ന്യൂഡൽഹി: പ്രധാനമന്ത്രി ‘എല്ലാം ശരിയാണ്’ എന്ന് പറയുമ്പോഴും രാജ്യത്ത് അവശ്യസാധനങ്ങളുടെ വില ഉയരുകയാണെന്ന വിമർശനവുമായി കോൺഗ്രസ്. മൊത്തവില സൂചിക അടിസ്ഥാനമാക്കിയുള്ള പണപ്പെരുപ്പം ഉയർന്നതും തൊഴിലാളികളുടെ യഥാർഥ വേതനം ഇടിഞ്ഞതുമാണ് കേന്ദ്ര സർക്കാരിനെതിരെ കോൺഗ്രസ് ഉന്നയിക്കുന്ന പ്രധാന ആരോപണങ്ങൾ. തുടർച്ചയായ നാല് മാസമായി മൊത്തവില പണപ്പെരുപ്പം 10 ശതമാനത്തോട് ചേർന്ന് തുടരുകയാണെന്നും കോൺഗ്രസ് ജനറൽ സെക്രട്ടറി ജയറാം രമേശ് എക്സിൽ പങ്കുവെച്ച കുറിപ്പിൽ പറഞ്ഞു.
സെന്റർ ഫോർ മോണിറ്ററിങ് ഇന്ത്യൻ ഇക്കോണമിയുടെ കണക്കുകൾ ചൂണ്ടിക്കാട്ടി, ഏപ്രിലിന് ശേഷം പണപ്പെരുപ്പം ക്രമീകരിച്ച വേതനത്തിൽ 5.7 ശതമാനം ഇടിവുണ്ടായതായി ജയറാം രമേശ് പറഞ്ഞു. ഗ്രാമീണ മേഖലയിൽ വേതനത്തിലുണ്ടായ ഇടിവ് ഒൻപത് ശതമാനമാണെന്നും അദ്ദേഹം വ്യക്തമാക്കി. സർക്കാർ കണക്കുകൾ പ്രകാരം ജൂലൈയിലെ 9.78 ശതമാനത്തിൽനിന്ന് ഓഗസ്റ്റിൽ മൊത്തവില പണപ്പെരുപ്പം 9.92 ശതമാനമായി ഉയർന്നു. ഭക്ഷ്യ പണപ്പെരുപ്പം 6.65 ശതമാനത്തിൽനിന്ന് 7.05 ശതമാനമായും നിർമാണ മേഖലയിലെ പണപ്പെരുപ്പം 8.29 ശതമാനത്തിൽനിന്ന് 8.37 ശതമാനമായും വർധിച്ചു.
ALSO READ: ഉത്സവകാലത്ത് യാത്രക്കാരെ ‘പിഴിഞ്ഞ്’ സ്വകാര്യ ബസുകൾ! 5000 വരെ നിരക്ക്, 400 ബസുകൾക്ക് 10.31 ലക്ഷം പിഴ
പ്രധാനമന്ത്രി നരേന്ദ്ര മോദി നിരന്തരം ‘എല്ലാം ശരിയാണ്’ എന്ന സന്ദേശം നൽകുമ്പോഴും യാഥാർഥ്യത്തിൽ രാജ്യത്ത് ‘എല്ലാം വിലകൂടിയതാണ്’ എന്നായിരുന്നു ജയറാം രമേശിന്റെ പരിഹാസം. അവശ്യസാധനങ്ങളുടെ വിലക്കയറ്റം കാരണം ദശലക്ഷക്കണക്കിന് കുടുംബങ്ങൾ ദുരിതമനുഭവിക്കുകയാണെന്നും അദ്ദേഹം ആരോപിച്ചു. അതേസമയം, പണപ്പെരുപ്പത്തിന്റെയും വേതനത്തിന്റെയും കണക്കുകൾ ചൂണ്ടിക്കാട്ടിയാണ് കേന്ദ്രത്തിന്റെ സാമ്പത്തിക നയങ്ങളെ കോൺഗ്രസ് ചോദ്യം ചെയ്യുന്നത്.
