പത്തനംതിട്ട: സംസ്ഥാന ആരോഗ്യവകുപ്പിൽ മൂവായിരം ഡോക്ടർമാരുടെ പുതിയ തസ്തികകൾ വർധിപ്പിക്കുമെന്ന് ആരോഗ്യമന്ത്രി കെ. മുരളീധരൻ അറിയിച്ചു. ഡോക്ടർമാർക്ക് പുറമെ നഴ്സുമാരുടെ ഉൾപ്പെടെയുള്ള തസ്തികകളും വർധിപ്പിച്ച് പൊതുമേഖലാ ആരോഗ്യ സംവിധാനങ്ങളെ കൂടുതൽ ശക്തിപ്പെടുത്തുകയാണ് സർക്കാരിന്റെ ലക്ഷ്യമെന്ന് പത്തനംതിട്ടയിൽ നടന്ന ചടങ്ങിൽ സംസാരിക്കവെ മന്ത്രി വ്യക്തമാക്കി.
സംസ്ഥാനത്തെ സർക്കാർ മെഡിക്കൽ കോളേജുകളിലെ ആധുനിക ചികിത്സാ സൗകര്യങ്ങൾ വർധിപ്പിക്കുന്നതിന്റെ ഭാഗമായി അടുത്ത മൂന്ന് മാസത്തിനകം തിരുവനന്തപുരം മെഡിക്കൽ കോളേജിൽ റോബോട്ടിക് സർജറി സംവിധാനം ഏർപ്പെടുത്തും. ആദ്യഘട്ടമായി തിരുവനന്തപുരത്താണ് തുടക്കമിടുന്നതെങ്കിലും വരുംവർഷങ്ങളിൽ മറ്റ് മെഡിക്കൽ കോളേജുകളിലേക്കും ഈ സംവിധാനം വ്യാപിപ്പിക്കാനാണ് തീരുമാനം. കമ്പ്യൂട്ടർ നിയന്ത്രിത റോബോട്ടിക് കൈകൾ ഉപയോഗിച്ച് ശസ്ത്രക്രിയാ വിദഗ്ധൻ നടത്തുന്ന ഇത്തരം ഓപ്പറേഷനുകൾക്ക് കൂടുതൽ കൃത്യത ഉറപ്പാക്കാൻ സാധിക്കും. ഈ വർഷം ആദ്യമാണ് തിരുവനന്തപുരം ആർ.സി.സിയിൽ റോബോട്ടിക് സർജറി ആദ്യമായി ആരംഭിച്ചത്.
എൻ.എസ്.എസ് ഒരു പൊതുമേഖലാ സ്ഥാപനം പോലെ ലാഭേച്ഛയില്ലാതെ പ്രവർത്തിക്കുന്ന പ്രസ്ഥാനമാണെന്നും മന്ത്രി അഭിപ്രായപ്പെട്ടു. എൻ.എസ്.എസ് അലോപ്പതി മെഡിക്കൽ രംഗത്തേക്ക് കൂടുതൽ സജീവമായി കടന്നുവരണം. സ്വകാര്യ വിദേശ കമ്പനികളുടെ നിയന്ത്രണത്തിലുള്ള ആശുപത്രികളിൽ ഒരു ലക്ഷം രൂപയുടെ ചെലവുകൾ മൂന്ന് ലക്ഷം രൂപ വരെയായി ഉയരുമ്പോൾ, സർക്കാർ സ്ഥാപനങ്ങൾ പോലെ സുതാര്യമായും ജീവനക്കാരുടെ ക്ഷേമത്തിന് മുൻഗണന നൽകിയുമാണ് എൻ.എസ്.എസ് പ്രവർത്തിക്കുന്നതെന്നും കെ. മുരളീധരൻ കൂട്ടിച്ചേർത്തു.






