ന്യൂഡൽഹി: ഇന്ത്യൻ വാഹന വിപണിയിലെ എംപിവി വിഭാഗത്തിൽ തങ്ങളുടെ ആധിപത്യം വീണ്ടും ഉറപ്പിച്ച് മാരുതി സുസുക്കി എർട്ടിഗ. 2026 ജനുവരിയിലെ വിൽപ്പന കണക്കുകൾ പുറത്തുവരുമ്പോൾ, മഹീന്ദ്ര സ്കോർപിയോയെയും ടൊയോട്ട ഇന്നോവയെയും പിന്നിലാക്കി എർട്ടിഗ ഒന്നാം സ്ഥാനം നിലനിർത്തി. കഴിഞ്ഞ മാസം മാത്രം 17,892 യൂണിറ്റുകളാണ് നിരത്തിലിറങ്ങിയത്. രാജ്യത്തെ ഏറ്റവും കൂടുതൽ വിറ്റഴിക്കപ്പെടുന്ന ആദ്യ പത്ത് കാറുകളുടെ പട്ടികയിൽ അഞ്ചാം സ്ഥാനം സ്വന്തമാക്കിയ ഈ 7 സീറ്റർ മോഡൽ, മധ്യവർഗ കുടുംബങ്ങളുടെ പ്രിയവാഹനമായി തുടരുകയാണ്. 8.80 ലക്ഷം രൂപ മുതലുള്ള ആകർഷകമായ പ്രാരംഭ വിലയാണ് എർട്ടിഗയുടെ പ്രധാന കരുത്ത്.
Also Read: മദ്യപിച്ച് വണ്ടിയോടിച്ചാൽ ലൈസൻസ് ‘പുകയാകും’; നടപടി നേരിട്ടത് 3300-ലധികം പേർ!
മികച്ച ഇന്ധനക്ഷമതയാണ് എർട്ടിഗയെ എതിരാളികളിൽ നിന്ന് വ്യത്യസ്തമാക്കുന്നത്. 1.5 ലിറ്റർ, 4-സിലിണ്ടർ നാച്ചുറലി ആസ്പിറേറ്റഡ് എഞ്ചിൻ കരുത്തേകുന്ന വാഹനം 102 bhp പവറും 136 Nm ടോർക്കും വാഗ്ദാനം ചെയ്യുന്നു. പെട്രോൾ വേരിയന്റിൽ ലിറ്ററിന് 20.51 കിലോമീറ്റർ മൈലേജ് ലഭിക്കുമ്പോൾ, സിഎൻജി മോഡലിൽ കിലോയ്ക്ക് 26.11 കിലോമീറ്റർ എന്ന അസാമാന്യ മൈലേജാണ് കമ്പനി വാഗ്ദാനം ചെയ്യുന്നത്. ടൊയോട്ട റൂമിയോൺ, കിയ കാരെൻസ്, റെനോ ട്രൈബർ എന്നിവയുമായി മത്സരിക്കുമ്പോഴും ഇന്ധന ലാഭവും കുറഞ്ഞ പരിപാലന ചിലവും എർട്ടിഗയ്ക്ക് വലിയ മൈലേജ് നൽകുന്നു.
യാത്രക്കാരുടെ സൗകര്യം മുൻനിർത്തി കാറിന്റെ ഉൾവശത്തും ലുക്കിലും പുത്തൻ മാറ്റങ്ങൾ മാരുതി വരുത്തിയിട്ടുണ്ട്. സാധാരണ മേൽക്കൂരയിൽ കാണപ്പെടുന്ന എസി വെന്റുകൾക്ക് പകരം, പുതിയ മോഡലിൽ സെന്റർ കൺസോളിന്റെ പിന്നിലായാണ് രണ്ടാം നിരക്കാർക്കുള്ള എസി വെന്റുകൾ സജ്ജീകരിച്ചിരിക്കുന്നത്. രണ്ടാം നിരയിലെയും മൂന്നാം നിരയിലെയും യാത്രക്കാർക്കായി യുഎസ്ബി ടൈപ്പ്-സി ചാർജിംഗ് പോർട്ടുകളും പുതുതായി ചേർത്തിട്ടുണ്ട്. പുറംമോടിയിൽ, ഇരുവശത്തും ഉയർത്തിയ അരികുകളുള്ള പുനർരൂപകൽപ്പന ചെയ്ത റിയർ സ്പോയിലർ വാഹനത്തിന് കൂടുതൽ സ്പോർട്ടി ലുക്ക് നൽകുന്നു.
സാങ്കേതിക മികവിലും സുരക്ഷയിലും ഒട്ടും പിന്നിലല്ല 2025-26 പതിപ്പ്. ഏഴ് ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, ആർക്കാമിസ് പ്രീമിയം സൗണ്ട് സിസ്റ്റം എന്നിവ വിനോദത്തിനായി ഒരുക്കിയിട്ടുണ്ട്. സുരക്ഷയ്ക്കായി ഇലക്ട്രോണിക് സ്റ്റെബിലിറ്റി പ്രോഗ്രാം, ഹിൽ ഹോൾഡ്, ഇബിഡി സഹിതമുള്ള എബിഎസ്, റിയർ പാർക്കിംഗ് ക്യാമറ എന്നിവയും ഉൾപ്പെടുത്തിയിരിക്കുന്നു. ടോപ്പ് വേരിയന്റുകളിൽ സുസുക്കി കണക്റ്റ് വഴിയുള്ള നൂതന കണക്റ്റിവിറ്റി ഫീച്ചറുകളും ലഭ്യമാണ്.
