ഇന്ത്യൻ വിപണിയിൽ തങ്ങളുടെ സാന്നിധ്യം ശക്തമാക്കുന്നതിന്റെ ഭാഗമായി രണ്ട് പുതിയ യൂട്ടിലിറ്റി വാഹനങ്ങൾ അവതരിപ്പിക്കാൻ നിസാൻ ഇന്ത്യ ഒരുങ്ങുന്നു. ‘ഗ്രാവൈറ്റ്’ (Gravite) എന്ന് പേരിട്ടിരിക്കുന്ന സബ്കോംപാക്റ്റ് എംപിവിയും, ‘ടെക്ടൺ’ (Tecton) എന്ന മിഡ്സൈസ് എസ്യുവിയുമാണ് നിസാൻ പുറത്തിറക്കുന്നത്. ഇതിൽ ഗ്രാവൈറ്റ് 2026 ജനുവരി 21-ന് ഔദ്യോഗികമായി പ്രദർശിപ്പിക്കുകയും മാർച്ചിൽ വിപണിയിൽ എത്തുകയും ചെയ്യും. പുത്തൻ റെനോ ഡസ്റ്ററിനെ അടിസ്ഥാനമാക്കി നിർമ്മിക്കുന്ന ടെക്ടൺ ഫെബ്രുവരി 4-ന് അവതരിപ്പിക്കും; ഇതിന്റെ വിപണി പ്രവേശം 2026 ജൂണിലായിരിക്കും.
നിസാൻ ഗ്രാവൈറ്റ് എംപിവി
കുടുംബ കാർ വാങ്ങുന്നവരെ ലക്ഷ്യം വെച്ചെത്തുന്ന ഗ്രാവൈറ്റ്, റെനോ ട്രൈബറിന്റെ പുതുക്കിയ പതിപ്പായിരിക്കും. എൽ-ആകൃതിയിലുള്ള ഡിആർഎല്ലുകൾ (DRL), നിസാന്റെ സിഗ്നേച്ചർ ഗ്രിൽ, സിൽവർ ഇൻസേർട്ടുകളുള്ള ബമ്പർ, പുതിയ അലോയ് വീലുകൾ എന്നിവ ഈ വാഹനത്തിന്റെ പ്രത്യേകതകളാണ്. ഇന്റീരിയറിൽ ട്രൈബറിന് സമാനമായ ലേഔട്ട് ആയിരിക്കുമെങ്കിലും വ്യത്യസ്തമായ തീം പ്രതീക്ഷിക്കാം. 72 bhp കരുത്തും 96 Nm ടോർക്കും നൽകുന്ന 1.0 ലിറ്റർ 3-സിലിണ്ടർ പെട്രോൾ എഞ്ചിനായിരിക്കും ഇതിൽ ഉണ്ടാവുക. 5-സ്പീഡ് മാനുവൽ, എഎംടി (AMT) ഗിയർബോക്സ് ഓപ്ഷനുകളിൽ ഇത് ലഭ്യമാകും.
Also Read: രാത്രി ഡ്രൈവിംഗ് പേടിയാണോ? ഇനി ടെൻഷൻ വേണ്ട; സുരക്ഷിത യാത്രയ്ക്കായി ഇതാ 5 വഴികൾ
നിസാൻ ടെക്റ്റൺ എസ്യുവി
നിസാൻ പട്രോളിൽ നിന്ന് പ്രചോദനം ഉൾക്കൊണ്ട് രൂപകൽപ്പന ചെയ്ത ബോൾഡ് ആയ ലുക്കിലായിരിക്കും ടെക്ടൺ എത്തുന്നത്. സി ആകൃതിയിലുള്ള വലിയ ഗ്രില്ല്, കണക്റ്റഡ് എൽഇഡി ഹെഡ്ലാമ്പുകൾ, സ്പോർട്ടി ബമ്പർ എന്നിവ ഇതിന് ഒരു കരുത്തുറ്റ ഭാവം നൽകുന്നു. സിൽവർ റൂഫ് റെയിലുകൾ, മൾട്ടി-സ്പോക്ക് അലോയ് വീലുകൾ, കണക്റ്റഡ് എൽഇഡി ടെയിൽലാമ്പുകൾ എന്നിവയും ഈ എസ്യുവിയിലുണ്ടാകും. ടർബോചാർജ്ഡ് പെട്രോൾ എഞ്ചിൻ മാത്രമായിരിക്കും ടെക്ടണിൽ ലഭ്യമാകുക. മാനുവൽ, ഓട്ടോമാറ്റിക് ഗിയർബോക്സ് ഓപ്ഷനുകൾ ഇതിൽ പ്രതീക്ഷിക്കാം.
