യുഎഇയിൽ മാനവവിഭവശേഷി സ്വദേശിവത്കരണ മന്ത്രാലയത്തിന്റെ സേവന ഫീസുകളും അഡ്മിനിസ്ട്രേറ്റീവ് പിഴകളും ഇനി തവണകളായി അടയ്ക്കാൻ സൗകര്യം. പ്രമുഖ ഡിജിറ്റൽ പേയ്‌മെന്റ് പ്ലാറ്റ്‌ഫോമായ ‘ടാബി’യുമായി സഹകരിച്ചാണ് മന്ത്രാലയം ഈ പുതിയ പദ്ധതിയൊരുക്കിയിരിക്കുന്നത്. സ്ഥാപനങ്ങൾക്കും വ്യക്തികൾക്കും ഒരുമിച്ച് പണമടയ്ക്കുമ്പോഴുള്ള സാമ്പത്തിക ഭാരം കുറയ്ക്കാൻ ലക്ഷ്യമിടുന്ന ഈ പദ്ധതി വഴി 4 മുതൽ 12 മാസം വരെയുള്ള ഗഡുക്കളായി അടയ്ക്കാനാകും. ഒരു ഇടപാടിൽ പരമാവധി 20,000 ദിർഹം വരെയാണ് ഈ സൗകര്യം വഴി അടയ്ക്കാൻ സാധിക്കുക.
എമിറേറ്റ്സ് എൻബിഡി, അബുദാബി കൊമേഴ്സ്യൽ ബാങ്ക്, മഷ്റേഖ് ബാങ്ക്, ഫസ്റ്റ് അബുദാബി ബാങ്ക് ഉൾപ്പെടെയുള്ള രാജ്യത്തെ 8 മുൻനിര ബാങ്കുകളുടെ ക്രെഡിറ്റ് കാർഡുകൾ ഉപയോഗിച്ച് ഈ ആനുകൂല്യം ലഭ്യമാക്കാം. കുറഞ്ഞത് 500 ദിർഹം മുതലുള്ള തുകകൾ ബാങ്കുകൾ വഴി ഇൻസ്റ്റാൾമെന്റുകളാക്കി മാറ്റാൻ സാധിക്കും. ലേബർ പെർമിറ്റുകൾ, വർക്ക് വിസ പുതുക്കൽ, അഡ്മിനിസ്ട്രേറ്റീവ് പിഴകൾ എന്നിവ ഒന്നിച്ച് അടയ്ക്കാൻ പ്രയാസപ്പെടുന്ന തൊഴിലുടമകൾക്കും ജീവനക്കാർക്കും പുതിയ തീരുമാനം ഏറെ ആശ്വാസകരമാകും.
