അമേരിക്കയുടെ ഊർജ്ജ താൽപ്പര്യങ്ങളെ ലക്ഷ്യമിട്ട് യുക്രെയ്ൻ, ലക്ഷ്യം പാളിയതോ, പ്രകോപനം തീർത്തതോ?

റഷ്യൻ ലക്ഷ്യങ്ങളെ ഉന്നമിട്ട് കൈവിട്ട കളികളാണ് യുക്രെയ്ൻ നടത്തുന്നത്. റഷ്യയിലെ ക്രാസ്നോഡർ മേഖലയിലെ ഒരു പ്രധാന എണ്ണ പമ്പിംഗ് സ്റ്റേഷനായ കാസ്പിയൻ പൈപ്പ്‌ലൈൻ കൺസോർഷ്യത്തിനെ ലക്ഷ്യമിട്ട് നിരവധി യുക്രെയ്ൻ ഡ്രോണുകൾ ആക്രമണം നടത്തിയതായ റിപ്പോർട്ടുകളാണ് ഇപ്പോൾ പുറത്തു വന്നിരിക്കുന്നത്. എന്നാൽ ഈ കളിയിലും യുക്രെയ്‌ന് അല്പം പാളിയിട്ടുണ്ട്. കാരണം യുക്രെയ്ൻ ആക്രമണം നടത്തിയിരിക്കുന്നത് അമേരിക്ക കൂടി പങ്കാളിയായിട്ടുള്ള എണ്ണ പമ്പിംഗ് സ്റ്റേഷന് നേർക്കാണ്. എണ്ണ പമ്പിംഗ് സ്റ്റേഷന് നേരെ ആക്രമണം നടത്തിയ അതേ ദിവസം തന്നെ ക്രാസ്നോഡർ മേഖലയിൽ ഏകദേശം 20 യുഎവികൾ ആക്രമണം നടത്തിയതായാണ് റഷ്യയുടെ പ്രതിരോധ മന്ത്രാലയം റിപ്പോർട്ട് ചെയ്യുന്നത്. 147 റഷ്യൻ ഡ്രോണുകളിൽ 83 എണ്ണം തടഞ്ഞതായി യുക്രെയ്നിന്റെ വ്യോമസേന അവകാശപ്പെട്ടു. അതേസമയം 90 യുക്രേനിയൻ ഡ്രോണുകൾ നശിപ്പിച്ചതായി റഷ്യയുടെ പ്രതിരോധ മന്ത്രാലയം അറിയിച്ചു.

അമേരിക്കൻ ഭീമന്മാരായ ഷെവോണും എക്സോൺ മൊബീലും ഉൾപ്പെടുന്ന ഒരു കൂട്ടായ്മയായ കാസ്പിയൻ പൈപ്പ്‌ലൈൻ കൺസോർഷ്യം (സിപിസി) പുറത്തിറക്കിയ പത്രക്കുറിപ്പ് പ്രകാരം, ഫെബ്രുവരി 17 ന് പുലർച്ചെയാണ് ക്രോപോട്ട്കിൻസ്കായ പമ്പിംഗ് സ്റ്റേഷനിൽ സ്ഫോടകവസ്തുക്കളും ലോഹ ഘടകങ്ങളും നിറച്ച ഡ്രോണുകൾ ആക്രമണം നടത്തിയത്. കാസ്പിയൻ പൈപ്പ്‌ലൈൻ കൺസോർഷ്യം, കോമൺ‌വെൽത്ത് ഓഫ് ഇൻഡിപെൻഡന്റ് സ്റ്റേറ്റ്‌സിൽ വ്യാപിച്ചുകിടക്കുന്ന ഒരു പ്രധാന അന്താരാഷ്ട്ര എണ്ണ ഗതാഗത പദ്ധതിയാണ്. റഷ്യ, കസാക്കിസ്ഥാൻ, അമേരിക്ക ആസ്ഥാനമായുള്ള ഭീമൻമാരായ ഷെവോൺ, എക്സോൺ മൊബീൽ എന്നിവയുൾപ്പെടെ നിരവധി പ്രമുഖ എണ്ണ കമ്പനികൾ ഈ കൺസോർഷ്യത്തിൽ പങ്കാളികളാണ്.

