അമേരിക്കയുടെ ഭീഷണികൾക്ക് മുന്നിൽ തലകുനിയാതെ, സ്വന്തം മണ്ണിൽ പോരാട്ടവീര്യം വളർത്താൻ ഒരുങ്ങുന്ന വെനിസ്വേല ഇപ്പോൾ ലോക രാജ്യങ്ങൾക്കിടയിൽ ചർച്ചയാകുകയാണ്. കരീബിയൻ കടലിൽ അമേരിക്കൻ യുദ്ധക്കപ്പലുകൾ നിലയുറപ്പിക്കുകയും, പ്രസിഡന്റ് ഡോണൾഡ് ട്രംപ് പുതിയ ഭീഷണികൾ മുഴക്കുകയും ചെയ്തതോടെയാണ് രാജ്യത്തിന്റെ പ്രതിരോധം ശക്തിപ്പെടുത്താൻ വെനിസ്വേല തീരുമാനിച്ചത്. ഒരു മാസമായി തുടരുന്ന സംഘർഷങ്ങൾക്കിടെ, വെനിസ്വേലൻ ജനത തങ്ങളുടെ രാജ്യത്തെ സംരക്ഷിക്കാൻ ആയുധമെടുക്കാൻ തയ്യാറാണെന്ന് പ്രഖ്യാപിച്ചു.
സാധാരണക്കാർക്കായി സംഘടിപ്പിച്ച സൈനിക പരിശീലന ദിനത്തിൽ, ആയുധങ്ങളും തന്ത്രങ്ങളും പഠിച്ച് അവർ അമേരിക്കക്ക് ശക്തമായ സന്ദേശം നൽകി. ഇത് കേവലം സൈനിക നീക്കമല്ല, മറിച്ച് സ്വന്തം രാജ്യത്തിന്റെ പരമാധികാരവും അഭിമാനവും സംരക്ഷിക്കാനുള്ള ഒരു ജനതയുടെ കൂട്ടായ പോരാട്ടമാണ്. “അമേരിക്ക നടത്തുന്നത് ഒരു അപ്രഖ്യാപിത യുദ്ധമാണ്. അവർക്ക് വേണ്ടത് ഞങ്ങളുടെ എണ്ണയും, സ്വർണ്ണവും, വജ്രവുമാണ്” എന്ന് വെനിസ്വേലൻ അധികാരികൾ ഉറച്ച ശബ്ദത്തിൽ പറയുമ്പോൾ, ഭയത്തേക്കാളുപരി പ്രതിരോധത്തിന്റെ തീജ്വാലയാണ് ഓരോ പൗരന്റെയും കണ്ണുകളിൽ കാണാൻ കഴിയുന്നത്.
ജനകീയ പങ്കാളിത്തം
രാജധാനിയിലെ തിരക്കേറിയ പെറ്റാരെ മേഖലയിലെ പ്രധാന അവന്യൂ അടച്ചിട്ടാണ് ആയുധ പരിശീലനം, വിപ്ലവ പ്രതിരോധ തന്ത്രങ്ങൾ, പ്രഥമ ശുശ്രൂഷ, മാസ്ക് ധരിക്കൽ, എന്നീ വിഷയങ്ങളിൽ ജനങ്ങൾക്ക് പരിശീലനം നൽകപ്പെട്ടത്. ഈ വേളയിൽ അവിടെത്തെ പൗരനായ 38 വയസ്സുള്ള ഓഫീസ് ജീവനക്കാരി ലുസ്ബി മോണ്ടെറോള പറഞ്ഞതിങ്ങനെ;“എന്റെ രാജ്യം, എന്റെ മാതൃരാജ്യം, എന്റെ ജനത – അവയെ സംരക്ഷിക്കാൻ വേണ്ടതു പഠിക്കാൻ ഞാൻ ഇവിടെ എത്തി.
എനിക്ക് ഒന്നിനെയും ആരെയും പേടിയില്ല,” 16 വയസ്സുള്ള വിദ്യാർത്ഥി ജോൺ നൊറിഗയും മാതാപിതാക്കളോടൊപ്പം പരിപാടിയിൽ പങ്കെടുത്തു “ എണ്ണ, സ്വർണ്ണം, വജ്രങ്ങൾ നമ്മുടെ വിഭവങ്ങൾക്കായാണ്. അതിനായി ഞങ്ങൾ പോരാടും,” എന്നും അദ്ദേഹം പറഞ്ഞു. കാരക്കാസിന് പുറത്ത് സാൻ ക്രിസ്റ്റൊബാലിലും ബരിനാസിലും പരിശീലന പരിപാടികൾ നടന്നു. എന്നാൽ, പങ്കാളിത്തം പ്രതീക്ഷിച്ചതിനേക്കാൾ കുറവായിരുന്നു.
മഡുറോയുടെ ആഹ്വാനം
2024 ജൂലൈയിൽ നടന്ന വിവാദ പ്രസിഡന്റ്സ് തിരഞ്ഞെടുപ്പിൽ വിജയിച്ച നിക്കോളാസ് മഡുറോ, ഏറെക്കാലമായി സാധാരണക്കാരെ സായുധ പ്രതിരോധത്തിലേക്ക് ആകർഷിക്കാനുള്ള ശ്രമത്തിലാണ്. കഴിഞ്ഞാഴ്ച ആയിരക്കണക്കിന് വളണ്ടിയർമാരെ സൈനിക ബാരക്കുകളിലേക്ക് വിളിച്ചുവരുത്തിയതിനെ തുടർന്ന്, മഡുറോ സായുധ സേനയെ പ്രദേശങ്ങളിലേക്ക് നേരിട്ട് പോകാൻ ഉത്തരവിട്ടിരുന്നു.
