ജമ്മു കശ്മീരിന്റെ പ്രത്യേക പദവി എടുത്തുകളഞ്ഞ ആർട്ടിക്കിൾ 370 റദ്ദാക്കിയതിന്റെ ഏഴാം വാർഷികത്തിൽ പ്രധാനമന്ത്രി നരേന്ദ്ര മോദി നടത്തിയ പ്രസ്താവനകൾ വലിയ ചർച്ചയാകുന്നു. ഏഴ് വർഷം മുമ്പ് ഈ ദിവസമാണ് ആർട്ടിക്കിൾ 370 ചരിത്രമായി മാറിയതെന്നും, അത് ജമ്മു കശ്മീരിന്റെയും ലഡാക്കിന്റെയും വികസന യാത്രയിലെ നിർണായക അധ്യായമാണെന്നും അദ്ദേഹം വ്യക്തമാക്കി. കശ്മീരിലും ലഡാക്കിലും ജനജീവിതം സമഗ്രമായ പരിവർത്തനത്തിന് സാക്ഷ്യം വഹിച്ചുവെന്നും അടിസ്ഥാന സൗകര്യങ്ങൾ വൻതോതിൽ വികസിച്ചതായും പ്രധാനമന്ത്രി ചൂണ്ടിക്കാണിച്ചു.
വിദ്യാഭ്യാസം, ആരോഗ്യം, സംരംഭകത്വം, കായികം തുടങ്ങിയ മേഖലകളിൽ പുതിയ അവസരങ്ങൾ സൃഷ്ടിക്കപ്പെട്ടതായി മോദി എടുത്തുപറഞ്ഞു. പതിറ്റാണ്ടുകളായി ഭരണഘടനാ അവകാശങ്ങൾ നിഷേധിക്കപ്പെട്ടിരുന്ന പാർശ്വവൽക്കരിക്കപ്പെട്ട സമൂഹങ്ങളിലെ സ്ത്രീകളും, നിലവിൽ ഇന്ത്യൻ ഭരണഘടനയുടെ പൂർണ്ണമായ പ്രയോഗത്തിലൂടെ ശാക്തീകരിക്കപ്പെട്ടിട്ടുണ്ടെന്ന് അദ്ദേഹം കൂട്ടിച്ചേർത്തു. ജമ്മു കശ്മീരിന്റെയും ലഡാക്കിന്റെയും പുരോഗതിക്കായുള്ള സർക്കാരിന്റെ പ്രതിബദ്ധത അദ്ദേഹം വീണ്ടും ഉറപ്പിച്ചു.
ശ്യാമപ്രസാദ് മുഖർജിയുടെ 125-ാം ജന്മവാർഷികം രാജ്യം ആഘോഷിക്കുന്ന ഈ വേളയിൽ ഇന്നത്തെ ദിവസത്തിന് പ്രത്യേക പ്രാധാന്യമുണ്ടെന്നും പ്രധാനമന്ത്രി ഓർമ്മിപ്പിച്ചു. ദേശീയ ഐക്യത്തിനായി ഡോ. മുഖർജി നൽകിയ ആജീവനാന്ത സംഭാവനകൾ തലമുറകളെ പ്രചോദിപ്പിക്കുമെന്നും, അദ്ദേഹം വിഭാവനം ചെയ്ത ദർശനം 2019 ഓഗസ്റ്റ് 5-ന് ചരിത്രപരമായ പൂർത്തീകരണം കണ്ടെത്തിയെന്നും മോദി പറഞ്ഞു. ജമ്മു കശ്മീരിന്റെയും ലഡാക്കിന്റെയും സമഗ്ര വികസനത്തിനായി സർക്കാർ പ്രതിജ്ഞാബദ്ധമാണെന്നും, വലിയ സ്വപ്നങ്ങൾ കാണാനും ‘വിക്ഷിത് ഭാരത്’ (വികസിത ഇന്ത്യ) എന്ന ലക്ഷ്യത്തിനായി സംഭാവന നൽകാനും ഓരോ പൗരനും അവസരമുണ്ടാകണമെന്നും പ്രധാനമന്ത്രി ആഹ്വാനം ചെയ്തു.
