കേരളീയരുടെ പരമ്പരാഗത നാലുമണി പലഹാരങ്ങളിൽ എക്കാലത്തും മുൻപന്തിയിലാണ് ‘ഇലയട’. സാധാരണയായി ചക്കപ്പഴം കൊണ്ടും നേന്ത്രപ്പഴം കൊണ്ടുമൊക്കെയാണ് നമ്മൾ അട തയ്യാറാക്കാറുള്ളത്. എന്നാൽ സോഷ്യൽ മീഡിയയിലെ ഫുഡ് വ്ലോഗർമാരുടെയും പാചകപ്രേമികളുടെയും ഇടയിൽ ഇപ്പോൾ തരംഗമാകുന്നത് തികച്ചും വ്യത്യസ്തവും സവിശേഷവുമായ ഒരു വിഭവമാണ് ‘മാമ്പഴ ഇലയട’. അധികം ആർക്കും അറിയാത്ത, എന്നാൽ ഒരിക്കൽ കഴിച്ചാൽ വീണ്ടും കഴിക്കാൻ തോന്നുന്ന ഈ മാമ്പഴ അടയുടെ റെസിപ്പി ഇപ്പോൾ ഇൻറർനെറ്റിൽ വൻ ഹിറ്റാണ്.
നല്ല പഴുത്ത മാങ്ങയുടെ മധുരവും ശർക്കരയുടെയും തേങ്ങയുടെയും പാകത്തിന് രുചിയും ചേരുമ്പോൾ ചായയ്ക്കൊപ്പം കഴിക്കാൻ ഇതിലും മികച്ച മറ്റൊരു കോമ്പിനേഷൻ ഇല്ലെന്നാണ് ഫുഡ് ലവേഴ്സ് പറയുന്നത്. വീട്ടിൽ എളുപ്പത്തിൽ തയ്യാറാക്കാൻ സാധിക്കുന്ന ഈ ട്രെൻഡിങ് നാലുമണി പലഹാരത്തിൻ്റെ കൂട്ടുകൾ പരിചയപ്പെടാം.
ആവശ്യമായ സാധനങ്ങൾ
പഴുത്ത മാങ്ങാ അരച്ചത് – 2 മാങ്ങയുടേത്
ശർക്കര – 250 ഗ്രാം
തേങ്ങ ചിരകിയത് – അര മുറി
ഏലക്ക ചതച്ചത് – 5 എണ്ണം
അരിപ്പൊടി – 3 കപ്പ്
റവ – 1 കപ്പ്
നെയ് – 1 ടീസ്പൂൺ
ഉപ്പ്, ഇളംചൂടുവെള്ളം – ആവശ്യത്തിന്
വാഴയില അല്ലെങ്കിൽ വട്ടയില – ആവശ്യത്തിന്
Also Read: പത്ത് ദിവസം കൊണ്ട് അളന്നു തീർത്ത ഒരു മീറ്റർ; യൂറോപ്പ് ഒളിപ്പിച്ച ആ ടൈം ബോംബ് പൊട്ടുമോ?
തയ്യാറാക്കുന്ന വിധം
ഒരു പാത്രത്തിൽ അരിപ്പൊടി, റവ, അരച്ചുവെച്ചിരിക്കുന്ന മാമ്പഴം എന്നിവ എടുക്കുക. ഇതിലേക്ക് ഒരു ടീസ്പൂൺ നെയ്യും ആവശ്യത്തിന് ഉപ്പും ചേർത്ത ശേഷം ഇളം ചൂടുവെള്ളം കുറേശ്ശെയായി ഒഴിച്ച് നല്ല പാകത്തിന് കുഴച്ചെടുക്കുക. മറ്റൊരു പാത്രത്തിൽ ചിരകിയ തേങ്ങ, പൊടിച്ച ശർക്കര, ഏലക്ക ചതച്ചത് എന്നിവ നന്നായി യോജിപ്പിച്ച് ഫില്ലിംഗ് തയ്യാറാക്കി മാറ്റിവെക്കുക. ഇനി വാഴയിലയിലോ വട്ടയിലയിലോ തയ്യാറാക്കിവെച്ചിരിക്കുന്ന മാവ് കട്ടി കുറച്ച് പരത്തുക. ഇതിൻ്റെ നടുവിലായി തേങ്ങ-ശർക്കര കൂട്ട് വെച്ച് ഇല മടക്കുക. ശേഷം അപ്പച്ചെമ്പിൽ വെച്ച് നല്ലപോലെ ആവിയിൽ വേവിച്ചെടുക്കുക. അട നന്നായി വെന്തുവരുമ്പോൾ അടുപ്പിൽ നിന്നും മാറ്റി ചൂടോടെ ചായയ്ക്കൊപ്പം വിളമ്പാം. പരമ്പരാഗത രുചികളെ സ്നേഹിക്കുന്ന മലയാളിക്ക് ഈ മാമ്പഴക്കാലത്ത് പരീക്ഷിക്കാൻ പറ്റിയ ഏറ്റവും മികച്ച വിഭവമാണിത്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (AI SOURCES)
