കടൽ കാക്കാൻ ഇറാൻ്റെ പുതിയ നിയമയുദ്ധം! ഹോർമുസിൽ ഇറാൻ പരമാധികാരം ഉറപ്പിക്കുമ്പോൾ

ലോകത്തിൻ്റെ ഊർജ്ജ വിപണിയുടെ ജീവനാഡിയായ ഹോർമുസ് കടലിടുക്ക് വീണ്ടും കലുഷിതമായിരിക്കുകയാണ്. വൻശക്തിയായ അമേരിക്കയുടെ സൈനിക ഭീഷണികളെയും ഉപരോധങ്ങളെയും പുല്ലുവില കൽപിച്ച്, കടലിടുക്കിന്മേൽ പുതിയ ഗതാഗത നിയന്ത്രണങ്ങൾ ഏർപ്പെടുത്തിക്കൊണ്ട് ഇറാൻ തങ്ങളുടെ പരമാധികാരം ഉറപ്പിക്കുകയാണ്. കേവലം ഒരു യുദ്ധവാർത്ത എന്നതിലുപരി, മിഡിൽ ഈസ്റ്റിലെ രാഷ്ട്രീയ ഭൂപടത്തിൽ ഇറാൻ നടത്തുന്ന നിർണ്ണായകമായ ഒരു ചുവടുവെപ്പാണിത്.

കടലിടുക്കിലൂടെയുള്ള കപ്പൽ ഗതാഗതം നിയന്ത്രിക്കുന്നതിനായി ഇറാൻ പുതുതായി രൂപീകരിച്ച പേർഷ്യൻ ഗൾഫ് സ്ട്രെയിറ്റ് അതോറിറ്റി ആണ് ഇപ്പോൾ ആഗോള ശ്രദ്ധാകേന്ദ്രം. ഹോർമുസ് കടലിടുക്കിലൂടെ സഞ്ചരിക്കേണ്ട ഓരോ കപ്പലും ഇനിമുതൽ ഇറാൻ്റെ കണിശമായ നിരീക്ഷണത്തിന് വിധേയമാകണമെന്ന് ഇറാൻ പ്രഖ്യാപിച്ചു കഴിഞ്ഞു. ഇതിൻ്റെ ഭാഗമായി ‘കപ്പൽ വിവര പ്രഖ്യാപനം’ എന്ന പേരിൽ 40-ലധികം ചോദ്യങ്ങളടങ്ങിയ വിശദമായ രേഖയാണ് ഇറാൻ പുറത്തിറക്കിയിരിക്കുന്നത്. ഗതാഗതം ആഗ്രഹിക്കുന്ന കപ്പലുകൾ ഈ രേഖ നിർബന്ധമായും പൂരിപ്പിക്കണം.

ഈ പുതിയ നിയമപ്രകാരം കപ്പലിൻ്റെ പേര്, ഉടമസ്ഥർ, ലക്ഷ്യസ്ഥാനം എന്നിവയ്ക്ക് പുറമെ, കപ്പലിലെ ജീവനക്കാരുടെ ദേശീയത, ചരക്കിൻ്റെ സ്വഭാവം തുടങ്ങിയ അതീവ സുപ്രധാനമായ വിവരങ്ങളും ഇറാൻ ശേഖരിക്കുന്നുണ്ട്. തെറ്റായതോ അപൂർണ്ണമായതോ ആയ വിവരങ്ങൾ നൽകുന്നവർ കടുത്ത പ്രത്യാഘാതങ്ങൾ നേരിടേണ്ടിവരുമെന്ന ഇറാൻ്റെ മുന്നറിയിപ്പ് അന്താരാഷ്ട്ര നാവിക സമൂഹത്തെ വലിയതോതിൽ ഞെട്ടിച്ചിരിക്കുകയാണ്. തങ്ങളുടെ സമുദ്രാതിർത്തിയിൽ അമേരിക്കൻ യുദ്ധക്കപ്പലുകൾ പ്രകോപനപരമായി സൈ്വരവിഹാരം നടത്തുന്നത് തടയാനും, അന്താരാഷ്ട്ര നിയമങ്ങൾ പാലിച്ച് മാത്രം ഗതാഗതം ഉറപ്പാക്കാനുമാണ് ഇറാൻ ഈ നടപടിയിലൂടെ പ്രധാനമായും ലക്ഷ്യമിടുന്നത്.

