ഗാസയിലെ ഇസ്രയേൽ-ഹമാസ് വെടിനിർത്തൽ ചർച്ചകൾ എങ്ങുമെത്താതെ തുടരുകയാണ്. അഞ്ഞൂറ് ദിവസത്തിലധികമായി ഗാസയിൽ നടക്കുന്ന കൂട്ട കുരുതിയിൽ ഇതിനകം മരണസംഖ്യ 51,000 കടന്നു കഴിഞ്ഞു. യുദ്ധം ആരംഭിച്ചതിനു ശേഷമുള്ള ഏറ്റവും വലിയ മാനുഷിക പ്രതിസന്ധിയാണ് ഗാസ ഇപ്പോൾ നേരിട്ടുകൊണ്ടിരിക്കുന്നത്. ഗാസയിൽ തടവിലാക്കപ്പെട്ട ബാക്കിയുള്ള ബന്ദികളിൽ പകുതി പേരെയും വിട്ടയച്ചാൽ 45 ദിവസത്തെ വെടിനിർത്തലിനെക്കുറിച്ച് ആലോചിക്കാം എന്നാണ് ഇസ്രയേലിന്റെ നിലപാട്. കരാറിന്റെ ആദ്യ ആഴ്ചയിൽ പകുതി ബന്ദികളെ മോചിപ്പിക്കുക, കുറഞ്ഞത് 45 ദിവസത്തേക്ക് വെടിനിർത്തൽ നീട്ടുക, സഹായം നൽകുക എന്നിവ ഉൾപ്പെടുന്ന ഇസ്രയേലി നിർദ്ദേശം ഈജിപ്ഷ്യൻ മധ്യസ്ഥർ പാസാക്കിയതായാണ്, ഉദ്യോഗസ്ഥൻ അറിയിക്കുന്നത്.
എന്നാൽ ഗാസ യുദ്ധം അവസാനിപ്പിക്കുന്നതിനായുള്ള ഇസ്രയേലിന്റെ ആവശ്യങ്ങളിൽ പ്രധാനം, പലസ്തീൻ പോരാളികൾ നിരായുധരാകണമെന്നതാണ്. യുദ്ധത്തിന് സ്ഥിരമായ ഒരു അന്ത്യം കുറിക്കുന്നതിനുള്ള ഒരു വ്യവസ്ഥയായി ഹമാസിനെയും ഗാസ മുനമ്പിലെ എല്ലാ പലസ്തീൻ സായുധ വിഭാഗങ്ങളെയും നിരായുധീകരിക്കുക എന്ന ആവശ്യമാണ് ഇസ്രയേലിനുള്ളത്. എന്നാൽ ഹമാസിന്റെയും പ്രതിരോധ വിഭാഗങ്ങളുടെയും നിരായുധീകരണമെന്ന ഇസ്രയേൽ ആവശ്യം ഒരു ചുവന്ന വരയാണെന്നും അത് ചർച്ച ചെയ്യാൻ കഴിയില്ലെന്നും നിർദേശത്തോട് ഹമാസ് വ്യക്തമാക്കി കഴിഞ്ഞു. അതേ സമയം, മധ്യസ്ഥരിൽ നിന്ന് ലഭിച്ച ഗാസ വെടിനിർത്തൽ നിർദ്ദേശം പഠിച്ചുകൊണ്ടിരിക്കുകയാണെന്നും എത്രയും വേഗം അതിനോട് പ്രതികരിക്കുമെന്നും ഹമാസ് പ്രതിരോധ പ്രസ്ഥാനം പറയുന്നു.
