ഇസ്രയേലിന്റെ സമ്മര്‍ദ്ദങ്ങളൊന്നും വകവെയ്ക്കാതെ സിറിയയില്‍ നിന്നും സൈന്യത്തെ പിന്‍വലിക്കാനൊരുങ്ങി അമേരിക്ക. 2014 മുതല്‍ സിറിയയില്‍ വിന്യസിച്ചിരിക്കുന്ന സൈന്യത്തെയാണ് അമേരിക്ക പിന്‍വലിക്കാന്‍ ഒരുങ്ങുന്നതെന്നാണ് ന്യൂയോര്‍ക്ക് ടൈംസിന്റെയും അസോസിയേറ്റഡ് പ്രസ്സിന്റെയും റിപ്പോര്‍ട്ട്. സിറിയയുടെ വടക്കുകിഴക്കന്‍ ഭാഗത്തുള്ള എട്ട് സൈനിക താവളങ്ങളില്‍ മൂന്നെണ്ണം അടച്ചുപൂട്ടാനും സൈനികരുടെ എണ്ണം 2,000 ല്‍ നിന്ന് 1,400 ആയി കുറയ്ക്കാനും അമേരിക്കന്‍ സൈന്യം പദ്ധതിയിടുന്നതായി ന്യൂയോര്‍ക്ക് ടൈംസിന്റെ റിപ്പോര്‍ട്ടില്‍ പറയുന്നു. മിഷന്‍ സപ്പോര്‍ട്ട് സൈറ്റ് ഗ്രീന്‍ വില്ലേജ്, എംഎസ്എസ് യൂഫ്രട്ടീസ്, പേരിടാത്ത മറ്റൊരു താവളം എന്നിവയാണ് അടച്ചുപൂട്ടാന്‍ പോകുന്നത്. രണ്ട് മാസത്തിനുള്ളില്‍, ഇതില്‍ കൂടുതല്‍ സൈനികരെ വെട്ടിക്കുറയ്ക്കേണ്ടതുണ്ടോ എന്ന് കമാന്‍ഡര്‍മാര്‍ വീണ്ടും വിലയിരുത്തുമെന്ന് പ്രതീക്ഷിക്കുന്നതായും റിപ്പോര്‍ട്ടില്‍ പറയുന്നു. കുറഞ്ഞത് 500 സൈനികരെയെങ്കിലും നിലനിര്‍ത്താന്‍ കമാന്‍ഡര്‍മാര്‍ ശുപാര്‍ശ ചെയ്തതായി വൃത്തങ്ങള്‍ സൂചിപ്പിക്കുന്നുണ്ട്.
Also Read: കളി മാറ്റി പിടിച്ച് ചൈന, അമേരിക്കയെ വെട്ടി കാനഡയ്ക്ക് കൈ കൊടുത്തു
പിന്‍വലിച്ച ബാക്കിയുള്ളവര്‍ കുര്‍ദിഷ് നേതൃത്വത്തിലുള്ള സിറിയന്‍ ഡെമോക്രാറ്റിക് ഫോഴ്‌സിനെ (എസ്ഡിഎഫ്) മറ്റ് പ്രവര്‍ത്തനങ്ങളിലും തടങ്കല്‍ ക്യാമ്പുകള്‍ കൈകാര്യം ചെയ്യുന്നതിലും തുടര്‍ന്നും പിന്തുണയ്ക്കുമെന്ന് റിപ്പോര്‍ട്ടുണ്ട്. ഗ്രൗണ്ട് കമാന്‍ഡര്‍മാരുടെ ശുപാര്‍ശകളെ തുടര്‍ന്നാണ് പിന്‍വലിച്ചതെന്നും പെന്റഗണില്‍ നിന്നും അമേരിക്കന്‍ സെന്‍ട്രല്‍ കമാന്‍ഡില്‍ നിന്നും അനുമതി ലഭിച്ചതായും റിപ്പോര്‍ട്ടുകള്‍ പറയുന്നു. പെന്റഗണോ വൈറ്റ് ഹൗസോ പിന്‍മാറ്റം ഔദ്യോഗികമായി സ്ഥിരീകരിച്ചിട്ടില്ല. 2014 മുതല്‍ ഐഎസിനെതിരെ പോരാടുക എന്ന പ്രഖ്യാപിത ദൗത്യത്തിന്റെ ഭാഗമായി അമേരിക്കന്‍ സൈന്യം സിറിയയില്‍ വിന്യസിക്കപ്പെട്ടതാണ്. മുന്‍ കണക്കുകള്‍ പ്രകാരം ഏകദേശം 900 സൈനികര്‍ അവിടെയുണ്ടെന്ന് കണക്കാക്കിയിരുന്നെങ്കിലും, ഏകദേശം 2,000 സൈനികര്‍ അവിടെയുണ്ടെന്ന് പെന്റഗണ്‍ കഴിഞ്ഞ വര്‍ഷം വെളിപ്പെടുത്തി. ഇസ്ലാമിക വിഭാഗമായ ഹയാത്ത് തഹ്രിര്‍ അല്‍-ഷാമിന്റെ (എച്ച്ടിഎസ്) നേതൃത്വത്തിലുള്ള സായുധ ഗ്രൂപ്പുകളുടെ സഖ്യം സിറിയന്‍ പ്രസിഡന്റ് ബാഷര്‍ അസദിനെ പുറത്താക്കി എച്ച്ടിഎസ് നേതാവ് അഹമ്മദ് അല്‍-ഷാറ നിയന്ത്രണം ഏറ്റെടുത്തതിന് തൊട്ടുപിന്നാലെയാണ് ഈ പ്രഖ്യാപനം വന്നത്.
എന്നാല്‍, ഇസ്രയേല്‍ ഉദ്യോഗസ്ഥര്‍ അമേരിക്കയുടെ ഈ നീക്കത്തെ എതിര്‍ക്കുകയും ഇത് തടയാന്‍ നിരവധി ശ്രമങ്ങള്‍ നടത്തുകയും ചെയ്തിരുന്നു. പക്ഷെ ആ ശ്രമങ്ങള്‍ പരാജയപ്പെടുകയായിരുന്നു. തിരിച്ചടി നേരിട്ടിട്ടും, പിന്‍വലിക്കല്‍ പുനഃപരിശോധിക്കാനോ പരിമിതപ്പെടുത്താനോ ഇസ്രയേല്‍ പ്രതിരോധ സ്ഥാപനം അമേരിക്കയ്ക്ക് മേല്‍ സമ്മര്‍ദ്ദം ചെലുത്തുന്നത് തുടരുകയാണ്. അതേസമയം, പിന്‍വാങ്ങല്‍ തുടരുകയാണെങ്കില്‍ അത് ഭാഗികമായി മാത്രമേ ഉണ്ടാകൂ എന്ന് ഒരു മുതിര്‍ന്ന ഇസ്രയേലി ഉദ്യോഗസ്ഥന്‍ പറഞ്ഞു. കാരണം പിന്‍വാങ്ങലുണ്ടായാല്‍ അത് മേഖലയെ അസ്ഥിരപ്പെടുത്തുമെന്നാണ് ഇസ്രയേല്‍ വാദിക്കുന്നത്. അമേരിക്കന്‍ സാന്നിധ്യം കുറയുന്നത് തുര്‍ക്കിയെ ധൈര്യപ്പെടുത്തുമെന്നും ഇസ്രയേല്‍ ഭയപ്പെടുന്നുണ്ട്. പ്രത്യേകിച്ച് അസദ് ഭരണകൂടത്തിന്റെ പതനത്തിനുശേഷം, ഈ മേഖലയില്‍ തങ്ങളുടെ നിയന്ത്രണം വിപുലീകരിക്കാന്‍ തുര്‍ക്കി പരസ്യമായി ശ്രമിക്കുന്ന ഒരു സാഹചര്യത്തില്‍.
