ട്രിപോളി: ലിബിയൻ മുൻ ഏകാധിപതി മുഅമ്മർ ഗദ്ദാഫിയുടെ മകനും രാഷ്ട്രീയ പിൻഗാമിയുമായിരുന്ന സെയ്ഫ് അൽ ഇസ്ലാം ഗദ്ദാഫി (53) കൊല്ലപ്പെട്ടതായി റിപ്പോർട്ട്. അൾജീരിയൻ അതിർത്തിയോട് ചേർന്നുള്ള സിൻറ്റാൻ നഗരത്തിലെ വസതിയിൽ വെച്ച് ചൊവ്വാഴ്ചയാണ് ആക്രമണമുണ്ടായത്. നാലംഗ കമാൻഡോ സംഘം വീട്ടിൽ അതിക്രമിച്ചു കയറി വെടിയുതിർക്കുകയായിരുന്നുവെന്ന് അദ്ദേഹത്തിന്റെ അഭിഭാഷകൻ വെളിപ്പെടുത്തി. ലിബിയയിലെ വിവിധ സായുധ സംഘങ്ങൾ തമ്മിൽ നിലനിൽക്കുന്ന രൂക്ഷമായ ഏറ്റുമുട്ടലുകൾക്കിടയിലാണ് ഈ കൊലപാതകം നടന്നതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. എന്നാൽ ഇദ്ദേഹത്തിന്റെ മരണത്തിൽ ഔദ്യോഗികമായ സ്ഥിരീകരണം ഇതുവരെ ലഭ്യമായിട്ടില്ല.
Also Read: ജനസാഗരമായി മസ്കത്ത് നൈറ്റ്സ്: 20 ലക്ഷത്തിലധികം സന്ദർശകർ
40 വർഷത്തോളം ലിബിയ ഭരിച്ച മുഅമ്മർ ഗദ്ദാഫിയുടെ മരണശേഷം കുടുംബത്തിന്റെ രാഷ്ട്രീയ അധികാരം തിരിച്ചുപിടിക്കാനുള്ള ശ്രമങ്ങൾക്കിടയിലാണ് സെയ്ഫ് അൽ ഇസ്ലാമിന് നേരെ ആക്രമണമുണ്ടായത്. 2011-ൽ പിതാവ് കൊല്ലപ്പെട്ടതിനെ തുടർന്ന് സഹാറ മരുഭൂമിയിൽ വെച്ച് പിടിക്കപ്പെട്ട അദ്ദേഹം വർഷങ്ങളോളം സായുധ സംഘങ്ങളുടെ തടവിലായിരുന്നു. പിന്നീട് മോചിതനായ സെയ്ഫ്, 2021-ൽ ലിബിയൻ പ്രസിഡന്റ് തിരഞ്ഞെടുപ്പിൽ മത്സരിക്കാൻ നാമനിർദ്ദേശ പത്രിക സമർപ്പിച്ചുകൊണ്ട് സജീവ രാഷ്ട്രീയത്തിലേക്ക് തിരിച്ചുവരാൻ ഒരുങ്ങുകയായിരുന്നു. ഗദ്ദാഫിക്ക് ശേഷം ലിബിയയിൽ ഏറ്റവുമധികം സ്വാധീനമുള്ള വ്യക്തിത്വമായാണ് അദ്ദേഹം വിലയിരുത്തപ്പെട്ടിരുന്നത്.
മനുഷ്യരാശിക്കെതിരായ കുറ്റകൃത്യങ്ങൾ ആരോപിക്കപ്പെട്ട് അന്താരാഷ്ട്ര ക്രിമിനൽ കോടതിയുടെ (ICC) അറസ്റ്റ് വാറണ്ട് നിലനിൽക്കുന്ന വ്യക്തിയാണ് സെയ്ഫ് അൽ ഇസ്ലാം. 2011-ലെ ലിബിയൻ പ്രക്ഷോഭകാലത്ത് പ്രതിഷേധക്കാർക്കെതിരെ ക്രൂരമായ സൈനിക നടപടികൾക്ക് ഉത്തരവിട്ടു എന്നതാണ് ഇദ്ദേഹത്തിനെതിരെയുള്ള പ്രധാന കുറ്റം. ലിബിയയിലെ രാഷ്ട്രീയ അസ്ഥിരതകൾക്കിടയിൽ സെയ്ഫിന്റെ മരണം സംബന്ധിച്ച വാർത്തകൾ വലിയ ആശങ്കയോടെയാണ് ലോകം നോക്കിക്കാണുന്നത്. ആക്രമണത്തിന് പിന്നിൽ പ്രവർത്തിച്ചവർ ആരാണെന്ന കാര്യത്തിൽ ഇതുവരെ വ്യക്തത വന്നിട്ടില്ല.