Also Read: അമേരിക്കയെ വെട്ടി, പ്രതിരോധമേഖലയുടെ വളർച്ചയ്ക്ക് യൂറോപ്പിന്റെ പുതിയ നീക്കം
വരാൻ പോകുന്ന ഏതൊരു കരാറിലും സ്ഥിരമായ വെടിനിർത്തൽ, ഗാസയിൽ നിന്ന് ഇസ്രയേൽ സൈന്യത്തെ പൂർണ്ണമായി പിൻവലിക്കൽ എന്നിവ ഉൾപ്പെടണമെന്ന് പ്രസ്ഥാനം ആവർത്തിച്ചു. യഥാർത്ഥ തടവുകാരെ കൈമാറുന്ന കരാറും പ്രദേശത്തിന്റെ പുനർനിർമ്മാണവും ആണ് ഹമാസ് ഇപ്പോൾ ആവശ്യപ്പെടുന്നത്. പലസ്തീൻ ജനതയുടെ കഷ്ടപ്പാടുകൾ അവസാനിപ്പിക്കുന്ന എല്ലാ ഓഫറുകൾക്കും ഹമാസ് സന്നദ്ധരാണ് എന്ന് ഹമാസ് മുതിർന്ന ഉദ്യോഗസ്ഥനായ സാമി അബു സുഹ്രി വ്യക്തമാക്കി. വെടിനിർത്തൽ അട്ടിമറിക്കാനുള്ള ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ ശ്രമങ്ങളെയും സാമി അബു സുഹ്രി കുറ്റപ്പെടുത്തി.
ഏതൊരു കരാറിനെയും അട്ടിമറിക്കാൻ നെതന്യാഹു അസാധ്യമായ വ്യവസ്ഥകൾ സൃഷ്ടിക്കുകയാണെന്ന് പറഞ്ഞ അബു സുഹ്രി, പ്രതിരോധ പോരാളികളെ നിരായുധരാക്കണമെന്ന് ആവശ്യപ്പെട്ടുകൊണ്ട് ഭരണകൂടം ഒരു ചുവന്ന രേഖ കടന്നിരിക്കുകയാണെന്നും മുന്നറിയിപ്പ് നൽകി. പ്രതിരോധത്തിന്റെ ആയുധങ്ങൾ ഒരു ചുവന്ന വരയാണെന്നും അത് ചർച്ച ചെയ്യാൻ കഴിയാത്തതാണെന്നും ഊന്നിപ്പറഞ്ഞ അദ്ദേഹം, നെതന്യാഹു സ്വന്തം രാഷ്ട്രീയ താൽപ്പര്യങ്ങൾക്കനുസൃതമായി പ്രവർത്തിക്കുകയാണെന്നും ഗാസയിലെ ജനങ്ങളെ കൊല്ലുന്നതിൽ ഇസ്രയേലിന് പുറമെ അമേരിക്കൻ പ്രസിഡന്റ് ഡോണൾഡ് ട്രംപും പങ്കാളിയാണെന്നും അദ്ദേഹം വിമർശിച്ചു.
Also Read: ആണവ ചർച്ചയിലും തെളിഞ്ഞു നിന്നത് അമേരിക്കയോടുള്ള അവിശ്വാസം, നിലപാടിൽ ഉറച്ച് ഇറാൻ
അതേസമയം ഗാസയിലെ മാനുഷിക പ്രതിസന്ധി നിയന്ത്രണാതീതമായി നീങ്ങുകയാണെന്നും ആഴ്ചകളായി ഒരു സഹായവും പ്രദേശത്തേക്ക് എത്തുന്നില്ലെന്നും സ്ഥിതിഗതികൾ അതിവേഗം വഷളാകുകയാണെന്നും ഐക്യരാഷ്ട്രസഭ നേരത്തെയും മുന്നറിയിപ്പ് നൽകിയിരുന്നു. ഇസ്രയേൽ മാനുഷിക സഹായം തടഞ്ഞതോടെ, ലക്ഷക്കണക്കിന് ആളുകൾ പ്രദേശത്ത് നിന്ന് പലായനം ചെയ്തിട്ടുണ്ട്.
