വി. ഡി. സതീശൻ സർക്കാരിന്റെ നയങ്ങളെ വിമർശിക്കുമ്പോൾ സോഷ്യൽ മീഡിയയിൽ അതിനെതിരെ ഉറഞ്ഞുതുള്ളുന്നത് സംഘപരിവാറുകാരും മറ്റ് വർഗീയവാദികളുമാണെന്ന് കെ.ടി. കുഞ്ഞിക്കണ്ണൻ. ഫേസ്ബുക്ക് കുറിപ്പിലൂടെയാണ് അദ്ദേഹം തന്റെ വിമർശനം ഉന്നയിച്ചത്. ക്വിറ്റ് ഇന്ത്യാ സമരവും ഹിരോഷിമാ ദിനവുമെല്ലാം ചർച്ചയാകുമ്പോൾ കമ്മ്യൂണിസ്റ്റുകാരെ അധിക്ഷേപിക്കാനുള്ള നുണപ്രചാരണങ്ങളാണ് ഇക്കൂട്ടർ അഴിച്ചുവിടുന്നതെന്നും, ഗാന്ധിയെയും നെഹ്റുവിനെയും പോലും അശ്ലീലകരമായ ഭാഷയിൽ ഇവർ അധിക്ഷേപിക്കുകയാണെന്നും അദ്ദേഹം കുറിച്ചു.
ഗീബൽസിന്റെയും മക്കാർത്തിയുടെയും പിന്തുടർച്ചക്കാരാണ് സംഘപരിവാറെന്നും കമ്മ്യൂണിസ്റ്റ് വിരോധം സിരകളിൽ ഒഴുകുന്ന ഇവർ അരുൺ ഷൂരിയുടെ പരദൂഷണ കഥകളാണ് ചരിത്രമായി പ്രചരിപ്പിക്കുന്നതെന്നും അദ്ദേഹം പറഞ്ഞു. മാപ്പെഴുതി നൽകി ബ്രിട്ടീഷ് സർക്കാരിൽ നിന്ന് അലവൻസ് പറ്റി ദേശീയ പ്രസ്ഥാനത്തെ തകർക്കാൻ ശ്രമിച്ച സവർക്കറുടെ അനുയായികളാണ് ആർ.എസ്.എസുകാർ. തങ്ങൾക്ക് എതിരുനിൽക്കുന്ന മുസ്ലീങ്ങളെയും കമ്മ്യൂണിസ്റ്റുകാരെയും ബുദ്ധിജീവികളെയും രാജ്യദ്രോഹികളായി ചിത്രീകരിക്കാനാണ് ഇവർ ശ്രമിക്കുന്നതെന്നും കെ.ടി. കുഞ്ഞിക്കണ്ണൻ കൂട്ടിച്ചേർത്തു.
ദേശീയ സ്വാതന്ത്ര്യസമരത്തിൽ കമ്മ്യൂണിസ്റ്റുകാർ പങ്കെടുത്തിട്ടില്ലെന്ന സംഘപരിവാർ പ്രചാരണം സ്വന്തം വഞ്ചനയുടെ ചരിത്രം മറച്ചുവെക്കാനാണെന്ന് അദ്ദേഹം പ്രതികരിച്ചു. സംഘപരിവാറിന്റെ ചരിത്രബോധമില്ലായ്മയും രാജ്യദ്രോഹ പാരമ്പര്യവും അക്കമിട്ട് നിരത്താൻ പ്രാഥമിക ചരിത്രവിവരമുള്ള ഏവർക്കും സാധിക്കുമെന്നും, നുണബോംബുകളുമായി നടക്കുന്ന ഇത്തരം മതഭ്രാന്തന്മാരുടെ തനിനിറം ജനങ്ങൾക്ക് മുന്നിൽ തുറന്നുകാട്ടേണ്ടതുണ്ടെന്നും അദ്ദേഹം ഓർമ്മിപ്പിച്ചു.