Also Read: കുറ്റബോധവും ഏകാന്തതയും.. വിഷാദത്തിൽ സ്വയം ജീവനെടുത്ത് ഇസ്രയേൽ പൗരന്മാർ

പശ്ചിമ കസാക്കിസ്ഥാനിൽ നിന്നും റഷ്യയിൽ നിന്നും അസംസ്കൃത എണ്ണ കൊണ്ടുപോകുന്നതിൽ കാസ്പിയൻ പൈപ്പ്‌ലൈൻ കൺസോർഷ്യം നിർണായക പങ്ക് വഹിക്കുന്നുണ്ട്. സിപിസി വഴി കയറ്റുമതി ചെയ്യുന്ന എണ്ണ വിതരണത്തിൽ അമേരിക്കൻ കമ്പനികൾക്ക് ഗണ്യമായ പങ്കുണ്ട്. 2024 ലെ എണ്ണ വിതരണത്തിന്റെ ഏകദേശം 40% നിയന്ത്രിച്ചതും സിപിസി ആണ്. കഴിഞ്ഞ വർഷം മൊത്തത്തിൽ, സിപിസി പൈപ്പ്‌ലൈൻ വഴി മൊത്തം 62.4 ദശലക്ഷം ടൺ എണ്ണയുടെ വ്യാപാരം നടത്തിയിട്ടുണ്ട്. ഇതിൽ 7.3 ദശലക്ഷം ടൺ റഷ്യയിൽ നിന്നും 55.1 ദശലക്ഷം ടൺ കസാക്കിസ്ഥാനിൽ നിന്നുമാണെന്ന് ഡാറ്റ പറയുന്നു.

പ്രാദേശിക എണ്ണ ഗതാഗതം സുഗമമാക്കുന്നതിൽ സിപിസി പൈപ്പ്‌ലൈൻ സംവിധാനത്തിന്റെ പ്രാധാന്യം ഈ കണക്കുകൾ എടുത്തുകാണിക്കുന്നു. കാസ്പിയൻ പൈപ്പ്‌ലൈൻ കൺസോർഷ്യം പ്രകാരം, ക്രോപോട്ട്കിൻസ്കായ പമ്പിംഗ് സ്റ്റേഷനിൽ നടന്ന ഡ്രോൺ ആക്രമണം, സ്റ്റേഷന്റെ പ്രവർത്തനങ്ങൾ തടസ്സപ്പെടുത്തുക മാത്രമല്ല, അവിടെ ജോലി ചെയ്യുന്ന ഉദ്യോഗസ്ഥരെയും ലക്ഷ്യം വെച്ചുള്ളതായിരുന്നു. ഡ്രോൺ ആക്രമണത്തിൽ ആർക്കും പരിക്കില്ലെന്ന് കാസ്പിയൻ പൈപ്പ്‌ലൈൻ കൺസോർഷ്യം (സിപിസി) റിപ്പോർട്ട് ചെയ്തു. ആക്രമണ ഫലമായി പമ്പിംഗ് സ്റ്റേഷൻ താൽക്കാലികമായി അടച്ചുപൂട്ടിയിരിക്കുകയാണ്. ക്രോപോട്ട്കിൻസ്കായ പമ്പിംഗ് സ്റ്റേഷന് നേരെയുണ്ടായ ഡ്രോൺ ആക്രമണത്തെക്കുറിച്ച് കാസ്പിയൻ പൈപ്പ്‌ലൈൻ കൺസോർഷ്യം (സിപിസി), അമേരിക്ക യൂറോപ്യൻ കമ്പനികളുടെ പ്രതിനിധികൾ ഉൾപ്പെടെയുള്ള എല്ലാ ഓഹരി ഉടമകളെയും അറിയിച്ചു കഴിഞ്ഞിട്ടുണ്ട്. ഇത് റഷ്യയിലെ സിവിലിയൻ സൗകര്യത്തെ ലക്ഷ്യം വച്ചുള്ള യുക്രെയ്‌ന്റെ ഭീകരാക്രമണമാണെന്ന് സിപിസി ഊന്നിപ്പറഞ്ഞു. ഈ ആക്രമണം റഷ്യ-യുക്രെയ്ൻ സംഘർഷം പരിഹരിക്കുന്നതിനുള്ള ചർച്ചകളിൽ യുക്രെയ്‌നു തിരിച്ചടിയാകാനുള്ള സാധ്യതയുണ്ടെന്നാണ് ആഗോള നിരീക്ഷകർ അവകാശപ്പെടുന്നത്.

Also Read: അമേരിക്കൻ ഫുഡ് അതോറിറ്റി മേധാവി ജിം ജോൺസ് രാജിവച്ചു

അതേസമയം, ചർച്ചകളിൽ ഭാഗമാകാതെ യുക്രെയ്‌നിന് അതിന്റെ ഭാവിയെക്കുറിച്ചുള്ള ഒരു കരാറും അംഗീകരിക്കാൻ കഴിയില്ലെന്ന് ഊന്നിപ്പറയുന്ന സെലെൻസ്‌കി റഷ്യയുമായുള്ള സമാധാന കരാറിൽ ഉൾപ്പെടുത്താൻ ആഗ്രഹിക്കുന്ന സുരക്ഷാ ഉറപ്പുകളുടെ ഒരു ആഗ്രഹ പട്ടികയാണ് ഇപ്പോൾ പുറത്തു വിട്ടിരിക്കുന്നത്. എൻ‌ബി‌സി ന്യൂസിന് നൽകിയ അഭിമുഖത്തിലാണ് അദ്ദേഹം ഈ കാര്യം വിശദമാക്കിയിരിക്കുന്നത്.

