പ്രോട്ടീൻ, കാൽസ്യം, വൈറ്റമിനുകൾ തുടങ്ങിയ പോഷകങ്ങളാൽ സമ്പന്നമായ ഒന്നാണ് പാൽ ഉൽപ്പന്നമായ പനീർ. പനീർ ഉപയോഗിച്ചുണ്ടാക്കുന്ന വിഭവങ്ങൾക്ക് രുചി വളരെ കൂടുതലാണ്. റെസ്റ്റോറന്റുകളിൽ കിട്ടുന്ന അതേ രുചിയിൽ, വളരെ എളുപ്പത്തിൽ വീട്ടിൽ പനീർ ടിക്ക തയ്യാറാക്കുന്നത് എങ്ങനെയെന്ന് നമുക്ക് നോക്കാം.
ചേരുവകൾ
പനീർ – 200 ഗ്രാം
ഇഞ്ചി-വെളുത്തുള്ളി പേസ്റ്റ് – 1 ടേബിൾസ്പൂൺ
തൈര് – 2 ടേബിൾസ്പൂൺ
വെണ്ണ – 1 ടേബിൾസ്പൂൺ
മുളകുപൊടി – 2 ടീസ്പൂൺ .
കുരുമുളകുപൊടി – 1/2 ടീസ്പൂൺ
ഗരംമസാല – 2 ടീസ്പൂൺ
മഞ്ഞൾപൊടി – 1 നുള്ള്
ഉപ്പ് – ആവശ്യത്തിന്
തയ്യാറാക്കുന്ന വിധം
ആദ്യം പനീർ ചെറിയ കഷ്ണങ്ങളായി മുറിച്ച് വെയ്ക്കുക. തൈരിലേക്ക് മുളകുപൊടി, കുരുമുളകുപൊടി, ഗരംമസാല, മഞ്ഞൾപൊടി, ഇഞ്ചി-വെളുത്തുള്ളി പേസ്റ്റ്, ഉപ്പ് എന്നിവ ചേർത്ത് നന്നായി യോജിപ്പിച്ച് പേസ്റ്റ് രൂപത്തിലാക്കുക. ഈ മിശ്രിതത്തിലേക്ക് പനീർ ഇട്ട് കുറഞ്ഞത് 20 മിനിറ്റ് വെയ്ക്കുക. ശേഷം ഒരു നോൺ സ്റ്റിക്ക് പാനിൽ 1 ടേബിൾ സ്പൂൺ വെണ്ണ ചൂടാക്കി, അതിലേക്ക് പനീർ കഷ്ണങ്ങൾ ഓരോന്നായി ഇടാം. ചെറുതീയിൽ ഇരുവശവും ബ്രൗണ് നിറമാകുന്നവരെ ഇത് മൊരിച്ചെടുത്താൽ കൊതിയൂറുന്ന പനീര് ടിക്ക റെഡി, ഇനി കഴിച്ചോളൂ.