ഗാസയിലെ മാനുഷിക പ്രതിസന്ധിയെക്കുറിച്ച് ഐക്യരാഷ്ട്രസഭയുടെ മാനുഷിക ഏകോപന കാര്യാലയം (OCHA) ഗുരുതരമായ മുന്നറിയിപ്പ് നൽകിയിട്ടുണ്ട്. കാരണം ഉപരോധിക്കപ്പെട്ട പ്രദേശത്തേക്ക് സഹായങ്ങൾ പ്രവേശിക്കുന്നതിന് ഇസ്രയേൽ ഭരണകൂടം പൂർണ്ണമായ വിലക്ക് തുടരുകയാണ്. യുഎൻ മാനുഷിക കാര്യാലയത്തിന്റെ കണക്കനുസരിച്ച്, ഒന്നര മാസമായി ഗാസയിൽ ഒരു സാധനങ്ങളും എത്തിയിട്ടില്ല. ഇസ്രയേലി ആക്രമണം പൊട്ടിപ്പുറപ്പെട്ടതിന് ശേഷമുള്ള 18 മാസത്തിനിടയിലെ ഏറ്റവും മോശമായ സാഹചര്യമാണ് പ്രദേശത്തുള്ളതെന്ന് അവർ മുന്നറിയിപ്പ് നൽകി. ഗാസയിലെ ജനങ്ങൾ മെഡിക്കൽ സപ്ലൈസ്, ഇന്ധനം, വെള്ളം, മറ്റ് അവശ്യവസ്തുക്കൾ എന്നിവയുടെ ഗുരുതരമായ ക്ഷാമം നേരിടുന്നുണ്ടെന്നും മാനുഷിക ഏകോപന കാര്യാലയം കൂട്ടിച്ചേർത്തു.
Also Read: ഇന്ത്യ-മിഡിൽ-ഈസ്റ്റ്-യൂറോപ്പ് സാമ്പത്തിക ഇടനാഴി; സഹകരണം വികസിപ്പിക്കാൻ ഇന്ത്യയും ഇറ്റലിയും
ഗാസയുടെ ക്രോസിംഗുകൾ ഇസ്രയേൽ അടച്ചതിനാൽ, നൽകി വരുന്ന അവശ്യ സാധനങ്ങൾ പോലും വെട്ടികുറയ്കാൻ നിർബന്ധിതരായിട്ടുണ്ടെന്ന് പ്രവർത്തകർ ചൂണ്ടിക്കാട്ടി. ഹമാസുമായുള്ള രണ്ട് മാസത്തെ വെടിനിർത്തൽ തകർന്നതിനുശേഷം മാർച്ച് 18 ന് ഇസ്രയേൽ ഗാസയ്‌ക്കെതിരായ വംശഹത്യ യുദ്ധം പുനരാരംഭിച്ചു. അതിനുശേഷം, ഭരണകൂടം ലക്ഷക്കണക്കിന് പലസ്തീനികളെ നാടുകടത്തുകയും മാർച്ച് 2 മുതൽ സഹായ വിതരണത്തിന് പൂർണ്ണ നിരോധനം ഏർപ്പെടുത്തുകയും ചെയ്തു.
അധിനിവേശ വെസ്റ്റ് ബാങ്കിലുടനീളം ഇസ്രയേൽ സൈന്യം അക്രമാസക്തമായ കടന്നുകയറ്റങ്ങളാണ് നടത്തുന്നത്. അവരുടെ ഏറ്റവും പുതിയ ആക്രമണത്തിൽ കുറഞ്ഞത് ഒരു പലസ്തീൻ യുവാവെങ്കിലും കൊല്ലപ്പെടുന്നു എന്നാണ് റിപ്പോർട്ട്. റാമല്ലയുടെ വടക്കുള്ള ജലസോൺ അഭയാർത്ഥി ക്യാമ്പിൽ ഇസ്രയേൽ സൈന്യത്തിന്റെ വെടിയേറ്റതിനെ തുടർന്ന് മാലിക് അലി അൽ-ഹത്താബ് എന്ന 19 കാരന് ഗുരുതരമായി പരിക്കേറ്റിരുന്നു. ആക്രമണത്തിൽ മറ്റ് രണ്ട് യുവ പലസ്തീൻകാർക്കും പരിക്കേറ്റു. തുൽകാറം അഭയാർത്ഥി ക്യാമ്പിന് സമീപമുള്ള പ്രദേശങ്ങളിലും ഇസ്രയേൽ സൈന്യം റെയ്ഡ് നടത്തി, പലസ്തീൻ പ്രതിരോധ പോരാളികളുമായി ഏറ്റുമുട്ടി. അതേസമയം, സൈന്യത്തിന്റെ പിന്തുണയോടെ ഇസ്രയേലി കുടിയേറ്റക്കാർ ജെറിക്കോ എന്നറിയപ്പെടുന്ന അരിഹ, വടക്കൻ ജോർദാൻ താഴ്‌വര, ഐൻ അൽ-ഔജ, ഒരു ബെഡൂയിൻ ഗ്രാമം എന്നിവയുൾപ്പെടെ നിരവധി പ്രദേശങ്ങളിൽ പലസ്തീൻ സിവിലിയന്മാരെ ആക്രമിച്ചു.
