അബുദാബി: എമിറേറ്റിൽ വലിയ ഡ്രോൺ ഷോകൾ ഒരുക്കുന്നതിന് അബുദാബി സാംസ്കാരിക, ടൂറിസം വകുപ്പും ഇലോൺ മസ്കിന്റെ സഹോദരൻ കിംബൽ മസ്കിന്റെ കമ്പനിയും തമ്മിൽ കരാറിലെത്തി. അമേരിക്ക ആസ്ഥാനമായ നോവ സ്കൈ സ്റ്റോറീസ് എന്ന കിംബൽ മസ്കിന്റെ കമ്പനിയുമായി നടന്ന കരാർ പ്രകാരം 10,000 ഡ്രോണുകളാണ് ഷോകൾ ഒരുക്കുന്നതിന് ലഭ്യമാക്കുക. അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് അൽ നഹ്യാനും കിംബലിനൊപ്പം കരാർ ഒപ്പിടൽ ചടങ്ങിൽ സംബന്ധിച്ചു.
അത്യാധുനിക ഡ്രോൺ സാങ്കേതികവിദ്യയെ വലിയ സാംസ്കാരിക, വിനോദ പരിപാടികളിൽ ഉൾപ്പെടുത്തുന്ന പദ്ധതി നടപ്പിലാക്കുന്നതിന്‍റെ ഭാഗമായാണ് അബുദാബി സാംസ്കാരിക, വിനോദസഞ്ചാര വകുപ്പ് കരാറിൽ ഒപ്പിട്ടിരിക്കുന്നത്. എമിറേറ്റിലെ വിവിധ പ്രദേശങ്ങളിൽ ഏറ്റവും മികച്ച കലാപരമായ പ്രകടനങ്ങൾ ഡ്രോൺ ഉപയോഗിച്ച് ഒരുക്കും. എമിറേറ്റിന്‍റെ സമ്പന്നമായ പൈതൃകവും ഭാവിയും അടയാളപ്പെടുത്തുന്നതായിരിക്കും ഈ പ്രകടനങ്ങൾ.
