പ്രതിരോധ രംഗത്ത് സ്വയം ശക്തിയായി ഉയര്‍ന്നുവരാന്‍ ശ്രമിക്കുന്ന രാജ്യമാണ് ഇന്ത്യ. വിവിധങ്ങളായ വെല്ലുവിളികളെ അഭിമുഖീകരിക്കേണ്ടി വരുന്നുണ്ടെങ്കിലും കഴിഞ്ഞ കുറച്ച് വര്‍ഷങ്ങളായി പ്രതിരോധമേഖലയില്‍ രാജ്യം വേഗത്തില്‍ വളര്‍ച്ചയുണ്ടാക്കിയിട്ടുമുണ്ട്. രാജ്യത്തിന്റെ പ്രതിരോധ ആവശ്യകതയുടെ 65 ശതമാനവും ഇന്ത്യ ഇന്ന് സ്വയം നിര്‍മ്മിക്കുന്നുണ്ട്. കൂടാതെ ഇന്ത്യന്‍ പ്രതിരോധ ഉത്പന്നങ്ങള്‍ നിരവധി രാജ്യങ്ങളിലേക്ക് കയറ്റുമതി ചെയ്യുകയും ചെയ്യുന്നു. ‘മെയ്ക്ക് ഇന്‍ ഇന്ത്യ പദ്ധതി’ നിലവില്‍ വന്നതിനു ശേഷം ഇന്ത്യയുടെ പ്രതിരോധ ഉത്പാദനം ”അസാധാരണമായ വേഗതയില്‍” വളര്‍ന്നതായി വിവിധ റിപ്പോര്‍ട്ടുകളും സൂചിപ്പിക്കുന്നുണ്ട്. ആ നിലയ്ക്ക്, ഇന്ത്യയ്ക്ക് മറ്റൊരു പൊന്‍തൂവല്‍ കൂടിയായി മാറിയ നേട്ടമാണ് ഇപ്പോള്‍ ഉണ്ടായിരിക്കുന്നത്.
Also Read: അമേരിക്കയെ വെട്ടി, പ്രതിരോധമേഖലയുടെ വളർച്ചയ്ക്ക് യൂറോപ്പിന്റെ പുതിയ നീക്കം
പ്രാദേശികമായി ഇന്ത്യ നിര്‍മിച്ച ലേസര്‍ ആയുധത്തിന്റെ പരീക്ഷണം വിജയം കണ്ടിരിക്കുകയാണ്. ഇതോടെ ഡ്രോണുകളെയും മറ്റ് വ്യോമ ഭീഷണികളെയും നിര്‍വീര്യമാക്കുന്നതിന് ഉയര്‍ന്ന ഊര്‍ജ്ജ ലേസര്‍ ആയുധങ്ങള്‍ വിന്യസിക്കാനുള്ള ശേഷിയാണ് ഇന്ത്യ തെളിയിച്ചിരിക്കുന്നത്. ഇതോടെ ലേസര്‍ സാങ്കേതികവിദ്യ കൈവശമുള്ള റഷ്യ, അമേരിക്ക, ചൈന എന്നിവയുള്‍പ്പെടെയുള്ള രാജ്യങ്ങളുടെ ശ്രേണിയിലേക്ക് ഇന്ത്യയും പ്രവേശിച്ചിരിക്കുകയാണ്. ഡിഫന്‍സ് റിസര്‍ച്ച് ആന്‍ഡ് ഡെവലപ്മെന്റ് ഓര്‍ഗനൈസേഷന്‍ (ഡിആര്‍ഡിഒ), തദ്ദേശീയമായി വികസിപ്പിച്ചെടുത്ത 30 കിലോവാട്ട് ലേസര്‍ ഉപയോഗിച്ചുള്ള ഡയറക്ടഡ് എനര്‍ജി വെപ്പണ്‍ (ഡി. ഇ.ഡബ്ല്യു) സിസ്റ്റം ആന്ധ്രാപ്രദേശിലെ കുര്‍ണൂലിലുള്ള നാഷണല്‍ ഓപ്പണ്‍ എയര്‍ റേഞ്ചിലായിരുന്നു വിജയകരമായി പരീക്ഷിച്ചത്. നിര്‍വ്വഹണത്തിന്റെ മിന്നല്‍ വേഗത, കൃത്യത, സെക്കന്‍ഡുകള്‍ക്കുള്ളിലെ ലക്ഷ്യപ്രാപ്തി എന്നിവ ലേസര്‍ ആയുധത്തെ ഏറ്റവും ശക്തമായ ഡ്രോണ്‍പ്രതിരോധ സംവിധാനമാക്കുന്നതായി ഡി.ആര്‍.ഡി.ഒ. പറഞ്ഞു.
