എസ്യുവി വിപണിയിലെ ജനപ്രിയ തരംഗമായ കിയ സെൽറ്റോസ് സ്വന്തമാക്കാൻ ആഗ്രഹിക്കുന്നവർക്ക് ഈ ജൂലൈ മാസം മികച്ച അവസരം. ഈ മാസം സെൽറ്റോസ് ബുക്ക് ചെയ്യുന്നവർക്കായി പരമാവധി 40,000 രൂപ വരെയുള്ള വമ്പൻ ആനുകൂല്യങ്ങളാണ് കിയ ഇന്ത്യ പ്രഖ്യാപിച്ചിരിക്കുന്നത്. ഇതിൽ 20,000 രൂപയുടെ ലോയൽറ്റി ഓഫറും 20,000 രൂപയുടെ സ്ക്രാപ്പേജ് ഡിസ്കൗണ്ടും ഉൾപ്പെടുന്നു. കഴിഞ്ഞ രണ്ട് മാസമായി കിയയുടെ നിരയിൽ ഏറ്റവും കൂടുതൽ വിറ്റഴിക്കപ്പെടുന്ന മോഡലാണ് സെൽറ്റോസ്.
മെയ് മാസത്തിൽ 10,597 യൂണിറ്റുകളും ജൂണിൽ 9,654 യൂണിറ്റുകളും വിറ്റഴിച്ച വാഹനം, വിപണിയിൽ ഹ്യുണ്ടായി ക്രെറ്റ, ടാറ്റ സിയറ, മാരുതി ഗ്രാൻഡ് വിറ്റാര എന്നിവയോടാണ് പ്രധാനമായും മത്സരിക്കുന്നത്. 11 ലക്ഷം രൂപ മുതൽ 20 ലക്ഷം രൂപ വരെയാണ് സെൽറ്റോസിന്റെ നിലവിലെ എക്സ്ഷോറൂം വില. ആഗോള കെ3 പ്ലാറ്റ്ഫോമിൽ ഒരുങ്ങിയിരിക്കുന്ന പുതിയ സെൽറ്റോസിന് പഴയ മോഡലിനേക്കാൾ നീളവും വീതിയും ഉയരവും കൂടുതലുണ്ട്. വീൽബേസ് വർദ്ധിപ്പിച്ചതോടെ ക്യാബിനുള്ളിൽ കൂടുതൽ സ്ഥലസൗകര്യവും യാത്രാസുഖവും മെച്ചപ്പെട്ടു. ബൂട്ട് സ്പേസും കമ്പനി കൂട്ടിയിട്ടുണ്ട്. ടെല്ലുറൈഡ് കാറിൽ നിന്നും പ്രചോദനം ഉൾക്കൊണ്ട വലിയ മുൻ ഗ്രിൽ, ഉയരമുള്ള ബോണറ്റ്, പുതിയ എൽഇഡി ഡിആർഎല്ലുകൾ, പരിഷ്കരിച്ച ഹെഡ്ലാമ്പുകൾ, വശ്യതയാർന്ന കണക്റ്റഡ് എൽഇഡി ടെയിൽലാമ്പ്, സ്പോർട്ടി ലുക്കുള്ള 18 ഇഞ്ച് അലോയ് വീലുകൾ, ഡ്യുവൽ പെയ്ൻ പനോരമിക് സൺറൂഫ് എന്നിവ കാറിന് കമാൻഡിങ് ലുക്ക് സമ്മാനിക്കുന്നു.
Also Read: 7-സീറ്റർ വാങ്ങാൻ പ്ലാനുണ്ടോ? കിയ കാരൻസ് ക്ലാവിസിന് ഈ മാസം 1.40 ലക്ഷം രൂപ വരെ വൻ വിലക്കിഴിവ്!
