യു.എ.ഇയിലെ വ്യോമയാന, ഊർജ്ജ, ഉന്നത വിദ്യാഭ്യാസ മേഖലകളെ ലക്ഷ്യമിട്ടുണ്ടായ വിപുലമായ സൈബർ ആക്രമണ ശ്രമങ്ങൾ വിജയകരമായി പ്രതിരോധിച്ച് യു.എ.ഇ ദേശീയ സൈബർ സുരക്ഷാ കൗൺസിൽ. ഡിജിറ്റൽ സുരക്ഷാ സംവിധാനങ്ങളുടെ കൃത്യസമയത്തുള്ള ഇടപെടൽ മൂലം രാജ്യത്തെ പ്രധാന അടിസ്ഥാന സൗകര്യങ്ങൾക്കോ വിവരങ്ങൾക്കോ യാതൊരുവിധ നാശനഷ്ടങ്ങളും സംഭവിച്ചിട്ടില്ലെന്ന് അധികൃതർ സ്ഥിരീകരിച്ചു.
ദേശീയ സൈബർ സുരക്ഷാ കൗൺസിലിന്റെ സാങ്കേതിക വിഭാഗങ്ങൾ ആക്രമണ ശ്രമങ്ങൾ തത്സമയം കണ്ടെത്തുകയും പ്രതിരോധ ശൃംഖല ഉടനടി സജ്ജമാക്കുകയുമായിരുന്നു. വ്യോമയാന ഗതാഗത നിയന്ത്രണ സംവിധാനങ്ങൾ, ഊർജ്ജ വിതരണ ശൃംഖലകൾ, സർവ്വകലാശാലാ ഡാറ്റാബേസുകൾ എന്നിവയിലേക്ക് അനുമതിയില്ലാതെ പ്രവേശിക്കാനുള്ള ശ്രമങ്ങളാണ് പരാജയപ്പെടുത്തിയത്. അത്യാധുനിക സാങ്കേതികവിദ്യയും എ.ഐ അധിഷ്ഠിത നിരീക്ഷണ സംവിധാനങ്ങളും ഉപയോഗിച്ച് ആക്രമണങ്ങളുടെ ഉറവിടങ്ങൾ നശിപ്പിച്ചതിനാൽ എല്ലാ മേഖലകളിലെയും പ്രവർത്തനങ്ങൾ തടസ്സമില്ലാതെ തുടരുന്നുണ്ട്.
സൈബർ ഭീഷണികൾ വർദ്ധിച്ചുവരുന്ന സാഹചര്യത്തിൽ സർക്കാർ, സ്വകാര്യ സ്ഥാപനങ്ങൾ പൂർണ്ണ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. ഡിജിറ്റൽ സംവിധാനങ്ങളുടെ പാസ്വേഡുകളും സുരക്ഷാ കോഡുകളും ശക്തമാക്കാനും സോഫ്റ്റ്വെയറുകൾ കൃത്യമായി അപ്ഡേറ്റ് ചെയ്യാനും നിർദ്ദേശമുണ്ട്. അന്താരാഷ്ട്ര സുരക്ഷാ ഏജൻസികളുമായി സഹകരിച്ച് ആക്രമണങ്ങളുടെ ഉറവിടം കണ്ടെത്താനുള്ള സമഗ്രമായ പരിശോധനകൾ നിലവിൽ പുരോഗമിക്കുകയാണ്.