കിഴക്കന്‍, വടക്കന്‍ സിറിയയിലുടനീളമുള്ള നിരവധി തന്ത്രപ്രധാന സ്ഥലങ്ങളില്‍ നിലവില്‍ അമേരിക്കന്‍ സൈനികരെ വിന്യസിച്ചിട്ടുണ്ട്. അവിടെ അവര്‍ ഒരു സ്ഥിരത ശക്തിയായി പ്രവര്‍ത്തിക്കുന്നു. അവരുടെ പിന്‍വാങ്ങല്‍, കൂടുതല്‍ തന്ത്രപ്രധാനമായ സൈനിക ആസ്തികള്‍ പിടിച്ചെടുക്കാനുള്ള തുര്‍ക്കിയുടെ അഭിലാഷങ്ങള്‍ വര്‍ദ്ധിപ്പിക്കുമെന്നും ഇസ്രയേല്‍ ഉദ്യോഗസ്ഥര്‍ മുന്നറിയിപ്പ് നല്‍കുന്നുണ്ട്. സിറിയയിലെ അമേരിക്കന്‍ സാന്നിധ്യത്തെ നിയമവിരുദ്ധമായ അധിനിവേശമായി സിറിയയും റഷ്യയും ആവര്‍ത്തിച്ച് അപലപിച്ചിട്ടുണ്ട്. മിക്ക അമേരിക്കന്‍ താവളങ്ങളും വടക്കുകിഴക്കന്‍ മേഖലയിലെ എണ്ണ സമ്പന്നമായ പ്രദേശങ്ങളിലായതിനാല്‍, അമേരിക്ക രാജ്യത്തിന്റെ എണ്ണ വിഭവങ്ങള്‍ ചൂഷണം ചെയ്യുന്നുവെന്ന് മുന്‍ സിറിയന്‍ സര്‍ക്കാര്‍ ആരോപിച്ചിട്ടുമുണ്ട്.
സിറിയയില്‍ സൈന്യത്തെ നിലനിര്‍ത്തുന്നതിനെക്കുറിച്ച് അമേരിക്കന്‍ പ്രസിഡന്റ് ഡോണള്‍ഡ് ട്രംപ് മുമ്പ് സംശയം പ്രകടിപ്പിച്ചിരുന്നു. അസദിനെ പുറത്താക്കിയെങ്കിലും, സിറിയയ്ക്കുള്ള ദീര്‍ഘകാല സാന്നിധ്യവും പിന്തുണയും നിലനിര്‍ത്തുമെന്ന് റഷ്യ പ്രതിജ്ഞയെടുത്തു. ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ താനിയുമായുള്ള കൂടിക്കാഴ്ചയില്‍, സിറിയന്‍ പരമാധികാരത്തിനും പ്രദേശിക സമഗ്രതയ്ക്കുമുള്ള റഷ്യയുടെ പ്രതിബദ്ധത പ്രസിഡന്റ് വ്‌ളാഡിമിര്‍ പുടിന്‍ വീണ്ടും ഉറപ്പിച്ചു പറയുകയുണ്ടായി. സിറിയയുടെ മാനുഷിക പ്രതിസന്ധി പരിഹരിക്കുന്നതിനും രാജ്യത്തിന്റെ സുരക്ഷയും സമ്പദ്വ്യവസ്ഥയും സ്ഥിരപ്പെടുത്തുന്നതിനും ഖത്തറുമായി പ്രവര്‍ത്തിക്കാനുള്ള സന്നദ്ധതയും അദ്ദേഹം എടുത്ത് പറഞ്ഞു. 2017 ല്‍ ഒപ്പുവച്ച ദീര്‍ഘകാല കരാറിന്റെ അടിസ്ഥാനത്തില്‍ പാട്ടത്തിനെടുത്ത ഖ്മൈമിലെയും ടാര്‍ട്ടസിലെയും സ്ഥാപിത താവളങ്ങളില്‍ നിന്ന് റഷ്യന്‍ സൈന്യം തുടര്‍ന്നും പ്രവര്‍ത്തനം നടത്തുമെന്ന് ഐക്യരാഷ്ട്രസഭയിലെ റഷ്യന്‍ അംബാസഡര്‍ വാസിലി നെബെന്‍സിയ പിന്നീട് മാധ്യമപ്രവര്‍ത്തകരോട് പറഞ്ഞിരുന്നു.