Also Read: അമേരിക്കയെ മുട്ടുകുത്തിച്ച ആ “12 ദിവസങ്ങൾ”! പ്രൊഫ. മറാണ്ടിയുടെ വെളിപ്പെടുത്തലിൽ ഞെട്ടി ലോകം…

ഡോണൾഡ് ട്രംപിൻ്റെ നേതൃത്വത്തിൽ അമേരിക്ക നടപ്പിലാക്കുന്ന ‘പ്രോജക്റ്റ് ഫ്രീഡം’ എന്ന നാവിക നീക്കം ഹോർമുസ് കടലിടുക്കിനെ സൈനികവൽക്കരിക്കാനുള്ള ശ്രമമാണെന്ന് ഇറാൻ ആരോപിക്കുന്നു. അമേരിക്കൻ ഡിസ്ട്രോയറുകളായ യുഎസ്എസ് ട്രൂസ്റ്റുണ്, യുഎസ്എസ് മസോൺ എന്നിവയുടെ സാന്നിധ്യം മേഖലയിലെ സമാധാനം തകർക്കാനാണെന്നാണ് ഇറാന്റെ പക്ഷം.

മെയ് 7 രാത്രിയും മെയ് 8 പുലർച്ചെയുമായി നടന്ന സംഘർഷങ്ങളിൽ അമേരിക്കയാണ് വെടിനിർത്തൽ ലംഘിച്ചതെന്ന് ഇറാൻ വ്യക്തമാക്കുന്നു. ജാസ്കിന് സമീപം ഒരു ഇറാനിയൻ എണ്ണ ടാങ്കറിനെ അമേരിക്ക ലക്ഷ്യം വെച്ചതാണ് സ്ഥിതിഗതികൾ വഷളാക്കിയത്. സ്വന്തം മണ്ണിലും കടലിലും ഇറാൻ്റെ നിയന്ത്രണം തകർക്കാൻ ശ്രമിക്കുന്ന അമേരിക്കൻ നീക്കങ്ങളെ “കടൽക്കൊള്ള” എന്നാണ് ഇറാൻ്റെ സൈനിക വക്താക്കൾ വിശേഷിപ്പിച്ചത്.

അമേരിക്കൻ ആക്രമണങ്ങൾക്ക് ഇറാൻ നൽകിയ മറുപടി കേവലം പ്രതിരോധമായിരുന്നില്ല, മറിച്ച് ഒരു താക്കീതായിരുന്നു. ഖ്വഷ്ം ദ്വീപ്, ബന്ദർ ഖമീർ തുടങ്ങിയ തീരദേശങ്ങളിലെ സാധാരണക്കാരെ ലക്ഷ്യം വെച്ച് അമേരിക്ക നടത്തിയ വ്യോമാക്രമണങ്ങൾക്ക് മിനിറ്റുകൾക്കുള്ളിൽ തന്നെ ഇറാൻ തിരിച്ചടി നൽകി.

ചബഹാറിന് തെക്ക് ഭാഗത്ത് നിലയുറപ്പിച്ച അമേരിക്കൻ സൈനിക ആസ്തികൾക്ക് നേരെ ഇറാൻ നടത്തിയ മിസൈൽ-ഡ്രോൺ ആക്രമണങ്ങൾ തങ്ങളുടെ സൈനിക ശേഷി വിളിച്ചോതുന്നതാണ്. “അവർ ഞങ്ങളെ പരീക്ഷിച്ചു, ഞങ്ങൾ അവർക്ക് മറുപടി നൽകി” എന്നതാണ് ഇറാൻ്റെ നിലപാട്. അമേരിക്കൻ നാശനഷ്ടങ്ങൾ സെന്റ്‌കോം നിഷേധിക്കുന്നുണ്ടെങ്കിലും, ഇറാൻ്റെ മിസൈൽ കരുത്ത് അമേരിക്കയെ പോലും പുനർചിന്തയ്ക്ക് പ്രേരിപ്പിക്കുന്നുണ്ട്.