Also Read: അമേരിക്കൻ അഭിമാനം ‘ഡിം’ യുക്രൈയിൻ ആകാശത്ത് Fl6-നെ വീഴ്ത്തി റഷ്യ, ഞെട്ടിയവരിൽ ഇസ്രയേലും !
ആക്രമണത്തിനിടെ അവർ പലസ്തീൻ വീടുകളും വാഹനങ്ങളും നശിപ്പിച്ചു. 2023 ൽ ഗാസ വംശഹത്യ ആരംഭിച്ചതിനുശേഷം വെസ്റ്റ് ബാങ്കിലുടനീളം ഇസ്രയേലി സൈനികരുടെയും കുടിയേറ്റക്കാരുടെയും അക്രമാസക്തമായ റെയ്ഡുകൾ ഗണ്യമായി വർധിക്കുകയാണ്. അതേസമയം ഗാസയിൽ അടിയന്തര വെടിനിർത്തലിന് ആഹ്വാനം ചെയ്തിരിക്കുയാണ് പലസ്തീൻ പ്രസിഡന്റ് മഹ്മൂദ് അബ്ബാസും ഫ്രഞ്ച് പ്രസിഡന്റ് ഇമ്മാനുവൽ മാക്രോണും. വെടിനിർത്തലിന്റെ അടിയന്തര ആവശ്യകതയെക്കുറിച്ച് എടുത്തു പറഞ്ഞ ഇരു നേതാക്കളും പലസ്തീൻ ജനതയെ അവരുടെ മണ്ണിൽ നിന്ന് പുറത്താക്കുന്ന നീക്കങ്ങളെ വിമർശിച്ചതായും പലസ്തീൻ ഔദ്യോഗിക വാർത്താ ഏജൻസിയായ വഫ റിപ്പോർട്ട് ചെയ്തു.
ബന്ദികളെ മോചിപ്പിക്കാനും പോരാട്ടം നിർത്താനും “ഫ്രാൻസ് പൂർണ്ണമായും സജ്ജമാണെന്ന്” മാക്രോൺ X-ൽ പ്രസ്താവിച്ചു. ഹമാസില്ലാത്ത യുദ്ധാനന്തര ഗാസയെ ഭരിക്കാൻ പലസ്തീൻ അതോറിറ്റിയെ അനുവദിക്കുന്നതിനുള്ള നീക്കങ്ങളുടെ ഭാഗമായി പലസ്തീൻ അതോറിറ്റിയുടെ പരിഷ്കാരത്തെ കുറിച്ചും മാക്രോൺ വാദിച്ചു. തടവുകാരുടെ കൈമാറ്റത്തിന് പകരമായി എല്ലാ ബന്ദികളെയും മോചിപ്പിക്കാൻ ഹമാസ് തയ്യാറാണെന്നും ഇസ്രയേൽ യുദ്ധം അവസാനിപ്പിക്കുമെന്ന് ഉറപ്പുനൽകണമെന്നും മുതിർന്ന ഹമാസ് ഉദ്യോഗസ്ഥൻ താഹിർ അൽ-നുനു വ്യക്തമാക്കി. തടവുകാരുടെ എണ്ണമല്ല പ്രശ്നം, മറിച്ച് അധിനിവേശം അതിന്റെ പ്രതിബദ്ധതകൾ ലംഘിക്കുകയും വെടിനിർത്തൽ കരാർ നടപ്പാക്കുന്നത് തടയുകയും യുദ്ധം തുടരുകയും ചെയ്യുന്നു എന്നതാണ് കാര്യങ്ങൾ സങ്കീർണമാക്കുന്നത് എന്നും നുനു പറഞ്ഞു. ഈജിപ്ഷ്യൻ, ഖത്തർ മധ്യസ്ഥരുമായുള്ള ചർച്ചകൾക്ക് ശേഷം സംസാരിക്കവെ, ഹമാസ് ആയുധങ്ങൾ ഉപേക്ഷിക്കില്ലെന്ന് അദ്ദേഹം തറപ്പിച്ചു പറഞ്ഞു.
