പടിഞ്ഞാറൻ ഇറാഖിൽ അമേരിക്കൻ വ്യോമസേനയുടെ ഇന്ധനം നിറയ്ക്കുന്ന വിമാനമായ കെസി-135 തകർന്നുവീണു. വ്യാഴാഴ്ചയാണ് സംഭവം നടന്നതെന്ന് യുഎസ് സെൻട്രൽ കമാൻഡ് സ്ഥിരീകരിച്ചു. വിമാനം തകർന്നത് ശത്രുക്കളുടെ വെടിയേറ്റോ അബദ്ധത്തിൽ സ്വന്തം സേനയുടെ വെടിയേറ്റോ അല്ലെന്ന് സൈനിക പ്രസ്താവനയിൽ വ്യക്തമാക്കുന്നു. ദൗത്യത്തിൽ പങ്കെടുത്ത രണ്ടാമത്തെ വിമാനം സുരക്ഷിതമായി ലാൻഡ് ചെയ്തിട്ടുണ്ട്.
മിഡിൽ ഈസ്റ്റിൽ യുദ്ധം ആരംഭിച്ചതിന് ശേഷം അമേരിക്കയ്ക്ക് നഷ്ടമാകുന്ന നാലാമത്തെ സൈനിക വിമാനമാണിത്. 60 വർഷത്തിലേറെ പഴക്കമുള്ള കെസി-135 വിമാനങ്ങളിൽ സാധാരണയായി പൈലറ്റും കോ-പൈലറ്റും ഇന്ധനം നിറയ്ക്കാൻ സഹായിക്കുന്ന ബൂം ഓപ്പറേറ്ററും ഉൾപ്പെടെ മൂന്ന് ക്രൂ അംഗങ്ങളാണ് ഉണ്ടാകാറുള്ളത്. എന്നാൽ ആവശ്യമെങ്കിൽ 37 യാത്രക്കാരെ വരെ വഹിക്കാനുള്ള ശേഷി ഈ വിമാനത്തിനുണ്ട്. അപകടസമയത്ത് വിമാനത്തിൽ എത്രപേരുണ്ടായിരുന്നു എന്ന കാര്യത്തിൽ അന്വേഷണം നടക്കുകയാണ്.
Also Read: കരയുദ്ധം തൊട്ടരികെ! ലെബനനെതിരെ കടുത്ത മുന്നറിയിപ്പുമായി നെതന്യാഹു; ബെയ്‌റൂട്ടിൽ ബോംബുവർഷം
ഫെബ്രുവരി 28-ന് യുദ്ധം തുടങ്ങിയ സമയത്ത് കുവൈറ്റ് സേനയുടെ ഭാഗത്തുനിന്നുണ്ടായ പിഴവിൽ അമേരിക്കയുടെ മൂന്ന് എഫ്-15ഇ യുദ്ധവിമാനങ്ങൾ അബദ്ധത്തിൽ വെടിവെച്ചിട്ടിരുന്നു. എന്നാൽ ആ സംഭവത്തിൽ ആറ് ക്രൂ അംഗങ്ങളെയും സുരക്ഷിതമായി പുറത്തെത്തിക്കാൻ സാധിച്ചിരുന്നു. ഇറാനിയൻ മിസൈലുകൾക്കും ഡ്രോണുകൾക്കും എതിരായ പോരാട്ടത്തിനിടയിലായിരുന്നു ആ സംഭവം നടന്നതെന്ന് സൈന്യം നേരത്തെ വ്യക്തമാക്കിയിരുന്നു.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