ഹോർമുസ് കടലിടുക്കിലെ ഓരോ വെടിയൊച്ചയും ലോകത്തെവിടെയോ ഇരിക്കുന്ന സാധാരണക്കാരൻ്റെ പോക്കറ്റിനെ ബാധിക്കുന്നു. എണ്ണവില ബാരലിന് 101.50 ഡോളറിലേക്ക് കുതിച്ചുയർന്നത് ഇതിൻ്റെ തെളിവാണ്. അമേരിക്കയിൽ ഗ്യാസോലിൻ വില 40 ശതമാനത്തോളം വർദ്ധിച്ചത് ട്രംപിന് ആഭ്യന്തരമായി വലിയ തലവേദനയാണ് ഉണ്ടാക്കുന്നത്.

താൻ തുടങ്ങിവെച്ച ‘പ്രോജക്റ്റ് ഫ്രീഡം’ വിജയിച്ചുവെന്ന് ട്രംപ് അവകാശപ്പെടുമ്പോഴും, കടലിടുക്കിലെ യഥാർത്ഥ നിയന്ത്രണം ഇറാൻ്റെ കയ്യിലാണെന്ന വസ്തുത അദ്ദേഹം മറച്ചുവെക്കുകയാണ്. “ലവ് ടാപ്പ്” എന്ന് ട്രംപ് വിശേഷിപ്പിക്കുന്ന ഏറ്റുമുട്ടലുകൾ യഥാർത്ഥത്തിൽ മിഡിൽ ഈസ്റ്റിലെ അമേരിക്കൻ ആധിപത്യത്തിൻ്റെ അന്ത്യത്തിൻ്റെ തുടക്കമാണോ എന്ന ചോദ്യം പ്രസക്തമാണ്.

Also Read: പേർഷ്യൻ ആകാശത്ത് അമേരിക്കൻ ചാരഡ്രോണിനെ തകർത്ത് ഇറാൻ! അഹങ്കാരത്തെ തകർത്തെറിഞ്ഞ് പേർഷ്യൻ വീര്യം

ആയുധങ്ങൾ കൊണ്ട് മാത്രമല്ല, നയതന്ത്രം കൊണ്ടും ഇറാൻ പോരാടുന്നുണ്ട്. 14 പോയിൻ്റുകളുള്ള ഒരു പുതിയ സമാധാന പദ്ധതി ഇറാൻ മുന്നോട്ടുവെച്ചിട്ടുണ്ട്. എന്നാൽ ഇറാൻ്റെ ആണവ പദ്ധതിയേയും പരമാധികാരത്തേയും ബാധിക്കുന്ന തരത്തിലുള്ള ഒരു വിട്ടുവീഴ്ചയ്ക്കും തങ്ങൾ തയ്യാറല്ലെന്ന് ഇറാൻ പരമോന്നത നേതൃത്വം ഉറപ്പിച്ചു പറയുന്നു.

ഹോർമുസ് കടലിടുക്ക് ഒരു യുദ്ധക്കളമായി മാറുമ്പോൾ, അവിടെ പരീക്ഷിക്കപ്പെടുന്നത് ഇറാൻ്റെ ഇച്ഛാശക്തിയാണ്. അമേരിക്കൻ ഉപരോധങ്ങളെയും സൈനിക വ്യൂഹങ്ങളെയും നേരിട്ടുകൊണ്ട് തങ്ങളുടെ കടൽ അതിർത്തികൾ സംരക്ഷിക്കുന്ന ഇറാൻ്റെ നിലപാട് മേഖലയിലെ മറ്റു രാജ്യങ്ങൾക്കും പുതിയൊരു ദിശാബോധം നൽകുന്നു. കടലിടുക്കിലൂടെ ഇനി കപ്പലുകൾ നീങ്ങണമെങ്കിൽ ഇറാൻ്റെ ‘ഡിക്ലറേഷൻ’ പൂരിപ്പിക്കണം എന്ന നിയമം, പടിഞ്ഞാറൻ ശക്തികൾക്കുള്ള ശക്തമായ ഒരു താക്കീതാണ് “ഇത് ഞങ്ങളുടെ കടലാണ്, ഇവിടെ ഞങ്ങളുടെ നിയമമാണ്.”

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)