ന്യൂഡല്‍ഹി: തായ്ലന്ഡില് ആദ്യ റീജണല്‍ ഡാറ്റാ സെന്റര്‍ ആരംഭിക്കാന്‍ മൈക്രോസോഫ്റ്റ്. ആര്‍ട്ടിഫിഷ്യല്‍ ഇന്റലിജന്‍സ് സംവിധാനങ്ങള്‍ക്ക് ഉള്‍പ്പടെ പ്രവര്‍ത്തിക്കാനാവുന്ന ഡാറ്റാ സെന്ററാണ് കമ്പനി ചൊവ്വാഴ്ച പ്രഖ്യാപിച്ചത്. തായ്ലന്ഡില് എഐ രംഗത്ത് ഒരു ലക്ഷത്തിലേറെ പേര്‍ക്ക് ഇതുവഴി അവസരം ലഭിക്കുമെന്നും രാജ്യത്ത് വളര്‍ന്നുവരുന്ന ഡെവലപ്പര്‍ സമൂഹത്തിന് ഇത് പിന്തുണ നല്‍കുമെന്നും മൈക്രോസോഫ്റ്റ് പറഞ്ഞു. ബാങ്കോക്കില്‍ നടന്ന ‘മൈക്രോസോഫ്റ്റ് ബില്‍ഡ് എഐ ഡേ’ എന്ന പരിപാടിയില്‍ വെച്ച് മൈക്രോസോഫ്റ്റ് മേധാവി സത്യ നദെല്ലയും തായ്‌ലന്‍ഡ് പ്രധാനമന്ത്രി ശെത്ത താവിസിനും തമ്മിലുള്ള കൂടികാഴ്ച്ചയിലായിരുന്നു പ്രഖ്യാപനം.
മൈക്രോസോഫ്റ്റിന്റെ ക്ലൗഡ് സേവനങ്ങളുടെ ലഭ്യത വര്‍ധിപ്പിക്കാന്‍ ഈ ഡാറ്റാ സെന്ററിന്റെ പിന്തുണയോടെ സാധിക്കും. കമ്പനികള്‍ക്ക് ഡാറ്റ സൂക്ഷിക്കാനും, മികച്ച വേഗത്തിലുള്ള കമ്പ്യൂട്ടിങ് സാധ്യമാക്കാനും ഈ ഡാറ്റാ സെന്റര്‍ സഹായകമാവും ഡാറ്റാ സെന്ററിന് പുറമെ തായ്ലന്ഡില് ക്ലൗഡ്, എഐ സൗകര്യങ്ങള്‍ ഒരുക്കുന്നതിനും എഐ നൈപുണ്യ വികസനത്തിനും വേണ്ടിയുള്ള നിക്ഷേപവും മൈക്രോസോഫ്റ്റ് നടത്തും. തായ്‌ലന്‍ഡിലെ പൊതു, സ്വകാര്യ മേഖലയ്ക്ക് ആവശ്യമായ പിന്തുണ നല്‍കുമെന്നും മൈക്രോസോഫ്റ്റ് മേധാവി സത്യ നദെല്ല പറഞ്ഞു.എഐ സാങ്കേതിക വിദ്യകളുടെ പിന്‍ബലത്തിലുള്ള പുതിയ സാമ്പത്തിക, ഉല്പാദന അവസരങ്ങള്‍ പ്രയോജനപ്പെടുത്താന്‍ തായ്‌ലന്‍ഡിന് സാധിക്കും. ഇതോടൊപ്പം, ഇന്‍ഡൊനീഷ്യയില്‍ അടുത്ത നാല് വര്‍ഷം കൊണ്ട് 170 കോടി ഡോളര്‍ ചെലവിട്ട് പുതിയ ക്ലൗഡ്, എഐ അടിസ്ഥാനസൗകര്യം ഒരുക്കുമെന്നും മൈക്രോസോഫ്റ്റ് ചൊവ്വാഴ്ച പ്രഖ്യാപിച്ചു.
