പ്രമുഖ സ്മാർട്ട്ഫോൺ നിർമ്മാതാക്കളായ റിയൽമി തങ്ങളുടെ പുതിയ 5ജി സ്മാർട്ട്ഫോൺ ‘റിയൽമി നാർസോ 100x 5G’ ഇന്ത്യൻ വിപണിയിൽ അവതരിപ്പിക്കാൻ ഒരുങ്ങുന്നു. റിയൽമിയുടെ ഔദ്യോഗിക ഇന്ത്യൻ വെബ്സൈറ്റിൽ ഫോണിനായുള്ള പ്രത്യേക മൈക്രോസൈറ്റ് ഇതിനോടകം തന്നെ സജീവമായിക്കഴിഞ്ഞു. ‘നോൺ സ്റ്റോപ്പ് പവർ, ലോഡിംഗ് സൂൺ’ എന്ന ആകർഷകമായ ടാഗ്ലൈനോടെയാണ് കമ്പനി ഈ പുതിയ മോഡൽ ടീസർ ചിത്രങ്ങളിലൂടെ പങ്കുവെച്ചിരിക്കുന്നത്. എന്നാൽ ഫോണിന്റെ കൃത്യമായ ലോഞ്ച് തീയതിയോ സാങ്കേതിക സവിശേഷതകളോ കമ്പനി ഇതുവരെ ഔദ്യോഗികമായി പുറത്തുവിട്ടിട്ടില്ല.
വലിയൊരു ബാറ്ററിയോടെയായിരിക്കും ഈ സ്മാർട്ട്ഫോൺ വിപണിയിലെത്തുകയെന്നാണ് ‘നോൺ സ്റ്റോപ്പ് പവർ’ എന്ന ടാഗ്ലൈൻ സൂചിപ്പിക്കുന്നത്. ടീസർ ചിത്രങ്ങൾ പ്രകാരം ഫോണിന്റെ പിൻഭാഗത്ത് ചതുരാകൃതിയിലുള്ള ക്യാമറ മോഡ്യൂളിൽ രണ്ട് ക്യാമറ സെൻസറുകളും എൽ.ഇ.ഡി ഫ്ലാഷും ഉൾപ്പെടുത്തിയിട്ടുണ്ട്. ഗോൾഡൻ അല്ലെങ്കിൽ ഓറഞ്ച് നിറങ്ങളിൽ ലഭ്യമാകുമെന്ന് കരുതുന്ന ഈ മോഡലിന്റെ ക്യാമറ റിങ്ങിന് ചുറ്റുമായി വൃത്താകൃതിയിലുള്ള ഒരു പ്രത്യേക ഡിസൈൻ ഹൈലൈറ്റും നൽകിയിട്ടുണ്ട്.
Also Read: ‘എന്റെ പേര് ഗൂഗിളിൽ തിരയൂ!’ ആരാധകരെ ഞെട്ടിച്ച് ഹാലൻഡ്; വിസ്മയമൊരുക്കി ടെക് ഭീമൻ ഗൂഗിൾ
കമ്പനിയുടെ നാർസോ 100 സീരീസിൽ അടുത്തിടെ വിപണിയിലെത്തിയ റിയൽമി നാർസോ 100 ലൈറ്റ് 5Gയ്ക്ക് ഒപ്പമായിരിക്കും പുതിയ നാർസോ 100x 5G ഇടംപിടിക്കുക. നിലവിലുള്ള ലൈറ്റ് മോഡലിനേക്കാൾ പ്രോസസർ, ക്യാമറ, ബാറ്ററി എന്നീ വിഭാഗങ്ങളിൽ കൂടുതൽ മികച്ച അപ്ഗ്രേഡുകൾ പുതിയ പതിപ്പിൽ പ്രതീക്ഷിക്കുന്നുണ്ട്. നാർസോ 100 ലൈറ്റ് 5Gയിൽ മീഡിയടെക് ഡൈമെൻസിറ്റി 6300 പ്രോസസറും, 144 ഹെർട്സ് റിഫ്രഷ് റേറ്റുള്ള 6.8 ഇഞ്ച് ഡിസ്പ്ലേയും, 13 മെഗാപിക്സൽ ക്യാമറയുമാണ് നൽകിയിരിക്കുന്നത്. പുതിയ നാർസോ 100x 5Gയുടെ വിലയും മറ്റ് ഫീച്ചറുകളും വരും ദിവസങ്ങളിൽ കമ്പനി ഔദ്യോഗികമായി പ്രഖ്യാപിക്കും.
