യുഎഇയിലെ പ്രവാസികൾക്കും സന്ദർശകർക്കും ഏറെ നിർണായകമായ അറിയിപ്പുമായി ഷാർജ പബ്ലിക് പാർക്കിങ് ഡിപ്പാർട്മെന്റ്. എമിറേറ്റിൽ വരാനിരിക്കുന്ന ജൂലൈ ഒന്നുമുതൽ പെയ്ഡ് പാർക്കിങ് സമയക്രമം അർധരാത്രി 12 മണി വരെ നീട്ടാൻ അധികൃതർ തീരുമാനിച്ചു. ഷാർജ സിറ്റി, കൽബ, ഖോർഫുക്കാൻ, ദൈദ് എന്നിവിടങ്ങളിലെ എല്ലാ പെയ്ഡ് പാർക്കിങ് മേഖലകൾക്കും ഈ പുതിയ നിയമം ബാധകമായിരിക്കും. മുൻപ് വ്യത്യസ്ത സമയക്രമങ്ങളുണ്ടായിരുന്ന മഞ്ഞ, നീല നിറങ്ങളിലുള്ള പാർക്കിങ് സോണുകളെല്ലാം ഇനി മുതൽ രാവിലെ 8 മണി മുതൽ അർധരാത്രി 12 മണി വരെ എന്ന ഒരൊറ്റ സമയക്രമത്തിലേക്ക് ഏകീകരിക്കും. അതേസമയം, വെള്ളിയാഴ്ചകളിലും മറ്റ് പൊതു അവധി ദിവസങ്ങളിലും നിലവിലുള്ളതുപോലെ പാർക്കിങ് തികച്ചും സൗജന്യമായിരിക്കും. എന്നാൽ അവധി ദിവസങ്ങളിലും ഫീസ് ഈടാക്കുന്ന പ്രത്യേക പാർക്കിങ് മേഖലകളിൽ ഈ സൗജന്യം ലഭിക്കില്ല.
നഗരത്തിൽ വർധിച്ചുവരുന്ന ജനസാന്ദ്രത, വാണിജ്യ ആവശ്യങ്ങൾ, ടൂറിസം മേഖലയിലെ വൻ വളർച്ച എന്നിവ കണക്കിലെടുത്താണ് പാർക്കിങ് സമയം അർധരാത്രി വരെ നീട്ടിയതെന്ന് പബ്ലിക് പാർക്കിങ് ഡിപ്പാർട്മെന്റ് ഡയറക്ടർ ഹമദ് അൽ ഖായിദ് വ്യക്തമാക്കി. രാത്രി 10 മണിക്ക് ശേഷമുള്ള പാർക്കിങ് ബുദ്ധിമുട്ടുകൾ പരിഹരിക്കുന്നതിനും വാഹനങ്ങൾ അലക്ഷ്യമായി വലിച്ചെറിയുന്ന രീതി തടയുന്നതിനും പുതിയ പരിഷ്കാരം ഏറെ സഹായിക്കും. പാർക്കിങ് സമയം നീട്ടിയെങ്കിലും നിലവിലുള്ള സീസണൽ പാർക്കിങ് പെർമിറ്റുകളുടെ നിരക്കുകളിൽ യാതൊരുവിധ വർധനവും വരുത്തിയിട്ടില്ല എന്നത് വാഹന ഉടമകൾക്ക് വലിയ ആശ്വാസമാണ്.
