നല്ല ഉള്ളടക്കമുണ്ടെങ്കിൽ സൂപ്പർതാരങ്ങളില്ലെങ്കിലും പ്രേക്ഷകർ സിനിമയെ നെഞ്ചിലേറ്റുമെന്ന് തെളിയിച്ചിരിക്കുകയാണ് ‘പ്രകമ്പനം’. ഗണപതി, സാഗർ സൂര്യ, അൽ അമീൻ എന്നിവർ കേന്ദ്രകഥാപാത്രങ്ങളായെത്തിയ ഈ ഹൊറർ കോമഡി ചിത്രം ബോക്സ് ഓഫീസിൽ വലിയ ചലനം സൃഷ്ടിച്ചതിന് പിന്നാലെ ഇപ്പോൾ ഒടിടിയിലും സജീവമാകുകയാണ്. സീ5 പ്ലാറ്റ്ഫോമിലൂടെയാണ് ചിത്രം ഡിജിറ്റൽ സ്ട്രീമിംഗ് ആരംഭിച്ചിരിക്കുന്നത്.
ബോക്സ് ഓഫീസിൽ തരംഗം
ജനുവരി 30-ന് തിയേറ്ററുകളിലെത്തിയ ചിത്രം ഇതിനോടകം ആഗോള ബോക്സ് ഓഫീസിൽ നിന്ന് 21.3 കോടിയിലേറെ രൂപ സ്വന്തമാക്കിയതായി നിർമ്മാതാക്കൾ അറിയിച്ചു. ‘നദികളിൽ സുന്ദരി യമുന’യ്ക്ക് ശേഷം വിജേഷ് പാണത്തൂർ സംവിധാനം ചെയ്ത ഈ ചിത്രം എല്ലാ പ്രായക്കാരെയും ഒരുപോലെ രസിപ്പിച്ചതാണ് ഇത്രയും വലിയ വിജയത്തിന് കാരണമായത്. എറണാകുളത്തെ ഒരു ക്യാമ്പസും കണ്ണൂരും പശ്ചാത്തലമാക്കി ഒരുക്കിയ ഈ എന്റർടെയ്നറിൽ ശീതൾ ജോസഫാണ് നായിക.
Also Read:‘അയാൾ മോശമായി പെരുമാറി, നോ പറഞ്ഞപ്പോൾ എനിക്കെതിരെ കേസ് കൊടുത്തു’; ലാവണ്യ ത്രിപാഠി
ചിരിയുടെ പ്രകമ്പനം
കാർത്തിക് സുബ്ബരാജിന്റെ സ്റ്റോൺ ബെഞ്ച് സ്റ്റുഡിയോസും നവരസ ഫിലിംസും ചേർന്നാണ് ചിത്രം അവതരിപ്പിച്ചത്. മല്ലിക സുകുമാരൻ, രാജേഷ് മാധവൻ, അസീസ് നെടുമങ്ങാട് തുടങ്ങി വലിയൊരു താരനിരയ്ക്കൊപ്പം പ്രമുഖ ഇൻഫ്ലുവൻസേഴ്സും ചിത്രത്തിൽ വേഷമിടുന്നുണ്ട്. മല്ലിക സുകുമാരന്റെ ‘അച്ഛമ്മ’ കഥാപാത്രവും പിള്ളേരും ചേർന്നൊരുക്കിയ ചിരിയുടെ പൊടിപൂരമാണ് ചിത്രത്തിന്റെ ഹൈലൈറ്റ്.
