വിറ്റാമിൻ സി, വിറ്റാമിൻ കെ, ഫൈബർ, ആന്റിഓക്സിഡന്റുകൾ എന്നിവയാൽ സമ്പന്നമായ കാബേജ് ആരോഗ്യത്തിന് ഏറെ ഗുണകരമായ ഒരു പച്ചക്കറിയാണ്. ദഹനം സുഗമമാക്കാനും ശരീരത്തിൽ കാൻസർ കോശങ്ങളുടെ വളർച്ചയെ തടയാനും കാബേജിലെ ഘടകങ്ങൾ സഹായിക്കുന്നു. എന്നാൽ, കാബേജ് പാചകം ചെയ്യുന്നതിന് മുൻപ് അത് കൃത്യമായ രീതിയിൽ വൃത്തിയാക്കേണ്ടത് അത്യാവശ്യമാണ്.
കാബേജിന്റെ പാളികൾക്കിടയിൽ പ്രാണികളോ അവയുടെ മുട്ടകളോ ഒളിച്ചിരിക്കാൻ സാധ്യതയേറെയാണ്. ഇവയെ സാധാരണ രീതിയിൽ കഴുകിയാൽ എളുപ്പത്തിൽ നീക്കം ചെയ്യാൻ കഴിഞ്ഞെന്ന് വരില്ല. കാബേജിന്റെ ഓരോ പാളിയും അടർത്തി മാറ്റി തണ്ടിന്റെ ഭാഗം പ്രത്യേകം പരിശോധിക്കുക. പുഴുക്കൾ സാധാരണയായി തണ്ടിനോട് ചേർന്നാണ് കാണപ്പെടാറുള്ളത്. ഇലകളിൽ ചെറിയ ദ്വാരങ്ങളോ, കടിച്ചതുപോലെയുള്ള അരികുകളോ, കറുത്ത പാടുകളോ കണ്ടാൽ അതിൽ പ്രാണികളുണ്ടെന്ന് ഉറപ്പിക്കാം. കാബേജ് ഇലകൾ വെളിച്ചത്തിന് നേരെ പിടിച്ചു നോക്കിയാൽ അവയ്ക്കുള്ളിലെ പ്രാണികളെയും മുട്ടകളെയും എളുപ്പത്തിൽ കണ്ടെത്താനാകും.
കാബേജിലെ പ്രാണികളെയും അവയുടെ മുട്ടകളെയും പൂർണ്ണമായി ഇല്ലാതാക്കാൻ നാരങ്ങാനീരും ബേക്കിംഗ് സോഡയും ചേർത്തുള്ള ഈ എളുപ്പവഴി പരീക്ഷിക്കാവുന്നതാണ്. ഒരു കപ്പ് വെള്ളത്തിൽ ഒരു ടീസ്പൂൺ നാരങ്ങാനീരും രണ്ട് ടീസ്പൂൺ ബേക്കിംഗ് സോഡയും ചേർത്ത് നന്നായി ഇളക്കുക. ഈ മിശ്രിതം ഒരു സ്പ്രേ കുപ്പിയിലാക്കുക. കാബേജ് ഇലകളിലേക്ക് ഈ ലായനി നന്നായി സ്പ്രേ ചെയ്ത ശേഷം 5 മുതൽ 10 മിനിറ്റ് വരെ മാറ്റിവെക്കുക. അതിനുശേഷം ശുദ്ധമായ ഒഴുക്കുള്ള വെള്ളത്തിൽ കാബേജ് നന്നായി കഴുകിയെടുക്കുക. ഇത് കാബേജിലുള്ള പ്രാണികളെ അകറ്റുക മാത്രമല്ല, ഇലകളിൽ അവശേഷിക്കുന്ന കീടനാശിനികളുടെ അംശം ഇല്ലാതാക്കാനും സഹായിക്കും.