സെപ്റ്റംബർ 20 ന് അരഗ്വ സംസ്ഥാനത്തെ ഗ്രാമീണ തൊഴിലാളികളുമായി കൂടിക്കാഴ്ച നടത്തിയ അദ്ദേഹം “അമേരിക്കൻ സാമ്രാജ്യം വെനിസ്വേലയെ ആക്രമിച്ചാൽ ദശലക്ഷക്കണക്കിന് ജനങ്ങൾ ആയുധം എടുത്ത് രാജ്യത്തെ സംരക്ഷിക്കാൻ തയ്യാറാകണം” എന്ന് ജനങ്ങളൊട് പറഞ്ഞു.
കരീബിയൻ കടലിൽ സൈനികാഭ്യാസം
അമേരിക്കൻ കപ്പൽസേനയുടെ ഭീഷണിയെ തുടർന്ന് വെനിസ്വേല ലാ ഓർക്കില ദ്വീപിൽ മൂന്ന് ദിവസത്തെ സൈനികാഭ്യാസവും ആരംഭിച്ചു. സംസ്ഥാന ടെലിവിഷനിൽ, നാവിക കപ്പലുകളോടൊപ്പം മത്സ്യബന്ധന ബോട്ടുകളും തീരങ്ങളിൽ പര്യടനം നടത്തുന്നതിന്റെ ദൃശ്യങ്ങൾ പ്രക്ഷേപിച്ചു.
“ജനവും സായുധ സേനയും ഒരുമിച്ച് സൃഷ്ടിക്കുന്ന യഥാർത്ഥ സൈനിക വിപ്ലവത്തിന്റെ തുടക്കമാണ് ഇന്ന്.”പ്രതിരോധ മന്ത്രി ലോപ്പസ് അഭിപ്രായപ്പെട്ടു.
അമേരിക്കൻ മുന്നറിയിപ്പ്
അമേരിക്കയിൽ അനധികൃതമായി കഴിയുന്ന വെനിസ്വേലൻ കുടിയേറ്റക്കാരെ തിരിച്ചെടുക്കാൻ വിസമ്മതിച്ചാൽ “കണക്കാക്കാൻ കഴിയാത്ത പ്രത്യാഘാതങ്ങൾ” നേരിടേണ്ടിവരുമെന്ന് ട്രംപ് മുന്നറിയിപ്പ് നൽകി. ജനുവരിയിൽ ട്രംപ് അധികാരത്തിലേറിയതിനുശേഷം ഇതുവരെ 13,000-ത്തിലധികം വെനിസ്വേലക്കാരെ അമേരിക്കയിൽ നിന്ന് തിരിച്ചയച്ചതായി കണക്കുകൾ വ്യക്തമാക്കുന്നു. സെപ്റ്റംബർ 11 ന് മാത്രം 185 പേരെ ഒരു അമേരിക്കൻ വിമാനം കാരക്കാസിലേക്ക് കൊണ്ടുവന്നു. അതേസമയം, മഡുറോയുടെ പ്രസംഗങ്ങളുടെ ഭൂരിഭാഗവും ഉൾക്കൊള്ളുന്ന അദ്ദേഹത്തിന്റെ യൂട്യൂബ് ചാനൽ അപ്രത്യക്ഷമായി. കാരക്കാസ് ഭരണകൂടം ഇതുവരെ പ്രതികരിച്ചിട്ടില്ല.
അമേരിക്കൻ-വെനിസ്വേല സംഘർഷം പുതിയ വഴിത്തിരിവിലെത്തി നിൽക്കുകയാണ്. അമേരിക്കൻ ഭീഷണികൾക്ക് മുന്നിൽ രാജ്യത്തിന്റെ പരമാധികാരം സംരക്ഷിക്കാൻ ജനങ്ങളെത്തന്നെ അണിനിരത്തുന്ന വെനിസ്വേലയുടെ നീക്കം ലോകശ്രദ്ധ ആകർഷിക്കുന്ന ഒന്നാണ്. ട്രംപിന്റെ മുന്നറിയിപ്പുകളും കുടിയേറ്റക്കാരെ തിരിച്ചയക്കുന്നതുമെല്ലാം ഈ പ്രതിസന്ധിയുടെ ആഴം വർധിപ്പിക്കുന്നു. സൈനികമായ പോരാട്ടത്തിനപ്പുറം, ഇത് ഒരു രാഷ്ട്രത്തിന്റെ നിലനിൽപ്പിനായുള്ള ജനകീയ പോരാട്ടമായി മാറുമോ എന്ന് വരും ദിവസങ്ങളിൽ കണ്ടറിയാം. എന്തായാലും, ഈ സാഹചര്യത്തിൽ സാധാരണ ജനങ്ങളുടെ പങ്കാളിത്തം നിർണായകമായേക്കാം.
