സൂപ്പർ ജോഡികളായ ഷാറൂഖ്- കാജോൾ കൂട്ടുകെട്ടിൽ ഹിന്ദിയിൽ ചെയ്യാനിരുന്ന ചിത്രമായിരുന്നു ‘അലൈ പായുതേ’ എന്ന് വെളിപ്പെടുത്തി സംവിധായകൻ മണിരത്നം. ഷാറൂഖിന് കഥ ഇഷ്ടപ്പെട്ടുവെന്നും എന്നാൽ ചിത്രം നടന്നില്ലെന്നും പകരം ‘ദിൽ സെ’ എന്ന സിനിമ സംഭവിച്ചെന്നും സംവിധായകൻ കൂട്ടിച്ചേർത്തു.
“മാധവനും ശാലിനിയും ഒന്നിച്ച ‘അലൈ പായുതേ’ ആദ്യം ഹിന്ദിയിൽ ചെയ്യാനായിരുന്നു തീരുമാനിച്ചിരുന്നത്. ഷാറൂഖ് ഖാനും കാജോളുമായിരുന്നു മനസിൽ. കഥ ഷാറൂഖിനും ഇഷ്ടമായി. പക്ഷെ ക്ലൈമാക്സിൽ ചെറിയ പ്രശ്നമുണ്ടായിരുന്നു അദ്ദേഹത്തിന്. എന്നാൽ അതു പൊളിച്ചുമാറ്റാൻ ഞാൻ തയാറായില്ല.അങ്ങനെ അലൈ പായുതേക്ക് പകരം ഷാറൂഖിനെ വെച്ച് ദിൽ സേ ചെയ്തു. പിന്നീട് തമിഴിൽ മാധവനെയും ശാലിനിയേയും വെച്ച് അലൈ പായുതേ ചെയ്തു. അലൈ പായുതേയുടെ ഹിന്ദി പതിപ്പായ ‘സാതിയ’ സംവിധാനം ചെയ്തത് ഷാദ് അലിയാണ്. വ്യത്യസ്തമായിട്ടാണ് ഹിന്ദിയിൽ ചിത്രം ഒരുക്കിയത്“- ജി 5 എ റിട്രോസ്പെക്റ്റീവിന്റെ ഓപ്പൺ ഫോറത്തിൽ പറഞ്ഞു.

2000 ൽ പുറത്തിറങ്ങിയ ചിത്രം 25 വർഷങ്ങൾക്കിപ്പുറവും പ്രേക്ഷകരുടെ ഇടയിൽ ചർച്ചയാണ്. എ. ആർ റഹ്മാൻ സംഗീത സംവിധാനം നിർവഹിച്ച ചിത്രത്തിലെ ഓരോ പാട്ടുകളും ഇന്നും സിനിമാപ്രേമികൾ വായിൽ മൂളുന്ന ഈണമാണ്. 1998 ൽ പുറത്തിറങ്ങിയ ‘ദിൽ സേ’യിലെ ഗാനങ്ങളും ചിട്ടപ്പെടുത്തിയത് എ.ആർ റഹ്മാൻ ആയിരുന്നു.