Also Read: അമേരിക്കയ്ക്കും അടിപതറും, അടിക്ക് തിരിച്ചടി നൽകുന്ന നയതന്ത്രജ്ഞൻ മാത്രമല്ല ‘അബ്ബാസ് അരാഗ്ചി’..
രണ്ടാം ഘട്ട വെടിനിർത്തൽ കരാറിനായി ഇസ്രയേൽ ചർച്ചകളിൽ ഏർപ്പെടുമെന്ന അമേരിക്കയുടെ ഉറപ്പിന് പകരമായി, പുതിയ വെടിനിർത്തൽ നിർദ്ദേശപ്രകാരം, ഹമാസ് 10 ജീവനുള്ള ബന്ദികളെ വിട്ടയക്കുമെന്ന് ഇസ്രയേലി വാർത്താ വെബ്‌സൈറ്റ് യെനെറ്റ് റിപ്പോർട്ട് ചെയ്തു. മുൻ അമേരിക്കൻ പ്രസിഡന്റ് ജോ ബൈഡൻ വിവരിച്ചതുപോലെ, കരാർ പ്രകാരം രണ്ടാം ഘട്ടത്തിനായുള്ള ചർച്ചകൾ നടത്തണമെന്ന് ഹമാസ് നിർബന്ധിച്ചപ്പോൾ, ആദ്യ ഘട്ടം നീട്ടാൻ ഇസ്രയേൽ ശ്രമിച്ചിരുന്നു. എന്നാൽ മാസങ്ങൾക്കുള്ളിൽ തന്നെ ഫ്രാൻസിന് പലസ്തീൻ രാഷ്ട്രത്തെ അംഗീകരിക്കാൻ കഴിയുമെന്ന് മാക്രോൺ പ്രഖ്യാപിച്ചത് ഇസ്രയേലിൽ കടുത്ത വിമർശനത്തിന് ഇടയാക്കിയിരുന്നു. ഫ്രാൻസിന്റെ അംഗീകാരം മറ്റ് രാജ്യങ്ങളെയും ഇത് പിന്തുടരാൻ പ്രേരിപ്പിക്കുമെന്നും ഇസ്രയേലിനെ അംഗീകരിക്കാത്ത രാജ്യങ്ങൾ അങ്ങനെ ചെയ്യണമെന്നും അദ്ദേഹം പറഞ്ഞു. എന്നാൽ അംഗീകാര നീക്കങ്ങൾ അകാലമാണെന്ന് ആണ് ഇസ്രയേൽ തറപ്പിച്ചുപറയുന്നത്. ഗാസയുടെ നാശം മാത്രമാണ് തങ്ങളുടെ ഏക അഭിലാഷം എന്നാണ് മക്രോണിന്റെ പ്രസ്താവനയ്ക്ക് പിന്നാലെ ഇസ്രയേൽ നേതാവ് നെതന്യാഹു പ്രതികരിച്ചിരിക്കുന്നത്.
വീഡിയോ കാണാം
