ആഭ്യന്തര ക്രിക്കറ്റിൽ മികച്ച പ്രകടനം കാഴ്ചവെച്ചാൽ സൂര്യകുമാർ യാദവിന് ഇന്ത്യൻ ടീമിലേക്ക് മടങ്ങിവരാൻ അവസരമുണ്ടെന്ന് ബിസിസിഐ വൃത്തങ്ങൾ അറിയിച്ചു. 2026-ലെ ടി20 ലോകകപ്പിൽ ഇന്ത്യയെ കിരീടത്തിലേക്ക് നയിച്ച സൂര്യകുമാറിനെ, മോശം ഫോമിനെത്തുടർന്നാണ് ക്യാപ്റ്റൻ സ്ഥാനത്തുനിന്നും ടീമിൽ നിന്നും ഒഴിവാക്കിയത്. പകരം ശ്രേയസ് അയ്യരെയാണ് പുതിയ ടി20 നായകനായി ബിസിസിഐ നിയമിച്ചത്.
എന്നാൽ, ശ്രേയസ് അയ്യരുടെ നേതൃത്വത്തിൽ ഇന്ത്യൻ ടീം തുടർച്ചയായി പരാജയങ്ങൾ ഏറ്റുവാങ്ങുകയാണ്. അയർലൻഡിനെതിരായ പരമ്പര 2-0 ന് കൈവിട്ടതിന് പിന്നാലെ, ഇംഗ്ലണ്ടിനെതിരായ ടി20 പരമ്പര 4-0 എന്ന നിലയിൽ ഇന്ത്യ തോറ്റു. പരമ്പരയിലെ നാല് മത്സരങ്ങളിലും ഇന്ത്യ ദയനീയമായാണ് കീഴടങ്ങിയത്. അയർലൻഡിനെതിരെ ചരിത്രത്തിലാദ്യമായി ഒരു ദ്വിരാഷ്ട്ര ടി20 പരമ്പര തോറ്റ ഇന്ത്യക്ക്, ഇംഗ്ലണ്ടിനെതിരെയും കനത്ത പരാജയം നേരിടേണ്ടി വന്നത് വലിയ തിരിച്ചടിയായി.
Also Read:ജോക്കോവിച്ച് പ്രചോദനമെന്ന് സഞ്ജു സാംസൺ; വിംബിൾഡൺ ഫൈനൽ കാണാനെത്തി ഇന്ത്യൻ ക്രിക്കറ്റ് താരങ്ങൾ
സൂര്യകുമാർ യാദവ് നിലവിൽ സെലക്ഷൻ പദ്ധതികളിൽ ഇല്ലെങ്കിലും, ആഭ്യന്തര ക്രിക്കറ്റിൽ സ്ഥിരതയോടെ റൺസ് കണ്ടെത്തിയാൽ അദ്ദേഹത്തെ വീണ്ടും ടീമിലേക്ക് പരിഗണിക്കാൻ സാധ്യതയുണ്ടെന്ന് ബിസിസിഐ വ്യക്തമാക്കി. “സൂര്യകുമാറിനായി ടീമിന്റെ വാതിലുകൾ ഇനിയും അടഞ്ഞിട്ടില്ല. മികച്ച പ്രകടനം നടത്തിയാൽ തിരിച്ചുവരാൻ അദ്ദേഹത്തിന് യോഗ്യതയുണ്ട്,” ബിസിസിഐ വൃത്തങ്ങൾ പറഞ്ഞു.
ഇംഗ്ലണ്ടിനെതിരായ ഏകദിന പരമ്പരയാണ് ഇന്ത്യയുടെ അടുത്ത ലക്ഷ്യം. പരിചയസമ്പന്നരായ രോഹിത് ശർമ്മയും വിരാട് കോഹ്ലിയും ഈ പരമ്പരയിൽ ടീമിലേക്ക് തിരിച്ചെത്തും. ഇതിനായുള്ള പരിശീലനം ഇന്ത്യ ഇതിനകം ആരംഭിച്ചു കഴിഞ്ഞു.