ഗണ്യമായ സൈനിക സഹായം, ഉടനടി യൂറോപ്യൻ യൂണിയൻ അംഗത്വം, ഇസ്രയേലിന് നൽകുന്നതുപോലുള്ള സംരക്ഷണം എന്നിവയാണ് സെലൻസ്കിയുടെ ആവശ്യങ്ങളുടെ നീണ്ട നിരയിലുള്ളവ. റഷ്യൻ ആക്രമണത്തിൽ നിന്നുള്ള സംരക്ഷണവും യുക്രേനിയൻ വ്യോമാതിർത്തി സംരക്ഷിക്കാനുള്ള നാറ്റോ അംഗ പ്രതിജ്ഞകളും ഉൾപ്പെടെ, ഇസ്രയേലിന് ലഭിക്കുന്ന സമാനമായ സുരക്ഷാ ഗ്യാരണ്ടികളാണ് യുക്രേനിയൻ നേതാവ് ആഗ്രഹിക്കുന്നത്. യുക്രെയ്ൻ സംഘർഷം പരിഹരിക്കുക എന്ന ലക്ഷ്യത്തോടെ റഷ്യയും അമേരിക്കയും സൗദി അറേബ്യയിലെ റിയാദിൽ ചർച്ചകൾക്ക് തയ്യാറെടുക്കുന്നതിനിടെയാണ് ഈ ആവശ്യങ്ങൾ വരുന്നത്. ഏതൊരു സമാധാന കരാറിലും യുക്രയ്ന്റെ നേരിട്ടുള്ള പങ്കാളിത്തവും ഈ സുരക്ഷാ ഉറപ്പുകളും ഉൾപ്പെടുത്തണമെന്ന് സെലൻസ്‌കി ഊന്നിപ്പറഞ്ഞു.

Also Read: സെലന്‍സ്‌കിയെ ലക്ഷ്യം വെച്ച് ട്രംപ്; തിരഞ്ഞെടുപ്പ് ഉടന്‍ നടത്തണമെന്ന് ആഹ്വാനം

യുക്രേനിയൻ നേതാവിന്റെ അഭിപ്രായത്തിൽ, രാജ്യത്ത് വിന്യസിച്ചിരിക്കുന്ന “ശക്തമായ മിസൈൽ പാക്കേജും” ഇതിൽ ഉൾപ്പെടുന്നു. റഷ്യ ഒരു അധിനിവേശം ആരംഭിച്ചാൽ മാത്രമേ യുക്രെയ്ൻ ഇത് ഉപയോഗിക്കൂ എന്നാണ് സെലൻസ്കി പറയുന്നത്. റഷ്യയുടേതിന് സമാനമായ ഒരു “വലിയ സൈന്യം” തങ്ങൾക്ക് വേണമെന്നും അദ്ദേഹം ആവശ്യപ്പെട്ടു. അതുപോലെ തന്നെ യൂറോപ്യൻ യൂണിയനിലെൽ അംഗത്വവും സെലൻസ്കിയുടെ ആവശ്യങ്ങളിലൊന്നാണ്. ഇസ്രയേലിന് നൽകിയതിന് സമാനമായ സുരക്ഷാ ഗ്യാരണ്ടികൾ ആവശ്യപ്പെട്ട സെലൻസ്കി, കഴിഞ്ഞ വർഷം ഇറാന്റെ മിസൈൽ ആക്രമണത്തിൽ അമേരിക്ക, ഫ്രാൻസ്, ബ്രിട്ടൻ തുടങ്ങിയ രാജ്യങ്ങൾ ഇസ്രയേലിന് പ്രതിരോധം തീർത്തതിനെ ഉദാഹരണമായി ചൂണ്ടിക്കാട്ടി. നാറ്റോ അംഗമല്ലെങ്കിലും, ഇസ്രയേലിന് സഖ്യകക്ഷികളിൽ നിന്ന് സംരക്ഷണം ലഭിച്ചിരുന്നുവെന്നും യുക്രെയ്‌നും സമാനമായ പരിഗണന അർഹിക്കുന്നുണ്ടെന്നും സെലെൻസ്‌കി ഊന്നിപ്പറഞ്ഞു. യുക്രെയ്‌നിന്റെ ഭാവി സുരക്ഷയെക്കുറിച്ചുള്ള സെലെൻസ്‌കിയുടെ കാഴ്ചപ്പാടിൽ “വലിയ സൈന്യവും” യുക്രേനിയൻ സമൂഹത്തിന്റെ വ്യാപകമായ സമാഹരണവും ഉൾപ്പെടുന്ന ശക്തമായ പ്രതിരോധ സംവിധാനമാണ് ഉൾപ്പെടുന്നത്.

