ഏറ്റവും പുതിയ നോവ സീരീസ് സ്മാർട്ട്ഫോണുകളായ നോവ 16 പ്രോ, നോവ 16 അൾട്രാ എന്നിവ ചൈനയിൽ ഔദ്യോഗികമായി അവതരിപ്പിച്ചു. നോവ 16, നോവ 16z എന്നീ മോഡലുകൾക്കൊപ്പമാണ് ഈ പ്രീമിയം ഫോണുകൾ വിപണിയിലെത്തുന്നത്. ശക്തമായ കിരിൻ 9010S പ്രോസസർ, 7,000mAh ശേഷിയുള്ള കൂറ്റൻ ബാറ്ററി, 200 മെഗാപിക്സൽ ക്യാമറ എന്നിവയാണ് ഈ ഫോണുകളുടെ പ്രധാന ആകർഷണങ്ങൾ.
ഇരു മോഡലുകളിലും 6.84 ഇഞ്ച് വലിപ്പമുള്ള ഫുൾ HD+ OLED LTPO ഡിസ്പ്ലേയാണ് നൽകിയിരിക്കുന്നത്. 1Hz മുതൽ 120Hz വരെ അഡാപ്റ്റീവ് റിഫ്രഷ് റേറ്റ് പിന്തുണയ്ക്കുന്ന ഈ സ്ക്രീൻ 2160Hz PWM ഡിമ്മിംഗും വാവേയുടെ കുൻലുൻ ഗ്ലാസ് സംരക്ഷണവും വാഗ്ദാനം ചെയ്യുന്നു.
ക്യാമറ വിഭാഗത്തിൽ ഇരു ഫോണുകളും വലിയ മുന്നേറ്റമാണ് നടത്തുന്നത്. 200 മെഗാപിക്സൽ RYYB പ്രൈമറി സെൻസർ, 50 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറ, 50 മെഗാപിക്സൽ അൾട്രാ വൈഡ് മാക്രോ ലെൻസ് എന്നിവ ഉൾപ്പെടുന്ന ക്വാഡ് റിയർ ക്യാമറ സംവിധാനമാണ് ഒരുക്കിയിരിക്കുന്നത്. കൂടാതെ, ചിത്രങ്ങളുടെ നിറം കൃത്യമാക്കുന്നതിനായി റെഡ് മാപ്പിൾ കളർ സെൻസറും ഉൾപ്പെടുത്തിയിട്ടുണ്ട്. മുൻവശത്ത് 50 മെഗാപിക്സൽ പോർട്രെയിറ്റ് ക്യാമറയും നൽകിയിട്ടുണ്ട്.
ബാറ്ററി ശേഷിയിലും ചാർജിങ് സാങ്കേതികവിദ്യയിലും മികച്ച പ്രകടനമാണ് ഫോണുകൾ കാഴ്ചവെക്കുന്നത്. 7,000mAh ബാറ്ററിയോടൊപ്പം 100W വയർഡ് ഫാസ്റ്റ് ചാർജിങ് പിന്തുണ ലഭ്യമാണ്. നോവ 16 അൾട്രായിൽ 50W വയർലെസ് ചാർജിംഗും 7.5W റിവേഴ്സ് വയർലെസ് ചാർജിംഗും അധികമായി ഉൾപ്പെടുത്തിയിട്ടുണ്ട്. ഡസ്റ്റ്, വാട്ടർ റെസിസ്റ്റൻസിന്റെ കാര്യത്തിൽ നോവ 16 പ്രോയ്ക്ക് IP65 റേറ്റിംഗും നോവ 16 അൾട്രായ്ക്ക് കൂടുതൽ മെച്ചപ്പെട്ട IP68, IP69 റേറ്റിംഗുകളും ലഭിച്ചിട്ടുണ്ട്. വൈ-ഫൈ 7, ബ്ലൂടൂത്ത് 6, എൻഎഫ്സി തുടങ്ങിയ ആധുനിക കണക്റ്റിവിറ്റി സംവിധാനങ്ങളും ഫോണുകളിൽ ലഭ്യമാണ്.
വിലയുടെ കാര്യത്തിൽ നോവ 16 പ്രോയുടെ അടിസ്ഥാന മോഡലിന് 3,899 യുവാൻ (ഏകദേശം 54,000 രൂപ) മുതലും, നോവ 16 അൾട്രായുടെ പ്രാരംഭ വില 4,699 യുവാൻ (ഏകദേശം 65,000 രൂപ) മുതലുമാണ് ആരംഭിക്കുന്നത്. സ്മാർട്ട്ഫോൺ രംഗത്ത് പുതിയ മാനദണ്ഡങ്ങൾ സൃഷ്ടിക്കാനാണ് വാവേയുടെ ഈ നീക്കം.