മിസൈലുകള്‍, ഡ്രോണുകള്‍, ചെറിയ പ്രൊജക്ടൈലുകള്‍ എന്നിവ പ്രവര്‍ത്തനരഹിതമാക്കാനുള്ള ഇത്തരം സാങ്കേതികവിദ്യയില്‍ ചുരുക്കം ചില രാജ്യങ്ങള്‍ക്കേ പ്രാവീണ്യമുള്ളൂ. ഡി.ഇ.ഡബ്ല്യുയൂടെ വിജയകരമായ പരീക്ഷണത്തോടെ അമേരിക്ക, റഷ്യ, ചൈന, ബ്രിട്ടന്‍, ജര്‍മനി, ഇസ്രയേല്‍ എന്നിവയുള്‍പ്പെട്ട സംഘത്തിലേക്കാണ് ഇന്ത്യയുമെത്തുന്നത്. ഡിആര്‍ഡിഒ ഉദ്യോഗസ്ഥര്‍ പറയുന്നതനുസരിച്ച്, ഫിക്‌സഡ്-വിംഗ് ഡ്രോണുകള്‍, സ്വാം ഡ്രോണുകള്‍, നിരീക്ഷണ സെന്‍സറുകള്‍, ആന്റിനകള്‍ എന്നിവയുള്‍പ്പെടെ വിവിധ ലക്ഷ്യങ്ങളെ ഉയര്‍ന്ന വേഗതയിലും കൃത്യതയിലും ഇടപഴകാനും നശിപ്പിക്കാനും ഈ സിസ്റ്റം 30 കിലോവാട്ട് ലേസര്‍ ബീം ഉപയോഗിക്കുന്നു. സര്‍ക്കാര്‍ ലബോറട്ടറികള്‍, അക്കാദമിക് സ്ഥാപനങ്ങള്‍, സ്വകാര്യ വ്യവസായ സ്ഥാപനങ്ങള്‍ എന്നിവയുടെ സഹകരണത്തോടെ ഡി.ആര്‍.ഡി.ഒയുടെ ഹൈദരാബാദ് ആസ്ഥാനമായ സെന്റര്‍ ഫോര്‍ ഹൈ എനര്‍ജി സിസ്റ്റംസ് ആന്‍ഡ് സയന്‍സസ് ആണ് ഈ സംവിധാനം വികസിപ്പിച്ചെടുത്തത്.
