പാലക്കാട്: മണ്ണാര്ക്കാട് പനയംപാടത്ത് ലോറി മറിഞ്ഞ് നാല് വിദ്യാര്ത്ഥികള് മരിച്ച സംഭവത്തില് ലോറിയുടെ ഡ്രൈവറും ക്ലീനറും കസ്റ്റഡിയില്. അപകടത്തില് പരിക്കേറ്റ് ആശുപത്രിയില് ചികിത്സയിലുള്ള ഇരുവരെയും പൊലീസ് ചോദ്യം ചെയ്തുവരുകയാണ്. കാസര്കോട് സ്വദേശികളായ ലോറിയുടെ ഡ്രൈവര് മഹേന്ദ്ര പ്രസാദ്, ക്ലീനര് വര്ഗീസ് എന്നിവരാണ് കസ്റ്റഡിയിലുള്ളത്. അപകടത്തില് വര്ഗീസിന്റെ കാലിന് പൊട്ടലുണ്ട്. മഹേന്ദ്ര പ്രസാദിന് കാര്യമായ പരിക്കില്ല. ഇരുവരും മണ്ണാര്ക്കാട് മദര് കെയര് ആശുപത്രിയിലാണ് ചികിത്സയിലുള്ളത്.
Also Read: പാലക്കാട് അപകടം; സംഭവ സ്ഥലത്ത് നാട്ടുകാരുടെ പ്രതിഷേധം
ആശുപത്രിയിലെത്തിയാണ് പൊലീസ് മൊഴിയെടുത്തത്. മറ്റൊരു വാഹനത്തിന് സൈഡ് കൊടുത്തപ്പോള് ബ്രേക്ക് ചവിട്ടിയെങ്കിലും വാഹനം നിയന്ത്രിക്കാനായില്ലെന്നും റോഡില് തെന്നലുണ്ടായിരുന്നുവെന്നുമാണ് ഡ്രൈവറുടെ മൊഴി. ചാറ്റല് മഴയും റോഡിലെ തെന്നലും കാരണം വാഹനം നിയന്ത്രിക്കാനായില്ലെന്നും ഡ്രൈവര് മൊഴി നല്കിയിട്ടുണ്ട്.
Also Read: പാലക്കാട് മണ്ണാര്ക്കാട് അപകടം; അന്വേഷണത്തിന് ഉത്തരവിട്ട് വിദ്യാഭ്യാസ മന്ത്രി
ഇരുവരുടെയും രക്ത സാമ്പിളുകള് ഉള്പ്പെടെ പരിശോധിക്കും. വാഹനം അമിത വേഗതയിലായിരുന്നോയെന്നും ഡ്രൈവര് മദ്യപിച്ചിരുന്നോയെന്നും ഉള്പ്പെടെയുള്ള കാര്യം പരിശോധിക്കും. മറ്റൊരു വാഹനത്തിന് സൈഡ് കൊടുത്തപ്പോഴാണ് അപകടമുണ്ടായതെന്നാണ് പ്രാഥമിക വിവരമെന്ന് പൊലീസ് പറഞ്ഞു.
