ഇന്ത്യൻ വാഹന വിപണിയിൽ മാരുതി സുസുക്കി ബ്രെസ്സ, ഹ്യുണ്ടായി വെന്യു, ടാറ്റ പഞ്ച് എന്നിവയുമായി മത്സരിക്കാൻ ഫ്രഞ്ച് കാർ നിർമ്മാതാക്കളായ റെനോ തങ്ങളുടെ പുതിയ കോംപാക്റ്റ് എസ്യുവി ‘ബ്രിഡ്ജർ’ പുറത്തിറക്കാൻ ഒരുങ്ങുന്നു. ഇതിന്റെ ഭാഗമായി വാഹനത്തിന്റെ ഡിസൈൻ പേറ്റന്റ് കമ്പനി ഇന്ത്യയിൽ ഫയൽ ചെയ്തു കഴിഞ്ഞു. എന്നാൽ കൗതുകകരമായ കാര്യം, ഈ പേറ്റന്റ് ഫയലിംഗ് ‘ഗെയിംസ് ആൻഡ് ടോയ്സ്’ വിഭാഗത്തിന് കീഴിലാണ് രജിസ്റ്റർ ചെയ്തിരിക്കുന്നത്. അതുകൊണ്ട് തന്നെ ഇത് യഥാർത്ഥ വാഹനത്തിന് പകരം ഒരു സ്കെയിൽ മോഡലിന്റേതാകാനാണ് സാധ്യതയെങ്കിലും, വരാനിരിക്കുന്ന എസ്യുവിയുടെ രൂപരേഖയെക്കുറിച്ച് വ്യക്തമായ സൂചന ഇത് നൽകുന്നുണ്ട്. കഴിഞ്ഞ മാർച്ചിൽ റെനോ പ്രദർശിപ്പിച്ച ‘ബ്രിഡ്ജർ കൺസെപ്റ്റ്’ മോഡലിനോട് പൂർണ്ണമായും നീതി പുലർത്തുന്നതാണ് ഇപ്പോൾ പുറത്തുവന്ന പേറ്റന്റ് ചിത്രങ്ങൾ. ചതുരാകൃതിയിലുള്ള വീൽ ആർച്ചുകൾ, മസ്കുലാർ ഫെൻഡറുകൾ, സി ആകൃതിയിലുള്ള എൽഇഡി ഡിആർഎല്ലുകൾ, പിൻഭാഗത്ത് ഘടിപ്പിച്ച സ്പെയർ വീൽ എന്നിവയോടെ തികച്ചും ബോക്സി ലുക്കിലാണ് ഈ വാഹനം രൂപകൽപ്പന ചെയ്തിരിക്കുന്നത്.
റെനോയുടെ ജനപ്രിയ മോഡലായ ഡസ്റ്ററിന് തൊട്ടുതാഴെയായിട്ടായിരിക്കും വിപണിയിൽ ബ്രിഡ്ജറിന്റെ സ്ഥാനം. വാഹനത്തിന്റെ സാങ്കേതിക സവിശേഷതകൾ കമ്പനി ഔദ്യോഗികമായി സ്ഥിരീകരിച്ചിട്ടില്ലെങ്കിലും, വിപണിയിലെ കടുത്ത മത്സരം നേരിടാൻ ഒന്നിലധികം പവർട്രെയിൻ ഓപ്ഷനുകൾ ഇതിലുണ്ടാകുമെന്നാണ് പ്രതീക്ഷിക്കുന്നത്. 1.2 ലിറ്റർ ത്രീ-സിലിണ്ടർ പെട്രോൾ-ഹൈബ്രിഡ് എഞ്ചിൻ, പുതിയ 1.2 ലിറ്റർ ഫോർ-സിലിണ്ടർ ടർബോ-പെട്രോൾ എഞ്ചിൻ എന്നിവയ്ക്കൊപ്പം ഇന്ത്യൻ വിപണി ലക്ഷ്യമിട്ട് ഫാക്ടറി ഫിറ്റഡ് സിഎൻജി ഓപ്ഷനും റെനോ ഈ മോഡലിൽ അവതരിപ്പിച്ചേക്കും. ഇന്ത്യയിൽ ഏറ്റവും കൂടുതൽ വിൽപന നടക്കുന്ന എസ്യുവി സെഗ്മെന്റിലേക്കാണ് ബ്രിഡ്ജർ എത്തുന്നതെന്നതിനാൽ വാഹനലോകം ഏറെ ആകാംഷയോടെയാണ് ഇതിന്റെ വരവിനായി കാത്തിരിക്കുന്നത്.
