മെൻലോ പാർക്ക്: ആർട്ടിഫിഷ്യൽ ഇന്റലിജൻസ് മേഖലയിൽ ആധിപത്യം ഉറപ്പിക്കാനുള്ള മെറ്റയുടെ നീക്കങ്ങൾ ജീവനക്കാരുടെ ശമ്പളത്തിലും പ്രതിഫലിക്കുന്നു. ബിസിനസ് ഇൻസൈഡർ പുറത്തുവിട്ട പുതിയ ശമ്പള വിവരങ്ങൾ പ്രകാരം, മെറ്റയിലെ AI, മെഷീൻ ലേണിംഗ് വിദഗ്ധർക്ക് ലഭിക്കുന്നത് സങ്കല്പങ്ങൾക്കും അപ്പുറമുള്ള തുകയാണ്. 2025-ലെ വിസ ഫയലിംഗുകൾ വിശകലനം ചെയ്തതിൽ നിന്നും, AI ഗവേഷകർക്കും എഞ്ചിനീയർമാർക്കുമാണ് സാങ്കേതിക ലോകത്ത് ഇന്ന് ഏറ്റവും ഉയർന്ന പ്രതിഫലം ലഭിക്കുന്നതെന്ന് വ്യക്തമാകുന്നു.
Also Read:9,000 mAh ബാറ്ററിയുമായി വൺപ്ലസ് നോർഡ് 6 ഇന്ത്യയിൽ; വിപണി കീഴടക്കാൻ വൺപ്ലസിന്റെ പുത്തൻ കരുത്തൻ
മെറ്റയിലെ മെഷീൻ ലേണിംഗ് എഞ്ചിനീയർമാർക്ക് പ്രതിവർഷം ഏകദേശം 2.1 കോടി രൂപ ($250,000) വരെ ശമ്പളമായി ലഭിക്കുന്നുണ്ട്. സോഫ്റ്റ്വെയർ എഞ്ചിനീയറിംഗ് വിഭാഗത്തിൽ സീനിയർ തസ്തികകളിൽ ഉള്ളവർക്ക് 2.5 കോടി രൂപ വരെയും ഇൻഫ്രാസ്ട്രക്ചർ കേന്ദ്രീകരിച്ചുള്ള റോളുകളിൽ ഉള്ളവർക്ക് 3.7 കോടി രൂപ ($450,000) വരെയും സമ്പാദിക്കാം. കേവലം എഞ്ചിനീയറിംഗിൽ മാത്രം ഒതുങ്ങുന്നതല്ല ഈ വരുമാന വർദ്ധനവ്; ഡാറ്റാ സയന്റിസ്റ്റുകൾക്കും ഉൽപ്പന്ന മാനേജർമാർക്കും 2.5 കോടി മുതൽ 3 കോടി രൂപ വരെ ശമ്പളം ലഭിക്കുന്ന തസ്തികകൾ മെറ്റയിലുണ്ട്.
ഗവേഷണ വിഭാഗത്തിലാണ് (Research) യഥാർത്ഥത്തിൽ ‘പണക്കിലുക്കം’ കൂടുതൽ. AI റിസർച്ച് സയന്റിസ്റ്റുകൾക്ക് 2.7 കോടി രൂപ വരെയും, റിസർച്ച് എഞ്ചിനീയർമാർക്ക് 3.3 കോടി രൂപ വരെയും ശമ്പളം ലഭിക്കുന്നു. നേതൃത്വപരമായ റോളുകളിലേക്ക് വരുമ്പോൾ പ്രതിഫലം ഇനിയും വർദ്ധിക്കും. വൈസ് പ്രസിഡന്റ് തലത്തിലുള്ള AI വിദഗ്ധർക്ക് 5.4 കോടി രൂപ ($650,000) വരെയാണ് വാർഷിക ശമ്പളം. സങ്കീർണ്ണമായ AI മോഡലുകൾ വികസിപ്പിക്കാൻ കഴിവുള്ള പ്രതിഭകളെ നിലനിർത്താൻ മെറ്റ എത്രത്തോളം വലിയ നിക്ഷേപമാണ് നടത്തുന്നതെന്ന് ഈ കണക്കുകൾ അടിവരയിടുന്നു.
