പത്തനംതിട്ട: ആറന്മുളയിൽ പ്രളയ ദുരിതാശ്വാസ പ്രവർത്തനങ്ങളിൽ പങ്കാളിയായ ഓഫ് റോഡ് വാഹനത്തിന് പിഴ ചുമത്തിയ അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടറെ സസ്പെൻഡ് ചെയ്ത സംഭവത്തിൽ മോട്ടോർ വാഹന വകുപ്പിൽ പ്രതിഷേധം ശക്തമാകുന്നു. അടൂർ ആർ.ടി.ഓ ഓഫീസിലെ എ.എം.വി.ഐ ബി.എസ്. ലൈജുവിനെതിരെയെടുത്ത നടപടിക്കെതിരെയാണ് ഉദ്യോഗസ്ഥർ രംഗത്തെത്തിയിരിക്കുന്നത്.
ആറന്മുള എം.എൽ.എ അബിൻ വർക്കി ഗതാഗത മന്ത്രിക്ക് നൽകിയ പരാതിയുടെ അടിസ്ഥാനത്തിലായിരുന്നു സസ്പെൻഷൻ. എന്നാൽ, കൃത്യമായ നിയമലംഘനങ്ങൾ കണ്ടതിനാലാണ് പിഴയീടാക്കിയതെന്നും സസ്പെൻഷൻ നടപടി പിൻവലിക്കണമെന്നും ആവശ്യപ്പെട്ട് എം.വി.ഡി ഉദ്യോഗസ്ഥർ സമരപരിപാടികളിലേക്ക് കടക്കാൻ നീക്കം നടത്തുകയാണ്. ഓഗസ്റ്റ് 5 ബുധനാഴ്ച രാവിലെ 11 മണിയോടെ അടൂർ ആശുപത്രി ജംഗ്ഷന് സമീപം വാഹനം തടഞ്ഞു നിർത്തുമ്പോൾ ദുരിതാശ്വാസ സാമഗ്രികളോ ദൗത്യത്തിൽ ഏർപ്പെട്ടതിന്റെ ലക്ഷണങ്ങളോ ഉണ്ടായിരുന്നില്ലെന്ന് ഉദ്യോഗസ്ഥർ വ്യക്തമാക്കുന്നു. പുറത്തേക്ക് തള്ളിയ രീതിയിലുള്ള നാല് ടയറുകൾ, തീവ്രപ്രകാശമുള്ള ആറ് അനധികൃത ലൈറ്റുകൾ, കാലാവധി കഴിഞ്ഞ പുക പരിശോധന സർട്ടിഫിക്കറ്റ് എന്നിവ വാഹനത്തിൽ കണ്ടെത്തിയിരുന്നു.
അമിത ലൈറ്റിന് 5,000 രൂപയും പുക പരിശോധന സർട്ടിഫിക്കറ്റ് ഇല്ലാത്തതിന് 2,000 രൂപയുമാണ് പിഴയിട്ടത്. പിന്നീട് ഓണർ സർട്ടിഫിക്കറ്റ് ഹാജരാക്കിയതോടെ 2,000 രൂപ ഒഴിവാക്കി നൽകി. 2024 മാർച്ചിലും ഈ വർഷം ഏപ്രിലിലും സമാന രീതിയിൽ നിയമലംഘനത്തിന് ഈ വാഹനത്തിന് പിഴ ചുമത്തിയിട്ടുണ്ടെന്നും ഉദ്യോഗസ്ഥർ ചൂണ്ടിക്കാട്ടുന്നു. അതേസമയം, പ്രളയബാധിത പ്രദേശങ്ങളിൽ ആളുകളെ സുരക്ഷിത സ്ഥാനങ്ങളിലേക്ക് മാറ്റാൻ സന്നദ്ധസേവനം നടത്തിയ വാഹനത്തിന് മനുഷ്യത്വപരമായ പരിഗണന നൽകിയില്ലെന്നാണ് എതിർവിഭാഗത്തിന്റെ ആരോപണം.