റഡാറോ, അതിന്റെ ഇന്‍ബില്‍റ്റ് ഇലക്ട്രോ ഒപ്ടിക് (ഇ.ഒ) സിസ്റ്റമോ ഏതെങ്കിലുമൊരു ലക്ഷ്യം കണ്ടെത്തിയാലുടന്‍ ഡി.ഇ.ഡബ്ല്യുവിന് പ്രകാശവേഗതയില്‍ അതുമായി ഇടപഴകാന്‍ കഴിയും. ലേസര്‍ ബീം കടത്തിവിട്ട് ലക്ഷ്യം വെച്ച ഉപകരണത്തിന്റെ ഘടന തകരാറിലാക്കുകയാണ് ചെയ്യുന്നത്. വിലയേറിയ വെടിക്കോപ്പുകള്‍ക്കു പകരം ഇത്തരം അത്യാധുനിക ആയുധങ്ങള്‍ ഉപയോഗിക്കുന്നതിലൂടെ യുദ്ധക്കളത്തില്‍ വിപ്ലവം സൃഷ്ടിക്കാനാകുമെന്നാണു വിലയിരുത്തല്‍. അതോടൊപ്പം യാദൃച്ഛിക നാശനഷ്ടത്തിനുള്ള സാധ്യതയും കുറയ്ക്കുന്നതായി ഡി.ആര്‍.ഡി.ഒ. പ്രസ്താവനയില്‍ പറഞ്ഞു. ആളില്ലാ വ്യോമസംവിധാനങ്ങളുടെ (യു.എ.എസ്) വ്യാപനവും ഡ്രോണുകളുടെ ആവിര്‍ഭാവവും ഏറിയ സാഹചര്യത്തില്‍ ഡയറക്ടഡ് എനര്‍ജി വെപ്പണുകളുടെ ആവശ്യം വര്‍ധിക്കുന്ന സമയത്താണ് ഇന്ത്യയുടെ ലേസര്‍ ആയുധ വികസനം. ഭാവിയുടെ ആയുധമായാണ് ഡി.ഇ.ഡബ്ല്യുവിനെ കരുതിപ്പോരുന്നത്.
മിസൈലുകള്‍, വിമാനങ്ങള്‍, ആളില്ലാ ആകാശവാഹനങ്ങള്‍, ഉപഗ്രഹങ്ങള്‍ എന്നിവയെപ്പോലും തകരാറിലാക്കാന്‍ ഭാവിയില്‍ ഇത്തരം ആയുധങ്ങള്‍ക്കു കഴിയും. വലിയ ലോജിസ്റ്റിക് ശൃംഖലകള്‍ ആവശ്യമില്ലാത്തതും പരമ്പരാഗത ആയുധങ്ങളേക്കാള്‍ ഏറെ ചെലവുകുറഞ്ഞതുമാണിത്. വ്യോമ ഭീഷണികളെ കൃത്യമായി ലക്ഷ്യം വെയ്ക്കാന്‍ സഹായിക്കുന്ന 360-ഡിഗ്രി ഇലക്ട്രോ-ഒപ്റ്റിക്കല്‍/ഇന്‍ഫ്രാറെഡ് സെന്‍സര്‍ ഈ സിസ്റ്റത്തില്‍ ഉണ്ട്. ഇതിന് അഞ്ച് കിലോമീറ്റര്‍ ദൂരപരിധിയുണ്ട്. കൂടാതെ ആശയവിനിമയം, സാറ്റലൈറ്റ് സിഗ്‌നല്‍ ജാമിംഗ് എന്നിവയുള്‍പ്പെടെയുള്ള നൂതന ഇലക്ട്രോണിക് യുദ്ധ ശേഷികള്‍ സജ്ജീകരിച്ചിരിക്കുന്നു. ഇത് വ്യോമ ലക്ഷ്യങ്ങളെ ഫലപ്രദമായി നിര്‍വീര്യമാക്കാന്‍ അനുവദിക്കുന്നു. ലേസര്‍ ആയുധ സംവിധാനം പ്രദര്‍ശിപ്പിക്കുന്നതില്‍ ഇന്ത്യയും അമേരിക്കയും റഷ്യയും ചൈനയും ചേര്‍ന്നതായി ഡിആര്‍ഡിഒ ചെയര്‍മാന്‍ ഡോ. സമീര്‍ വി കാമത്ത് എഎന്‍ഐയോട് പറഞ്ഞു.