കൂടാതെ, റഷ്യൻ മിസൈലുകളിൽ നിന്ന് യുക്രേനിയൻ വ്യോമാതിർത്തി സംരക്ഷിക്കാൻ നാറ്റോ അംഗങ്ങൾ പ്രതിജ്ഞയെടുക്കണമെന്നും സെലൻസ്കി നിർദ്ദേശിച്ചു. ഇത് നാറ്റോ അംഗത്വം ആവശ്യമില്ലാതെ തന്നെ യുക്രെയ്‌നിന് ഇസ്രയേലിന് സമാനമായ ഒരു സുരക്ഷാ കവചമൊരുക്കാൻ സഹായിക്കും. അടുത്തിടെ മ്യൂണിക്ക് സുരക്ഷാ സമ്മേളനത്തിലും ഇതേ ആവശ്യമാണ് സെലൻസ്കി ഉന്നയിച്ചത്. യുക്രെയ്‌ന്റെ നാറ്റോ അംഗത്വ ലക്ഷ്യം യാഥാർഥ്യമാകില്ല എന്ന അമേരിക്കയുടെ തുറന്നുപറച്ചിലിനു പിന്നാലെയാണ് ഈ അഭിപ്രായപ്രകടനകളെല്ലാം നടന്നത്. ഇതിന് മറുപടിയായി, യുക്രെയ്‌നെ നാറ്റോയിൽ നിന്ന് ഒഴിവാക്കിയാൽ, അതിന്റെ പ്രതിരോധം ഉറപ്പാക്കാൻ ഏകദേശം 1.5 ദശലക്ഷം സൈനികരുടെ ഗണ്യമായ സൈനിക സേന ആവശ്യമാണെന്ന് സെലെൻസ്‌കി ഊന്നിപ്പറഞ്ഞു.

യുക്രെയ്‌നിന്റെ ശക്തമായ പ്രതിരോധ ശേഷിയുടെ അടിയന്തര ആവശ്യകതയെ ഊന്നിപ്പറയുന്നതാണ് യുക്രെയ്‌ൻ പ്രസിഡന്റ് വോളോഡിമർ സെലെൻസ്‌കിയുടെ പ്രസ്താവന. യുക്രെയ്‌ൻ നാറ്റോയുടെ ഭാഗമല്ലെങ്കിൽ, യുക്രെയ്‌നിന്റെ പ്രദേശത്ത്, വലുപ്പത്തിലും ശക്തിയിലും റഷ്യയുടെ സൈന്യത്തെ വെല്ലുന്ന തരത്തിൽ ഒരു ശക്തിയേറിയ സൈനിക ശക്തി കെട്ടിപ്പടുക്കാണമെന്നാണ് സെലെൻസ്‌കി വിഭാവനം ചെയ്യുന്നത്. യുക്രെയ്ൻ നാറ്റോയുമായി കൂടുതൽ അടുത്ത ബന്ധം പുലർത്താൻ ശ്രമിക്കുന്നതിനിടെയാണ് ഈ പ്രസ്താവന വരുന്നത്. നിലവിൽ നാറ്റോ അംഗമല്ലെങ്കിലും, സംഘടന യുക്രെയ്നിന്റെ അംഗത്വത്തിന് പിന്തുണ പ്രകടിപ്പിക്കുകയും ഗണ്യമായ സൈനിക സഹായം നൽകുകയും ചെയ്തിട്ടുണ്ട്. “യുക്രെയ്ൻ നാറ്റോയിൽ ഇല്ലെങ്കിൽ, അതിനർത്ഥം യുക്രെയ്ൻ അതിന്റെ പ്രദേശത്ത് നാറ്റോ നിർമ്മിക്കുമെന്നാണ്. അതിനാൽ ഇന്നത്തെ റഷ്യക്കാർക്കുള്ളത്രയും വലിയൊരു സൈന്യം നമുക്ക് ആവശ്യമാണെന്നാണ് യുക്രേനിയൻ നേതാവ് കഴിഞ്ഞ ആഴ്ച ദി ഇക്കണോമിസ്റ്റിനോടും അഭിപ്രായപ്പെട്ടത്.

വീഡിയോ കാണാം