകാരികളാകാൻ സാധ്യതയുണ്ട് എന്ന് പറയപ്പെടുന്നുണ്ടെങ്കിലും, ശാസ്ത്രീയമായി ഇതിന് തെളിവില്ല.

കാരണം: എക്‌സ്‌റേകളും ഗാമാകിരണങ്ങളും ചെയ്യുന്നതുപോലെ രാസബന്ധനങ്ങൾ തകർക്കുന്നതിനോ DNA തന്മാത്രയിൽ മാറ്റം വരുത്താനോ മൊബൈൽഫോൺ പുറപ്പെടുവിക്കുന്ന റേഡിയോ ഫ്രീക്വൻസി വികിരണത്തിന് മതിയായ ഊർജ്ജമില്ല.

നിഗമനം: ലോകാരോഗ്യ സംഘടന, നാഷണൽ ക്യാൻസർ ഇൻസ്റ്റിറ്റ്യൂട്ട് തുടങ്ങിയ പ്രമുഖ ആരോഗ്യ സംഘടനകൾ സെൽഫോണുകളും കാൻസറുമായി ബന്ധമില്ലെന്ന് അവകാശപ്പെടുന്നു. എങ്കിലും ഇയർഫോണുകൾ ഉപയോഗിക്കുന്നതും സ്പീക്കർ മോഡിൽ ഫോൺ ഉപയോഗിക്കുന്നതും പോലുള്ള മുൻകരുതലുകൾ സ്വീകരിക്കുന്നത് നല്ലതാണ്.

ജീവിതശൈലിയാണ് ഏറ്റവും പ്രധാനം

ക്യാൻസർ സാധ്യത വർധിപ്പിക്കുന്നതിൽ ജീവിതശൈലി ഘടകങ്ങളാണ് ഏറ്റവും വലിയ പങ്ക് വഹിക്കുന്നതെന്ന് ശാസ്ത്രീയ തെളിവുകൾ സൂചിപ്പിക്കുന്നു.

പുകവലി, മദ്യപാനം, മോശം ഭക്ഷണക്രമം, ശരീരവ്യായാമം ഇല്ലാതിരിക്കുക തുടങ്ങിയ ഘടകങ്ങൾ ലോകത്തിലെ 40 ശതമാനം ക്യാൻസറുകൾക്കും കാരണമാകുന്നുണ്ട്.

സംസ്കരിച്ച ഭക്ഷണങ്ങൾ കഴിക്കുക, സമ്മർദ്ദം, ഉറക്കക്കുറവ് തുടങ്ങിയ അലസമായ ജീവിതശൈലി പിന്തുടരുന്നത് ശരീരത്തിന്റെ പ്രതിരോധ സംവിധാനത്തെ ദുർബലപ്പെടുത്തുന്നു.

പരിഹാരം: പെർഫ്യൂമുകളെയും ഫോണിന്റെ റേഡിയേഷനെയും ഭയപ്പെടുന്നതിന് പകരം ജീവിതശൈലിയിൽ നല്ല മാറ്റങ്ങൾ വരുത്തുന്നതാണ് ഉചിതം. പഴങ്ങൾ, പച്ചക്കറികൾ, ധാന്യങ്ങൾ എന്നിവ അടങ്ങിയ സമീകൃത ആഹാരം, പതിവായുള്ള വ്യായാമം, പുകവലി, പുകയില ഉത്പന്നങ്ങളുടെ ഉപയോഗം എന്നിവ ഒഴിവാക്കൽ എന്നിവയിലൂടെ ക്യാൻസർ സാധ്യത ഗണ്യമായി കുറയ്ക്കാൻ കഴിയും.