ഉള്ളിലേക്ക് കടന്നാൽ പ്രീമിയം ലുക്കുള്ള വലിയൊരു മാറ്റമാണ് കിയ ഒരുക്കിയിരിക്കുന്നത്. ഇൻഫോടെയ്ൻമെന്റ് സിസ്റ്റവും ഡിജിറ്റൽ ഇൻസ്ട്രുമെന്റ് ക്ലസ്റ്ററും ഒന്നിപ്പിച്ചുകൊണ്ടുള്ള 30 ഇഞ്ച് കണക്റ്റഡ് ഡിസ്പ്ലേയാണ് ഇതിലെ പ്രധാന താരം. പുതിയ സ്റ്റിയറിങ് വീൽ, മികച്ച ഡാഷ്ബോർഡ് ഡിസൈൻ, ഉയർന്ന നിലവാരമുള്ള ലെതർ ഫിനിഷിങ് എന്നിവ ക്യാബിൻ ഭംഗി കൂട്ടുന്നു. ഡ്യുവൽ സോൺ ക്ലൈമറ്റ് കൺട്രോൾ, വെന്റിലേറ്റഡ് മുൻസീറ്റുകൾ, മെമ്മറി ഫംഗ്ഷനോടുകൂടിയ 10-വേ പവർ അഡ്ജസ്റ്റബിൾ ഡ്രൈവർ സീറ്റ്, 64-കളർ ആംബിയന്റ് ലൈറ്റിങ്, വയർലെസ് ചാർജിങ്, രണ്ട് നിരകളിലും ടൈപ്പ്-സി ഫാസ്റ്റ് ചാർജിങ് പോർട്ടുകൾ, 8 സ്പീക്കറുകളുള്ള പ്രീമിയം ബോസ് സൗണ്ട് സിസ്റ്റം എന്നിവയും യാത്രക്കാർക്കായി ഇതിലുണ്ട്. സുരക്ഷയുടെ കാര്യത്തിലും വിട്ടുവീഴ്ചയില്ല. 6 എയർബാഗുകൾ, ഇലക്ട്രോണിക് സ്റ്റബിലിറ്റി പ്രോഗ്രാം, ട്രാക്ഷൻ കൺട്രോൾ, 360 ഡിഗ്രി ക്യാമറ, ഒപ്പം അപകടങ്ങൾ മുൻകൂട്ടി തടയുന്ന ലെവൽ 2 എഡിഎഎസ് സാങ്കേതികവിദ്യ ഉൾപ്പെടെ 24 മികച്ച സുരക്ഷാ ഫീച്ചറുകൾ വാഹനത്തിലുണ്ട്.
വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയ്ക്ക് പുറമെ 91 സ്മാർട്ട് ഫീച്ചറുകളുള്ള കിയ കണക്റ്റ് 2.0 വഴി വണ്ടി റിമോട്ടായി നിയന്ത്രിക്കാനും സാധിക്കും. മൂന്ന് എഞ്ചിൻ ഓപ്ഷനുകളിലാണ് സെൽറ്റോസ് വിപണിയിലുള്ളത്. 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ. 1.5 ലിറ്റർ പവർഫുൾ ടർബോ പെട്രോൾ. 1.5 ലിറ്റർ കാര്യക്ഷമതയുള്ള ഡീസൽ എഞ്ചിൻ. മാനുവൽ, ഐഎംടി, ഐവിറ്റി, ഓട്ടോമാറ്റിക് ഗിയർബോക്സ് ഓപ്ഷനുകൾ ലഭ്യമാണ്. വിദേശ വിപണികളിൽ ഓൾ-വീൽ ഡ്രൈവും ഹൈബ്രിഡ് എഞ്ചിനും ലഭ്യമാണെങ്കിലും ഇന്ത്യയിൽ തൽക്കാലം ഈ പതിപ്പുകൾ എത്തിക്കാൻ കമ്പനിക്ക് പ്ലാനില്ല. പ്രീമിയം ഫീച്ചറുകളും ഡ്രൈവിംഗ് സുഖവും ഒത്തുചേരുന്ന ഒരു മിഡ്-സൈസ് എസ്യുവി നോക്കുന്നവർക്ക് ജൂലൈ മാസത്തിലെ 40,000 രൂപയുടെ ഈ ഓഫർ മികച്ചൊരു ലാഭമാണ് സമ്മാനിക്കുന്നത്.
