മാരുതി സുസുക്കി ജിംനിയുടെ ഇലക്ട്രിക് പതിപ്പ് ഉടൻ നിരത്തിലെത്തുമെന്ന വാർത്തകൾ വാഹനലോകത്ത് സജീവമാകുന്നു. അടുത്തിടെ ജിംനി ഇവിയുടെ 5-ഡോർ പ്രോട്ടോടൈപ്പ് പരീക്ഷണ ഓട്ടം നടത്തുന്നതിന്റെ ദൃശ്യങ്ങൾ പുറത്തുവന്നതോടെയാണ് ഈ ചർച്ചകൾക്ക് പുതിയ ജീവൻ ലഭിച്ചത്. ജിംനിയുടെ തനതായ ആ പഴയ ബോക്സി ഡിസൈൻ നിലനിർത്തിക്കൊണ്ടുതന്നെ കൂടുതൽ പ്രായോഗികമായ മാറ്റങ്ങളോടെയാണ് ഇലക്ട്രിക് പതിപ്പ് അണിയറയിൽ ഒരുങ്ങുന്നത്.
ഡിസൈനിലെ പ്രധാന മാറ്റം മുൻവശത്തെ ഗ്രില്ലിലാണ്. ഇലക്ട്രിക് വാഹനമായതിനാൽ റേഡിയേറ്ററിന്റെ ആവശ്യമില്ലാത്തതുകൊണ്ട് ഒരു ക്ലോസ്ഡ് ഗ്രില്ലാണ് ഇതിൽ നൽകിയിരിക്കുന്നത്. പുതുമയാർന്ന എൽഇഡി ലൈറ്റുകളും ഹെഡ്ലാമ്പുകൾക്ക് മുകളിലായി നൽകിയിരിക്കുന്ന സ്റ്റൈലിഷ് ഡിആർഎല്ലുകളും വാഹനത്തിന് ആധുനിക ലുക്ക് നൽകുന്നു. ഓഫ്-റോഡിംഗിന് ഏറെ അനുയോജ്യമായ തൽക്ഷണ ടോർക്ക് ഇലക്ട്രിക് മോട്ടോറുകളുടെ പ്രത്യേകതയാണ്. അതുകൊണ്ടുതന്നെ ദുർഘടമായ പാതകളിൽ മികച്ച നിയന്ത്രണവും കരുത്തും ജിംനി ഇവി വാഗ്ദാനം ചെയ്യുന്നു. ഒറ്റത്തവണ ചാർജ് ചെയ്താൽ 300 മുതൽ 400 കിലോമീറ്റർ വരെ റേഞ്ച് ഈ വാഹനത്തിൽ പ്രതീക്ഷിക്കാം.
Also Read:6 വർഷത്തിന് ശേഷം കരുത്തനായി മടങ്ങിവരവ്; ബജാജ് അവഞ്ചർ 220 സ്ട്രീറ്റ് വീണ്ടും വിപണിയിലേക്ക്!
എങ്കിലും ഇന്ത്യൻ വിപണിയിൽ ജിംനി ഇവിക്ക് ചില വെല്ലുവിളികൾ നേരിടേണ്ടി വന്നേക്കാം. ബാറ്ററികൾ അധികമായി എത്തുന്നതോടെ വാഹനത്തിന്റെ ഭാരം കൂടുന്നത് ജിംനിയുടെ സ്വാഭാവികമായ ഓഫ്-റോഡിംഗ് ശേഷിയെ ബാധിക്കുമോ എന്ന ആശങ്ക വാഹനപ്രേമികൾക്കുണ്ട്. കൂടാതെ ഓഫ്-റോഡിംഗിനായി ഉൾപ്രദേശങ്ങളിൽ പോകുമ്പോൾ ചാർജിംഗ് സൗകര്യങ്ങളുടെ കുറവും ഒരു തടസ്സമായേക്കാം. നിലവിൽ കമ്പനി ഔദ്യോഗിക സ്ഥിരീകരണം നൽകിയിട്ടില്ലെങ്കിലും ഈ ദശകത്തിന്റെ അവസാനത്തോടെ ജിംനി ഇവി വിപണിയിലെത്തുമെന്നാണ് സൂചന.