Also Read: ജനം മുഴുപട്ടിണിയിൽ,വെടിനിർത്തലിന് പുതിയ വ്യവസ്ഥയും, ഗാസയ്ക്ക് ചുറ്റും ചതിക്കെണികൾ തീർത്ത് ഇസ്രയേൽ
ഇസ്രയേല്‍ നിലവില്‍ സമാനമായ സാങ്കേതികവിദ്യയില്‍ പ്രവര്‍ത്തിക്കുന്നുണ്ട്. കൂടുതല്‍ വലിയ ഒരു ലക്ഷ്യം കൈവരിക്കുന്നതിനുള്ള ആദ്യപടി മാത്രമാണിതെന്ന് കാമത്ത് ഊന്നിപ്പറഞ്ഞു. ഉയര്‍ന്ന ഊര്‍ജ്ജമുള്ള മൈക്രോവേവുകള്‍, ഇലക്ട്രോമാഗ്‌നറ്റിക് പള്‍സുകള്‍ തുടങ്ങിയ മറ്റ് നൂതന സാങ്കേതികവിദ്യകളില്‍ ഡിആര്‍ഡിഒ പ്രവര്‍ത്തിക്കുന്നുണ്ടെന്നും, ‘സ്റ്റാര്‍ വാര്‍സ് പോലുള്ള’ കഴിവുകള്‍ വികസിപ്പിക്കുക എന്ന ലക്ഷ്യത്തോടെയാണ് അദ്ദേഹം ഇത് ചെയ്യുന്നതെന്നും, പ്രദര്‍ശിപ്പിച്ച ലേസര്‍ സിസ്റ്റം അതിന്റെ ഒരു ഘടകം മാത്രമാണെന്നും അദ്ദേഹം പരാമര്‍ശിച്ചു. നിലവില്‍ ഡ്രോണുകള്‍ ഉപയോഗിച്ചുള്ള ആക്രമണമാണ് പല യുദ്ധ മേഖലയിലും നടന്നു കൊണ്ടിരിക്കുന്നത് എന്നതിനാല്‍, ഈ ലേസര്‍ ആയുധം ഇന്ത്യയെ സംബന്ധിച്ചെടുത്തോളം ഏറെ തന്ത്രപ്രധാനമാണ് എന്നതില്‍ സംശയമില്ല.
യുക്രെയ്ന്‍-റഷ്യ സംഘര്‍ഷത്തില്‍, ഡ്രോണുകള്‍ ഒരു പരിവര്‍ത്തന ശാസ്ത്രമല്ലെങ്കില്‍, ഒരു പുതിയ യുദ്ധ വിഭാഗമായി ഉയര്‍ന്നുവന്നിട്ടുണ്ട് എന്നാണ് കഴിഞ്ഞ ആഴ്ച, ഇന്ത്യന്‍ പ്രതിരോധ മന്ത്രി രാജ്നാഥ് സിംഗ് അഭിപ്രായപ്പെട്ടത്. അതുപോലെ, താഴ്ന്ന ഭൂമി ഭ്രമണപഥത്തിലെ ശേഷികള്‍ സൈനിക ഇന്റലിജന്‍സ്, നിരീക്ഷണം, സ്ഥാനനിര്‍ണ്ണയം, ലക്ഷ്യമിടല്‍, ആശയവിനിമയം എന്നിവ പോരാട്ടത്തെ ഒരു പുതിയ ഉയരത്തിലേക്ക് കൊണ്ടുപോകുന്നു എന്ന് അദ്ദേഹം പറഞ്ഞതായും ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്തു. ഡിആര്‍ഡിഒ നിലവില്‍ ‘സൂര്യ’ എന്നറിയപ്പെടുന്ന കൂടുതല്‍ നൂതനമായ ലേസര്‍ സിസ്റ്റം വികസിപ്പിച്ചുകൊണ്ടിരിക്കുകയാണ്. ഇതിന് 300 കിലോവാട്ട് പവര്‍ ഔട്ട്പുട്ടും 20 കിലോമീറ്റര്‍ പ്രവര്‍ത്തന പരിധിയുമുണ്ടാകും. മിസൈലുകള്‍, ആളില്ലാ വ്യോമ സംവിധാനങ്ങള്‍ (യുഎഎസ്) ഉള്‍പ്പെടെയുള്ള അതിവേഗ വ്യോമ ഭീഷണികളെ നേരിടുന്നതിനാണ് ഈ അടുത്ത തലമുറ ആയുധം രൂപകല്‍പ്പന ചെയ്തിരിക്കുന്നതെന്ന് ഉദ്യോഗസ്ഥര്‍ പറയുന്നു.
