ആഗോള എണ്ണവിപണിയിൽ വിതരണം വർധിപ്പിക്കാൻ സുപ്രധാന തീരുമാനവുമായി സൗദി അറേബ്യയും റഷ്യയും ഉൾപ്പെടെയുള്ള ഏഴ് ഒപെക് പ്ലസ് രാജ്യങ്ങൾ. ആഗസ്റ്റ് മുതൽ പ്രതിദിനം 1.88 ലക്ഷം ബാരൽ എണ്ണ അധികമായി വിപണിയിലെത്തിക്കാനാണ് ഈ രാജ്യങ്ങൾ തമ്മിൽ ധാരണയിലെത്തിയിരിക്കുന്നത്. എണ്ണവിലയിലെയും വിപണിയിലെയും അസ്ഥിരതകൾ പരിഹരിക്കുന്നതിന്റെ ഭാഗമായാണ് നടപടി.
സൗദി അറേബ്യ, റഷ്യ എന്നിവയ്ക്ക് പുറമെ ഇറാഖ്, കുവൈത്ത്, കസാക്കിസ്ഥാൻ, അൾജീരിയ, ഒമാൻ എന്നീ രാജ്യങ്ങളാണ് ഈ കൂട്ടായ്മയിലുള്ളത്. എണ്ണ വിപണിയുടെ ഭാവി സാധ്യതകളും നിലവിലെ സാഹചര്യങ്ങളും വിലയിരുത്താൻ നടന്ന ഉന്നതതല വെർച്വൽ യോഗത്തിലാണ് ഈ നിർണ്ണായക തീരുമാനമുണ്ടായത്. 2023 ഏപ്രിലിൽ പ്രഖ്യാപിച്ച ഉൽപ്പാദന നിയന്ത്രണങ്ങൾ ഘട്ടംഘട്ടമായി പിൻവലിക്കാനാണ് പുതിയ നീക്കം.
എന്നാൽ, ഈ ഉൽപ്പാദനം വർധിപ്പിക്കുന്നതിന്റെ വേഗത വിപണിയിലെ മാറ്റങ്ങൾക്കനുസരിച്ചായിരിക്കും. വിപണി സാഹചര്യങ്ങൾ മുൻനിർത്തി ഉൽപ്പാദനം കൂട്ടാനോ, താൽക്കാലികമായി നിർത്താനോ, അല്ലെങ്കിൽ പഴയപടി കുറയ്ക്കാനോ ഉള്ള പൂർണ്ണമായ സ്വാതന്ത്ര്യം പങ്കാളിത്ത രാജ്യങ്ങൾ നിലനിർത്തിയിട്ടുണ്ട്. അതീവ ജാഗ്രതയോടെ വിപണി നിരീക്ഷണം തുടരുമെന്നും യോഗം വ്യക്തമാക്കി.
‘ഡിക്ലറേഷൻ ഓഫ് കോപ്പറേഷൻ’ കരാറിലുള്ള പ്രതിബദ്ധത ആവർത്തിച്ച പങ്കാളിത്ത രാജ്യങ്ങൾ, 2024 ജനുവരി മുതൽ രേഖപ്പെടുത്തിയ അധിക ഉൽപ്പാദനത്തിന് കൃത്യമായ നഷ്ടപരിഹാര നടപടികൾ സ്വീകരിക്കുമെന്നും അറിയിച്ചു. ഇതിലൂടെ തങ്ങളുടെ നഷ്ടപരിഹാര പദ്ധതികൾ വേഗത്തിലാക്കാൻ ഈ രാജ്യങ്ങൾക്ക് സാധിക്കും. ഉൽപ്പാദന വ്യവസ്ഥകളും നഷ്ടപരിഹാര പുരോഗതിയും ജോയിന്റ് മിനിസ്റ്റീരിയൽ മോണിറ്ററിങ് കമ്മിറ്റി കർശനമായി നിരീക്ഷിക്കും.
വിപണി സാഹചര്യങ്ങളും പാലന റിപ്പോർട്ടുകളും പുനരവലോകനം ചെയ്യാൻ ഈ ഏഴ് രാജ്യങ്ങളുടെ അടുത്ത യോഗം ഓഗസ്റ്റ് രണ്ടിന് വീണ്ടും ചേരും. എണ്ണ ഉൽപ്പാദനത്തിലെ ഈ മാറ്റം വരും ദിവസങ്ങളിൽ ആഗോള ഇന്ധന വിപണിയിൽ വലിയ ചലനങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്. വിപണിയുടെ സ്ഥിരത ഉറപ്പാക്കാനും ആവശ്യകതയ്ക്കനുസരിച്ച് വിതരണം ക്രമീകരിക്കാനും ലക്ഷ്യമിട്ടുള്ള ഈ നടപടി എണ്ണ ഉപഭോക്താക്കൾക്കും വലിയ പ്രാധാന്യമുള്ളതാണ്. സ്ഥിതിഗതികൾ സൂക്ഷ്മമായി നിരീക്ഷിക്കുന്നതിലൂടെ മാത്രമേ വിപണിയിലെ സ്ഥിരത നിലനിർത്താൻ സാധിക്കുകയുള്ളൂ എന്ന വ്യക്തമായ ബോധ്യത്തോടെയാണ് രാജ്യങ്ങൾ മുന്നോട്ട് നീങ്ങുന്നത്.
