ട്രാഫിക് പിഴകൾ, പാർക്കിങ് ലംഘനങ്ങൾ, സാലക് പിഴകൾ തുടങ്ങി വിവിധ സർക്കാർ വകുപ്പുകൾ ചുമത്തുന്ന എല്ലാ പിഴകളും ഇനി മുതൽ ഒരൊറ്റ പ്ലാറ്റ്ഫോമിലൂടെ ഒന്നിച്ച് അടയ്ക്കാനുള്ള പുത്തൻ സംവിധാനം ദുബായ് സർക്കാർ അവതരിപ്പിച്ചു. ഡിജിറ്റൽ ദുബായ് തങ്ങളുടെ ഔദ്യോഗിക സ്മാർട്ട് ആപ്ലിക്കേഷനായ ‘ദുബായ് നൗ’ ആപ്പിലാണ് ‘പേ ഓൾ ഫൈൻസ്’ എന്ന ഈ വിപ്ലവകരമായ സേവനം ഉൾപ്പെടുത്തിയിരിക്കുന്നത്. ഇതോടെ വ്യത്യസ്ത വെബ്സൈറ്റുകളോ ആപ്പുകളോ മാറിമാറി സന്ദർശിച്ച് പിഴകൾ അടയ്ക്കേണ്ടി വന്നിരുന്ന പ്രവാസികളുടെയും സ്വദേശികളുടെയും വലിയ ബുദ്ധിമുട്ടുകൾക്കാണ് ശാശ്വത പരിഹാരമായിരിക്കുന്നത്. ഉപഭോക്താക്കൾക്ക് തങ്ങളുടെ എമിറേറ്റ്സ് ഐഡിയുമായി ബന്ധിപ്പിച്ചിട്ടുള്ള എല്ലാ പിഴകളുടെയും പൂർണ്ണമായ വിവരങ്ങൾ ഇനി മുതൽ ഒരൊറ്റ സ്ക്രീനിൽ കാണാനും ഒരൊറ്റ ക്ലിക്കിലൂടെ അവ മുഴുവനായി അടച്ചുതീർക്കാനും സാധിക്കും.
നിലവിൽ വാട്ടർ-ഇലക്ട്രിസിറ്റി ബില്ലുകൾ അടയ്ക്കൽ, വിസ സേവനങ്ങൾ, സാലക് അക്കൗണ്ട് റീചാർജ് ചെയ്യൽ തുടങ്ങി വിവിധ സർക്കാർ-സ്വകാര്യ മേഖലകളിലെ 320-ലധികം സുപ്രധാന സേവനങ്ങൾ ‘ദുബായ് നൗ’ ആപ്പ് വഴി ലഭ്യമാണ്. ഇതിന് പിന്നാലെയാണ് ഉപഭോക്താക്കളുടെ സൗകര്യം ഇരട്ടിയാക്കിക്കൊണ്ട് എല്ലാത്തരം പിഴകളും ഒന്നിച്ച് അടയ്ക്കാനുള്ള സംവിധാനവും ആപ്പിൽ ഉൾപ്പെടുത്തിയിരിക്കുന്നത്. വിവിധ അതോറിറ്റികൾ നൽകുന്ന പിഴകൾ കൃത്യസമയത്ത് അറിയാനും അവ ട്രാക്ക് ചെയ്യാനും ഈ ഡിജിറ്റൽ സംവിധാനം ഏറെ സഹായിക്കും. പിഴകൾ അടയ്ക്കാൻ വൈകുന്നത് വഴിയുണ്ടാകുന്ന അധിക പിഴകൾ ഒഴിവാക്കാനും, വാഹന രജിസ്ട്രേഷൻ പുതുക്കുന്നതിലെ താമസം, മറ്റ് സർക്കാർ ഇടപാടുകൾക്കുള്ള തടസ്സങ്ങൾ എന്നിവ പൂർണ്ണമായും ഇല്ലാതാക്കാനും ഈ പുതിയ സേവനത്തിലൂടെ സാധിക്കുമെന്ന് ഡിജിറ്റൽ ദുബായ് അധികൃതർ വ്യക്തമാക്കി.