Also Read: അതിക്രമങ്ങളിലും ക്രൂരതകളിലും മുങ്ങി ഇസ്രയേൽ, സ്വന്തം രാജ്യത്തെ സ്ത്രീകൾക്കും രക്ഷയില്ല
സിറിയ ഒരു പരമാധികാര, സ്വതന്ത്ര, ഭൂമിശാസ്ത്രപരമായി സംയോജിത രാജ്യമായി തുടരുന്നുവെന്ന് ഉറപ്പാക്കാന്‍ ഞങ്ങള്‍ എല്ലാം ചെയ്യാന്‍ ആഗ്രഹിക്കുന്നുവെന്നായിരുന്നു ഖത്തര്‍ അമീറുമായുള്ള കൂടിക്കാഴ്ച്ചയില്‍ പുടിന്‍ വ്യക്തമാക്കിയിരുന്നത്. രാഷ്ട്രീയം, സുരക്ഷ, സമ്പദ്വ്യവസ്ഥ എന്നിവയിലെ നിലവിലുള്ള വെല്ലുവിളികള്‍ ചൂണ്ടിക്കാട്ടി, മാനുഷിക പ്രതിസന്ധി പരിഹരിക്കുന്നതിനും സിറിയയെ സ്ഥിരപ്പെടുത്തുന്നതിനും ഖത്തറുമായി ചേര്‍ന്ന് പ്രവര്‍ത്തിക്കാന്‍ റഷ്യ തയ്യാറാണെന്ന് അദ്ദേഹം കൂട്ടിച്ചേര്‍ത്തു. അതേസമയം, റഷ്യയുമായി ശക്തമായ ബന്ധം നിലനിര്‍ത്തുന്നതില്‍ താല്‍പ്പര്യം പ്രകടിപ്പിച്ച സിറിയയുടെ പുതിയ നേതാവായ അഹമ്മദ് അല്‍-ഷാറയുമായി അടുത്തിടെ കൂടിക്കാഴ്ച നടത്തിയതായി ഖത്തര്‍ അമീര്‍ പറഞ്ഞു. ‘സിറിയയും റഷ്യയും തമ്മിലുള്ള ചരിത്രപരമായ ബന്ധങ്ങളെക്കുറിച്ച് തങ്ങള്‍ അല്‍-ഷാറയുമായി ചര്‍ച്ച ചെയ്തുവെന്നും, അവ തന്ത്രപരമായ സ്വഭാവമുള്ളവയായിരുന്നുവെന്നും അദ്ദേഹം ചൂണ്ടിക്കാണിക്കുന്നു. സിറിയ ‘വളരെ ദുഷ്‌കരമായ ഒരു കാലഘട്ടത്തിലൂടെയാണ് കടന്നുപോകുന്നത്’ എന്നും അതിന്റെ പ്രാദേശിക സമഗ്രതയും പരമാധികാരവും സംരക്ഷിക്കുന്നതിന് അന്താരാഷ്ട്ര പിന്തുണ ആവശ്യമാണെന്നും അദ്ദേഹം കൂട്ടിച്ചേര്‍ത്തു. കൂടാതെ, കൂടിക്കാഴ്ച്ചയില്‍ റഷ്യ-ഖത്തര്‍ ബന്ധത്തിന്റെ അവസ്ഥയെ ഇരു നേതാക്കളും പ്രശംസിക്കുകയും വ്യാപാരം, നിക്ഷേപം, പ്രാദേശിക നയതന്ത്രം എന്നിവയില്‍ സഹകരണം വികസിപ്പിക്കുന്നതിനുള്ള പ്രതിബദ്ധത വീണ്ടും ഉറപ്പിക്കുകയും ചെയ്തു.
