മലയാളിയുടെ കഞ്ഞി കുടി ചമ്മന്തിയില്ലാതെ പൂർണ്ണമാകില്ല. തേങ്ങാ ചമ്മന്തിയും മാങ്ങാ ചമ്മന്തിയുമൊക്കെ മാറി മാറി പരീക്ഷിക്കുന്നവർക്ക് പുതിയൊരു രുചി പരിചയപ്പെടുത്തുകയാണ് കൊങ്കണി സമുദായക്കാരുടെ സ്വന്തം ‘നെല്ലിക്ക ഗൊജ്ജു’. ഉപ്പിലിട്ട നെല്ലിക്ക പ്രധാന ചേരുവയായി വരുന്ന ഈ വിഭവം കഞ്ഞിക്കും ചോറിനുമൊപ്പം ഒരുപോലെ പ്രിയങ്കരമാണ്.
എന്താണ് ഗൊജ്ജു?
കൊങ്കണി പാചകരീതിയിൽ ഏറെ പ്രചാരമുള്ള വിഭവമാണ് ഗൊജ്ജു. പച്ചക്കറികൾ വേവിച്ചോ, ചുട്ടോ ഉടച്ചെടുത്ത് തയ്യാറാക്കുന്ന ഇതിൽ തേങ്ങ ചേർത്തും അല്ലാതെയും വകഭേദങ്ങളുണ്ട്. എരിവും പുളിയും മാത്രമല്ല, പഴങ്ങൾ ഉപയോഗിച്ച് തയ്യാറാക്കുന്ന മധുരമുള്ള ഗൊജ്ജുവും ഏറെ പ്രസിദ്ധമാണ്.
Also Read: ഇയർഫോൺ സ്ഥിരമായി ഉപയോഗിക്കുന്നവരാണോ? ജാഗ്രത; കേൾവിശക്തി അപകടത്തിലായേക്കാം
ചേരുവകൾ
ഉപ്പിലിട്ട നെല്ലിക്ക – 6 എണ്ണം
ചിരകിയ തേങ്ങ – 3/4 കപ്പ്
വറ്റൽ മുളക് – 5 മുതൽ 7 എണ്ണം വരെ
വെളുത്തുള്ളി – 5 അല്ലി
ഉപ്പ് – ആവശ്യത്തിന്
വെളിച്ചെണ്ണ – അര ടീസ്പൂൺ
തയ്യാറാക്കുന്ന വിധം
ആദ്യം വറ്റൽ മുളക് അല്പം വെളിച്ചെണ്ണയിൽ ചെറുതീയിൽ വറുത്തെടുക്കുക. ശേഷം നെല്ലിക്കയുടെ കുരു കളഞ്ഞ് കാമ്പ് മാത്രമായി വേർതിരിക്കണം. മിക്സിയിൽ തേങ്ങ, വറുത്ത മുളക്, വെളുത്തുള്ളി, നെല്ലിക്ക എന്നിവ ചേർത്ത് ആവശ്യത്തിന് വെള്ളമൊഴിച്ച് നന്നായി അരച്ചെടുക്കുക. നെല്ലിക്കയിൽ ഉപ്പുള്ളതിനാൽ ആവശ്യമുണ്ടെങ്കിൽ മാത്രം അധികം ഉപ്പ് ചേർക്കാം.
മിനിറ്റുകൾക്കുള്ളിൽ തയ്യാറാക്കാവുന്ന ഈ വിഭവം ഉപ്പിലിട്ട മാങ്ങ ഉപയോഗിച്ചും സമാനമായ രീതിയിൽ ഉണ്ടാക്കാവുന്നതാണ്. രുചികരവും ലളിതവുമായ ഈ വിഭവം പ്രായമായവർക്കും കുട്ടികൾക്കും ഒരുപോലെ ഇഷ്ടപ്പെടുമെന്ന കാര്യത്തിൽ സംശയമില്ല.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
