ഇന്ത്യ പാകിസ്ഥാനില്‍ നടത്തിയ ‘ഓപ്പറേഷന്‍ സിന്ദൂര്‍’ എന്ന സൈനിക നടപടിക്കുശേഷം, ആണവയുദ്ധം ഒഴിവാക്കാന്‍ ഇടപെട്ടു എന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ് ആവര്‍ത്തിച്ച് അവകാശപ്പെടുന്നതിനിടയിലും മുന്‍ സിഐഎ ഉദ്യോഗസ്ഥനും വിസില്‍ബ്ലോവറുമായ ജോണ്‍ കിറിയാക്കോയുടെ ഒരു വൈറല്‍ വിഡിയോ വലിയ ചര്‍ച്ചകള്‍ക്ക് വഴിവെച്ചിരിക്കുകയാണ്.
പാകിസ്ഥാന്റെ ആണവായുധ ശേഖരത്തിന്റെ ‘താക്കോല്‍’ ഒരു അമേരിക്കന്‍ ജനറലിന്റെ നിയന്ത്രണത്തിലാണെന്ന് കിറിയാക്കോ ഈ വിഡിയോയില്‍ അവകാശപ്പെടുന്നു. ‘പാക് സര്‍ക്കാര്‍ അവരുടെ ആണവായുധങ്ങളുടെ കമാന്‍ഡും നിയന്ത്രണവും ഒരു അമേരിക്കന്‍ ജനറലിനെ ഏല്‍പ്പിച്ചിരിക്കുകയാണ്,’ കിറിയാക്കോ പറയുന്നു.
Also Read: വീണ്ടുമൊരു ‘സൂപ്പര്‍ എര്‍ത്ത്’ കണ്ടെത്തി ശാസ്ത്രജ്ഞ
2000കളുടെ തുടക്കത്തില്‍ സിഐഎയുടെ തീവ്രവാദ വിരുദ്ധ പ്രവര്‍ത്തനങ്ങളുടെ ഭാഗമായി പാകിസ്ഥാനില്‍ സേവനമനുഷ്ഠിച്ച അദ്ദേഹം, സിഐഎ-ഐഎസ്‌ഐ സംയുക്ത പ്രവര്‍ത്തനങ്ങള്‍ നിയന്ത്രിച്ചിരുന്നു. 2012-ല്‍, രഹസ്യ സിഐഎ ഉദ്യോഗസ്ഥന്റെ വിവരങ്ങള്‍ ഒരു മാധ്യമപ്രവര്‍ത്തകന് ചോര്‍ത്തിയെന്ന ആരോപണത്തില്‍, ചാരവൃത്തി നിയമപ്രകാരം കേസെടുക്കുകയും തടവിലാക്കുകയും ചെയ്തു. അതിനുശേഷം കിറിയാക്കോ വിസില്‍ബ്ലോവറിന്റെ ശക്തനായ വക്താവും യുഎസ് ഇന്റലിജന്‍സ് സമ്പ്രദായങ്ങളുടെ വിമര്‍ശകനുമായി മാറി.
കഴിഞ്ഞ മാസം, പാകിസ്ഥാന്‍ സുരക്ഷാ വിദഗ്ദ്ധന്‍ ഇംതിയാസ് ഗുല്‍, പാകിസ്ഥാന്റെ തന്ത്രപ്രധാനമായ നൂര്‍ ഖാന്‍ വ്യോമതാവളം അമേരിക്കന്‍ നിയന്ത്രണത്തിലാണെന്നും, മുതിര്‍ന്ന പാക്കിസ്ഥാന്‍ ആര്‍മി ഉദ്യോഗസ്ഥര്‍ക്ക് പോലും അവിടേക്ക് പ്രവേശനമില്ലെന്നും അവകാശപ്പെട്ട് വിവാദമുണ്ടാക്കിയിരുന്നു. ഈ വ്യോമതാവളം പാകിസ്ഥാന്റെ ആണവായുധങ്ങളുടെ ചുമതലയുള്ള സ്ട്രാറ്റജിക് പ്ലാന്‍സ് ഡിവിഷനുമായി വളരെ അടുത്താണ് സ്ഥിതി ചെയ്യുന്നത്.
Also Read: 34 കോടിയിലധികം രൂപ മൂല്യമുള്ള ഒരു പാറക്കഷണം ! ലേലം 16ന്, ആര് സ്വന്തമാക്കും ?
1998ല്‍ ആണവ പരീക്ഷണങ്ങള്‍ നടത്തി പാകിസ്ഥാന്‍ ആണവശക്തിയായി മാറിയതുമുതല്‍ അവരുടെ ആണവായുധങ്ങളുടെ നിയന്ത്രണം വലിയ ചര്‍ച്ചാ വിഷയമാണ്. കിറിയാക്കോയുടെ വാദത്തിന് പുറമെ, വിവിധ സിദ്ധാന്തങ്ങള്‍ പ്രചാരത്തിലുണ്ട്. പാകിസ്ഥാന്റെ ആണവായുധങ്ങള്‍ക്കായി അമേരിക്കയ്ക്ക് ഒരു അടിയന്തര പദ്ധതി തയ്യാറാണെന്ന് ഊഹാപോഹങ്ങളുണ്ട്, കൂടാതെ ഇരു രാജ്യങ്ങളും തമ്മിലുള്ള അടുത്ത സൈനിക സഹകരണം പാകിസ്ഥാന്റെ ആണവായുധങ്ങളില്‍ അമേരിക്കയ്ക്ക് ഒരു പരിധി വരെ നിയന്ത്രണമുണ്ടെന്ന് സൂചിപ്പിക്കുന്നു എന്നും പലരും കരുതുന്നു.
ജോണ്‍ കിറിയാക്കോ, ഒരു മുന്‍ സിഐഎ ഉദ്യോഗസ്ഥന്‍ എന്ന നിലയില്‍ ഇത്തരം അവകാശവാദങ്ങള്‍ ഉന്നയിച്ചിട്ടുണ്ട്. എന്നിരുന്നാലും, ഈ അവകാശവാദം പാകിസ്ഥാന്‍ സര്‍ക്കാരോ യുഎസ് സര്‍ക്കാരോ ഔദ്യോഗികമായി സ്ഥിരീകരിച്ചിട്ടില്ല. പാകിസ്ഥാന്‍ അതിന്റെ ആണവായുധങ്ങളുടെ കമാന്‍ഡ് ആന്‍ഡ് കണ്‍ട്രോള്‍ സംവിധാനം വളരെ സുരക്ഷിതമാണെന്ന് എല്ലായ്‌പ്പോഴും അവകാശപ്പെടുന്നു. അമേരിക്കയ്ക്ക് പാകിസ്ഥാന്റെ ആണവായുധങ്ങളുടെ സുരക്ഷയെക്കുറിച്ച് ദീര്‍ഘകാല ആശങ്കകളുണ്ടായിരുന്നതായും, ‘nsatch-and-grab’ പോലുള്ള സാഹചര്യങ്ങള്‍ക്കുള്ള അടിയന്തര പദ്ധതികള്‍ തയ്യാറാക്കിയിട്ടുണ്ടെന്നും എന്‍ബിസി ന്യൂസ് പോലുള്ള സ്ഥാപനങ്ങള്‍ മുന്‍പ് റിപ്പോര്‍ട്ട് ചെയ്തിട്ടുണ്ട്.
